Kumbi Yehova Watindiwona Wuli?
1. Kumbi Bayibolo liyanana wuli ndi gilasi?
1 Asani mwe ndi gilasi lakuwoniyapu, kumbi muwonapu kalinga? Anandi mwaku isi tiwonapu zuŵa lelosi ndipu venivi vititovya kuziŵa malu ngo tikhumbika kunozga. Bayibolo liyanana ndi gilasi. Asani titiliŵerenga, litiwovyengi kuziŵa mo tiliri mkati mwidu chifukwa ndimu Yehova wawona. (1 Sam. 16:7; Yak. 1:22-24) Mazu ngaku Chiuta ‘ngateska [ngapambaniska] maŵanaŵanu ndi makhumbu nga mtima.’ (Ŵah. 4:12) Kumbi kuŵerenga Bayibolo ndi kulunguruka zuŵa lelosi, kungatiwovya wuli kuti tiziŵi vo tikhumbika kunozga ndi chilatu chakuti tipharazgengi mwalusu?—Sumu 1:1-3.
2. Kumbi Bayibolo lititiwovya wuli kuti tijisandi?
2 Gwiriskiyani Nchitu Bayibolo nge Gilasi: Nkhani zo ze m’Bayibolo za ateŵeti aku Yehova akugomezgeka, zititiwovya kuziŵa mijalidu yo Chiuta watiyiwona kuti njamampha. Mwakuyeruzgiyapu, Davidi wanguchita vinthu mwaphamphu chifukwa cha zina laku Chiuta. (1 Sam. 17:45, 46) Yesaya wangujipereka kupharazga mwachiganga muchigaŵa chakusuzga cho wangutumika. (Yes. 6:8, 9) Chifukwa chakuti Yesu wayanjanga ukongwa Awiski akuchanya, vingumuchitiska kuti wagutiskiki ndi uteŵeti wo wachitanga ndipuso wakondwanga nawu. (Yoh. 4:34) Akhristu a mu nyengu ya akutumika apharazganga mwaphamphu, agomezganga Yehova ndipu anguwere vuli cha. (Mac. 5:41, 42; 2 Ŵakor. 4:1; 2 Tim. 4:17) Asani tilunguruka pa vo ŵanthu ŵenaŵa anguchita, vititiwovya kujisanda ndi chilatu chakuti tisinthi mo tichitiya uteŵeti widu wakupaturika.
3. Nchifukwa wuli titenere cha kuzeleza asani tikhumbika kusintha?
3 Nozgani vo Munangiska: Asani tawona pagilasi, vingaŵa umampha cha kuleka kuchitapu kanthu asani tikhumbika kunozga malu nganyaki. Tingachita umampha kupempha Yehova kuti watiwovyi kujisanda mwambula kubisa ndipu pavuli paki watiwovyi kuti tisinthi. (Sumu 139:23, 24; Luka 11:13) Chifukwa chakuti nyengu yo yajaku njimana ndipu umoyu widu ukwaskika, titenere cha kuzeleza kuti tisinthi.—1 Ŵakor. 7:29; 1 Tim. 4:16.
4. Nchinthu wuli cho chichitika asani munthu walereska mu Mazu ngaku Chiuta ndipu pavuli paki wachitapu kanthu pa vo wawona?
4 Chakukhumbika ukongwa ndi mo tiliri mukati mwidu kuluska mo tiwoneke kubwalu chifukwa ndimu Yehova wawona. (1 Pet. 3:3, 4) Nchinthu wuli cho chichitika asani munthu walereska mu Mazu ngaku Chiuta ndipu pavuli paki wachitapu kanthu pa vo wawona? Iyu ‘watuŵa wakuvwa wachiruwa cha kweni wakuchita mlimu, . . . mwenuyu waŵengi wamwaŵi mu kachitidu kaki.’ (Yak. 1:25) Mwaviyo, tiŵengi ndi likondwa ndipuso tipharazgengi mwakuko mtima chifukwa “tithoŵa [tilongo] uli ndi mu kayilole [gilasi] unkhankhu wa Mbuya.”—2 Ŵakor. 3:18.