Vyaka 100 vo Taja Tichipharazga Ufumu!

1. Kumbi ŵanthu aku Yehova anguchiskika kuchitanji vyaka pafupifupi 100 vajumpha?

¹ “Awonani, Fumu yiwusa! Imwi ndimwi mutenere kupharazga zaku iyu. Mwaviyo, pharazgani, pharazgani, pharazgani za Fumu ndi ufumu waki.” Mubali Rutherford ndiyu wangukamba mazu yanga pafupifupi vyaka 100 vajumpha ndipu ŵanthu aku Yehova anguchiskika kupharazga uthenga wa Ufumu pacharu chosi. Venivi ndivu nadi tachita! Nge mo anguchitiya Akhristu a mu nyengu ya akutumika, tapharazga uthenga wamampha wa Ufumu “mu ulengi wosi wa pasi pa kuchanya.” (Ŵakol. 1:23) Asani tikumbuka vo vachitika mu vyaka 100, kumbi tachitanji pa nkhani yakupharazga Ufumu waku Chiuta? Kumbi tingachita wuli kuti tilutirizgi kupharazga Ufumu, po we pafupi kukwanisa vyaka 100 kutuliya po ukujalikiskikiya?

2. Kumbi magazini ngidu ngakonkhoskanji za Ufumu waku Chiuta?

² Vo Tachita Kuvuli: Kwa vyaka vinandi magazini ngidu ngaja ngachikonkhoska za Ufumu waku Chiuta. Kwambiya mu 1939 magazini yidu yingwamba kudanika kuti: Chigongwi cha Alinda Chakupharazga Ufumu Waku Yehova. Kanandi magazini iyi yikonkhoska Ufumu ndi vo uchitengi. Magazini ya Galamukani! nayu yilongo kuti Ufumu waku Chiuta ndiwu wija wo wazamumalisa masuzgu ngo ŵanthu akumana nangu. Ndichu chifukwa chaki magazini yanga ngafwatulika ndi kupharazgika ukongwa kujumpha magazini ngosi pacharu chapasi!—Chiv. 14:6.

3. Kumbi ndi nthowa zinyaki nizi zo tagwiriskiya nchitu pakupharazga Ufumu?

³ Ŵanthu aku Yehova agwiriskiya nchitu nthowa zakupambanapambana kuti apharazgi Ufumu. Kali tagwiriskiyanga nchitu magalimotu ngo ngenga ndi vakukweze mazu, wayilesi ndi magiramafoni. Nthowa izi zinguwovya kuti uthenga wamampha ufikiyi ŵanthu anandi pa nyengu yo kwenga apharazgi a Ufumu amanavi. (Sumu 19:4) Mu vyaka va pambula kuswera yapa, tayamba kupharazga uthenga wa Ufumu pa Webusayiti yidu ya jw.org, vo vawovya kuti uthenga wenuwu ufikiyi ŵanthu mamiliyoni nganandi chinanga ndi muvyaru vo nchitu yidu yikanizgika.

4. Kumbi ndi nthowa zapade nizi zakupharazgiya zo tigwiriskiya nchitu?

⁴ Ŵanthu aku Yehova agwiriskiya so nchitu nthowa zapade zakupharazgiya uthenga wa Ufumu. Mwakuyeruzgiyapu, kwambiya m’ma 1990 kusazgiyapu pa kupharazga kunyumba ndi nyumba tinguyesesa kwamba kupharazga kumalu ngo ŵanthu achezgiyaku, kwakumika magalimotu ndipuso malu ngakuguliskiyaku vinthu. Pambula kuswera yapa, tanozga nthowa yapade yakupharazgiya mumisumba yikulu mo musanirika ŵanthu anandi pacharu chosi chapasi. Ndipuso mipingu yinandi yipharazga ko kwe ŵanthu anandi muchigaŵa chawu mwakugwiriskiya nchitu mathebulu ndi mashelufu nga matayala ngo atingaŵika pamalu ngo pajumpha ŵanthu anandi. Chinanga kuti ve viyo, kupharazga kunyumba ndi nyumba ndi nthowa yidu yikulu yakupharazgiya Ufumu.—Mac. 20:20.

5. Kumbi tiŵengi ndi mwaŵi wakuchitanji m’chaka chifya cha uteŵeti?

⁵ Vo Tichitengi Kunthazi: Kwambiya mu September, cho nchaka chifya cha uteŵeti, anandi ayambengi upayiniya wa nyengu zosi. Kumbi namwi mungayamba? Asani mungatondeka kuchita viyo, muchitengi upayiniya wakovya pafupipafupi. Kaya muchita upayiniya pamwenga cha, Yehova wakutumbikeningi asani muchitengi vo mungafiska kuti mugwireku nchitu yakupharazga Ufumu.—Mal. 3:10.

6. Nchifukwa wuli mwezi wa October 2014 wazamukuŵa wapade?

⁶ Mu October 2014, Ufumu ukwanisengi vyaka 100 kutuliya po ukujalikiskikiya. Ndichu chifukwa chaki nkhani za m’magazini ngidu ngo ngatuwa pambula kuswera yapa zakonkhoskanga Ufumu waku Chiuta. Mwaviyo, yesesani kuchita phamphu kuti mupharazgiyi ŵanthu anandi za Ufumu wenuwu. Po tilindizga vo vichitikengi munthazi, tiyeni tosi tilutirizgi ‘kugozga [kumemeza] Ufumu waku Chiuta’ ku ŵanthu wo avwisiyengi.—Mac. 8:12.