Vo Mungachita Kuti Muzikondwi M’nyengu ya Chikumbusku
1. Kumbi mungachita wuli kuti muzikondwi m’nyengu ya Chikumbusku?
1 Kumbi mukhumba kuti muzikondwi m’mwezi wa March, April, ndi May? Asani ndi viyo, muzisazgiyeku nyengu yo mupharazgiya ndipu asani mungazifiska, muzichiti upayiniya wakovya. Kumbi kuchita viyo kungawovya wuli kuti muzikondwi?
2. Kumbi kupharazga ukongwa kungatiwovya wuli kuti tikondwengi ndi uteŵeti?
2 Sazgiyaniku Likondwa Linu: Yehova wakutilenga kuti tikondwengi kweniso tikhorwengi chifukwa chakuti titimusopa ndipuso tisambira vinandi vakukwaskana ndi iyu. (Mat. 5:3) Wakutilenga so kuti tikondwengi chifukwa chakupaska. (Mac. 20:35) Asani tipharazga, tisopa Chiuta kweniso titovya ŵanthu. Mwaviyo, mphakuvwika kukamba kuti asani tipharazga ukongwa, tikondwa ukongwa kweniso tisazgiyaku lusu lidu. Lusu lititiwovya kuti tipharazgengi mwachiganga kweniso kuti timalisengi mantha. Lititiwovya so kuti tipharazgiyengi ŵanthu anandi kweniso kwambisa masambiru nga Bayibolo. Vosi ivi vititiwovya kuti tikondwengi ndi uteŵeti.
3. Nchifukwa wuli myezi ya March ndi April yazamuja yamampha ukongwa kuchita upayiniya wakovya?
3 Myezi ya March ndi April yazamuja yamampha ukongwa kuchita upayiniya wakovya chifukwa tazamusankha kuchita upayiniya wa maora 30 pamwenga 50. Kweniso kwambiya pa Chisulu, March 22 mpaka pa zuŵa la Chikumbusku pa Mande April 14, tazamugwira nchitu yakukondweska yakudaniya ŵanthu ku Chikumbusku. Mipingu yazamukondwa ukongwa chifukwa apharazgi anandi azamugwira nchitu iyi “ndi mtima umoza,” kuti azimalizi vigaŵa vawu pa nyengu yaki.—Zef. 3:9.
4. Kumbi titenere kuchitanji kuti tizichiti upayiniya wakovya?
4 Nozgekiyani Limu: Asani mwechendanozgeke limu, wonani so vo muchita ndi kuwona vo mungasintha ndi chilatu chakuti muzisazgiyeku nyengu yakupharazgiya kwa mwezi umoza pamwenga yinandi. Rombani kwaku Yehova kuti wakuwovyeni. (Yak. 1:5) Kambiskanani ndi banja linu kweniso ŵanthu anyaki mumpingu. (Nthanthi 15:22) Chinanga kuti mutama pamwenga mutangwamika ukongwa ndi nchitu, namwi so mungazikondwa ukongwa chifukwa chakuchita upayiniya wakovya.
5. Nchinthu wuli chazamuchitika asani tingazisazgiyaku uteŵeti m’nyengu ya Chikumbusku?
5 Yehova wakhumba kuti ateŵeti ŵaki akondwengi. (Sumu 32:11) Asani tingazisazgiyaku uteŵeti m’nyengu ya Chikumbusku, tazamukondwa ukongwa kweniso tazamukondweska Awuskefwi akuchanya.—Nthanthi 23:24; 27:11.