Kumbi Mungazichita Upayiniya Wakovya?
1. Nchifukwa wuli nyengu ya Chikumbusku njamampha kuchita upayiniya?
1 Nyengu ya Chikumbusku njamampha ukongwa kuchita upayiniya. Ndi nyengu yo tikumbuka chanju chikulu cho Yehova wakutilongo pakutipaska Mwana waki nge sembi. (Yoh. 3:16) Tiwonga ukongwa chifukwa cha Sembi yo Yehova wakutipaska, ndipu ivi vititiwovya kuti tilutirizgi kukambiyaku anyidu vakukwaskana ndi iyu. (Yes. 12:4, 5; Luka 6:45) Pa nyengu iyi, tigaŵiya so timapepala takudaniya anyidu ndi ŵanthu a m’chigaŵa chidu ku Chikumbusku. Asani Chikumbusku chajumphapu titesesa kwende ŵanthu wo anguza ku Chikumbusku kuti linweka lawu lilutiriyi. Kumbi imwi mungazisazgiyaku uteŵeti winu mwakuchita upayiniya mu March, April, pamwenga mu May?
2. Nchifukwa wuli mwezi wa March ngwamampha ukongwa kuchita upayiniya wakovya?
2 Mwezi wa March Ngwapade Ukongwa: Mwezi wa March wazamuja wamampha ukongwa kuzichita upayiniya. Munthu wangasankha kuzichita upayiniya wa maora 30 pamwenga 50. Asani wakuwonere dera wazamucheze mpingu winu mu mwezi wa March, wosi wo azamuchita upayiniya wakovya kwali wa maora 30 pamwenga 50, ŵe ndi mwaŵi wakuzijapu pa unganu wosi wa apayiniya wo wakuwonere dera wachita ndi apayiniya anyengu zosi. Nchitu yakugaŵiya timapepala takudaniya ŵanthu ku Chikumbusku cho chazamuchitika pa Chiŵi, March 26, 2013, yazamukwamba pa March 1. Kweniso mwezi wa March we ndi masabata 5. Mwaviyo, mungachita umampha ukongwa kuyirombe nkhani iyi kuti namwi muzichiteku upayiniya mu mwezi wa wapade uwu.
3. Kumbi tingachita wuli kuti tizisazgiyeku uteŵeti?
3 Nozgekani Kweche Sonu: Mungachita umampha ukongwa kuwona mo vinthu viliri pa umoyu winu kuti munozgeke kuzichita upayiniya. Pa nyengu ya Kusopa kwa Pabanja, mabanja ngangachita umampha ukongwa kupangana ndi kukambiskana vilatu vo vingawovya kweniso kupanga ndondomeku yo angazigwiriskiya nchitu. (Nthanthi 15:22) Asani mungafiska cha kuzichita upayiniya mungadandawulanga cha, chifukwa mukhoza kuzisazgiyaku ŵaka nyengu yo mupharazgiya. Mukhoza so kusazgiyaku zuŵa linyaki lakuserere mu uteŵeti.
4. Kumbi ndi vitumbiku wuli vo tazamukondwa navu asani tingazisazgiyaku uteŵeti mu March, April ndi May?
4 Asani tingazisazgiyaku uteŵeti mu myezi ya March, April, ndi May, tazamuja ndi likondwa likulu kweniso tazamukhorwa ukongwa chifukwa chakuteŵete Yehova ndipuso kovya ŵanthu. (Yoh. 4:34; Mac. 20:35) Kweni chinthu chakuzirwa nchakuti Yehova wazamukondwa nasi ukongwa.—Nthanthi 27:11.