Nyengu ya Chikumbusku Yititipaska Mwaŵi Wakusazgiyaku Vakuchita!
1. Kumbi ndi vifukwa nivi vo vingatichitiska kuŵanaŵana kuti tisazgiyeku uteŵeti widu mu mwezi wa March, April ndi May?
1 Kumbi mungasazgiyaku vo muchita mu uteŵeti wakumunda pa nyengu ya chikumbusku yo yituza. Muvigaŵa vinandi, nyengu yitanja kuja yamampha kweni so msana utuŵa utali. Apharazgi anyaki wo agwira nchitu pamwenga wo ŵe pa sukulu azamuja paholide ndipu azamugwiriskiya nchitu nyengu yawu mu uteŵeti. Kwambiya pa 2 April, tazamuja ndi nchitu yapade yakudaniya ŵanthu ku Chikumbusku cho chazamuchitika pa 17 April. Pavuli paki, tazamuyesesa kukuzga linweka la ŵanthu wo angusanirika pa Chikumbusku ndi kuŵadaniya ku nkhani yapade yo yazamukambika pa 25 April. Te ndi vifukwa vinandi vakuŵanaŵaniya kuti tisazgiyeku vakuchita vidu mu myezi ya March, April ndi May.
2. Kumbi nthowa yamampha ukongwa yakusazgiyaku uteŵeti ndi niyi?
2 Upayiniya Wakovya: Nthowa yamampha ukongwa yakuchitiya vinandi nkhuchita upayiniya wakovya. Chifukwa chakuti tosi titagwanika, tikhumbika kunozgeke limu ndi kusintha vinthu vo tingakhumbika kusintha. (Ntha. 21:5) Nyengu zinyaki mungakhoza kulekeza dankha vakuchitika vinyaki vambula kukhumbika vo muchita nyengu zosi. (Ŵafi. 1:9-11) Mungachita umampha kukambiyaku so anyinu mu mpingu maŵanaŵanu nginu ngakuti mukhumba kuchita upayiniya kuti muwoni asani nawu angachitiya namwi limoza.
3. Kumbi mabanja nganganozgeke wuli kuti ngachiti vinandi?
3 Pa nyengu ya Kusopa kwa Pabanja kwa sabata ya mawa, mungachita umampha kuzikambiskana vilatu vinu nge banja. (Ntha. 15:22) Asani mungakolerana mu banja linu, anyaki angachita upayiniya wakovya kwa mwezi umoza pamwenga kujumpha. Kumbi mungachita wuli asani muwona kuti mungafiska cha? Banja linu likhoza kukambirana kuti mosi musazgiyeku vakuchita mu uteŵeti mwa kupharazga mazulu pamwenga kupharazga nyengu yitali pa Chisulu ndi pa Sabata.
4. Kumbi tingasaniya vitumbiku wuli asani tingasazgiyaku uteŵeti widu mu nyengu ya Chikumbusku?
4 Yehova wawona vosi vo tichita pakukhumba kumuteŵete ndipu walumba kujipereka kwidu. (Ŵahe. 6:10) Tija ndi likondwa chifukwa chakupaska Yehova ndi anyidu. (1 Miko. 29:9; Machi. 20:35) Kumbi mungasazgiyaku cha uteŵeti winu pa nyengu ya Chikumbusku kuti musaniyi likondwa linandi ndi vitumbiku?