Mo Tingasazgiyaku Lusu Lidu mu Uteŵeti—Kuti Tipharazgi Mwamwaŵi Tiyambengi Ndisi Kukambiskana ndi Munthu

Nchifukwa Wuli Nkhwakukhumbika? Asani tipharazga kunyumba ndi nyumba, kanandi tisaniya kuti panyumba palivi ŵanthu. Kweni tingakumana nawu asani takwera basi, tilindizga dokotala kuchipatala, pa nyengu yakupumuwa kusukulu pamwenga kunchitu ndi kumalu nganyaki. Yehova wakhumba kuti ŵanthu wosi avwi uthenga wa Ufumu. (1 Tim. 2:3, 4) Kuti tipharazgiyi munthu, kanandi titenere kwamba ndisi kukambiskana nayu.

Mo Mungachitiya:

Chitani vinthu mwakuphwere. Kumbi munthu yo mwakumana nayu wawoneka kuti ngwakufwatuka ndipuso wakhumba kuti mukambiskani nayu? Kumbi pamalu po muli mphakuti mungakambiskana nayu umampha? Apharazgi anyaki amwemwete asani alereskana ndi munthu yo akhumba kumupharazgiya, asani nayu wamwemwete atamba kukambiskana nayu.
Asani muchita mantha kupharazga, perekani rombu lifupi la mumtima.—Neh. 2:4; Mac. 4:29.
Mungayamba ndi kumutawuzga. Pa nyengu yo Yesu wakambiskananga ndi munthukazi wa ku Samaria wangwamba dankha kukamba za Ufumu cha. (Yoh. 4:7) Nyengu zinyaki tingayamba kukambiskana ndi ŵanthu mwakuŵawonga. Mwakuyeruzgiyapu, tingakamba kuti: “Ŵana ŵinu mukuŵalera umampha.” Pamwenga tingayamba kukambiskana nawu mwakuŵafumba kuti: “Kumbi munguvwa vo angukamba zana pa wayilesi?”
Asani mwayamba kukambiskana ndi munthu, saniyani nthowa yakuti mumupharazgiyi uthenga wamampha kweni mungathaŵiriyanga cha. Yesani kukambiskana nayu nge mo mulongolore mazuŵa ngosi. Panyaki mungakamba fundu yinyaki yo yingamuchitiska kuti wafumbi fumbu. Mwakuyeruzgiyapu, asani nkhani yo njakukwaskana ndi banja mungakamba kuti, “Ndikusaniya ulongozgi unyaki wakovya wa mo tingalere ŵana.” Asani mukambiskana nkhani yo mwavwa pa wayilesi mungakamba kuti, “Pambula kuswera yapa ndinguŵerenga nkhani yinyaki yamampha ukongwa yo yilongo kuti vinthu visinthengi.” Mungagongowanga cha asani kukambiskana kwinu kwamaliya mude, mwechendamupharazgiyi.
Mupingengi timapepala pamwenga magazini kuti mupaskengi ŵanthu akunweka.

Yesani Kuchita Ivi Mwezi Wunu:

Sabata yeyosi yesani kukambiskana ndi munthu yumoza ndi chilatu chakuti mumupharazgiyi mwamwaŵi.