August Ndi Mwezi wa Nchitu Yapade!
Kapepala Kasonu Kazamugaŵika Pacharu Chosi
1. Kumbi ndi nchitu wuli yo yigwirikengi pacharu chosi Ufumu waku Chiuta uchikwaniska vyaka 100?
1 Titenere kutumbika Yehova mwakugwira nchitu yapade, chifukwa Ufumu waki pambula kuswera yapa ukwaniskengi vyaka 100 kutuliya po ukwambiya kuwusa! Mu August tigwirengi nchitu yo yichitikengi pacharu chosi yakugaŵiya kapepala kamutu wakuti, Kumbi ndi Nunkhu ko Tingasaniya Kwamuka kwa Mafumbu ngo Ngatitisuzga pa Umoyu Widu? Kapepala yaka kachiska ŵanthu kuti apejengi kwamuka m’Bayibolo ndipuso kakonkhoska mo Webusayiti ya jw.org yingaŵawovye.
2. Kumbi tingachita wuli kuti ‘tizikamburizgi ndi chiwawa chikuru, chakutumbika Yehova’ cho chazamuchitika mu August?
2 Chiwawa Chikulu Chakutumbika Chiuta: Pe mwaŵi wapade kwaku wo akhumba kuchita upayiniya wakovya m’mwezi wa August. Apharazgi akubatizika wo akhumba kuchita upayiniya wakovya m’mwezi uwu angapereka maola 30. Apharazgi wo agwira nchitu zakulembeka pamwenga wo asambira sukulu angafiska kuchita upayiniya wakovya m’mwezi uwu, chifukwa we ndi mazuŵa 5 nga Chinkhondi, Chisulu kweniso Sabata. Asani mwe ndi sambiru lakuluta panthazi pamwenga mwana yo ngwakwenere kuja mpharazgi, kambiskanani ndi wakukumaniska nchitu za wupu wa ŵara mwaliŵiliŵi. Chingaja chinthu chakukondweska ukongwa kuti ŵanthu ŵenaŵa aziyambi kupharazga nasi pa nyengu ya nchitu yapade yeniyi! Chinanga kuti apayiniya a nyengu zosi anandi atanja kupumuwa m’mwezi wa August asani akwanisa maola ngo akhumbika kupereka pachaka, kweni angachita umampha kusintha ndondomeku yawu kuti azigwireku nchitu yapade yeniyi. Iyi ndiyu nyengu yamampha yakuti mabanja ngakambiskani mo ‘ngazamukamburizgiya ndi chiwawa chikuru, chakutumbika Yehova’ cho chazamuchitika mu August.—Ezra 3:11; Nthanthi 15:22.
3. Kumbi tigomezga kuti nchinthu wuli cho tifiskengi pa nchitu iyi?
3 Chinanga kuti tagwirapu nchitu zange izi kuvuli uku, kweni tigomezga kuti iyi yiŵengi yapade ukongwa. Kumbi tingafiska kusazgiyaku chiŵerengeru cha maola, apharazgi kweniso apayiniya akovya m’mwezi wa August? Yehova watumbiki phamphu la ŵanthu ŵaki pacharu chosi pa nchitu yikulu yeniyi m’mwezi wa August, tichimalizga chaka cha uteŵeti cha 2014!—Mat. 24:14.