Tumbikani Yehova Mwakusazgiyaku Uteŵeti Winu
1. Kumbi ndi mwaŵi wuli wo utiwovyengi kutumbika Yehova?
1 Kwambiya mwezi wa March chaka chinu apharazgi akupaskika mwaŵi wakuti achitengi upayiniya wakovya wa maora 30 mu mwezi wa March ndi April, kweniso m’mwezi wewosi wo wakuwonere dera wacheziyengi mpingu wawu. Asani madeti nga sabata yo wakuwonere dera wacheze mpingu winu ngafika m’mwezi unyaki, apharazgi wo akhumba kuchita upayiniya wakovya wa maora 30, angasankhapu mwezi umoza. Apayiniya wosi angasanirikapu pa unganu wosi wo wakuwonere dera wachitengi ndi apayiniya anyengu zosi ndipuso apayiniya apade. Ivi ving’anamuwa kuti asani tingafiska cha upayiniya wakovya wa maora 50, tikhoza kutumbika mbwenu Yehova mwakuchita upayiniya wa maora 30, kanayi pachaka.—Sumu 109:30; 119:171.
2. Kumbi apayiniya akovya akondwengi ndi vinthu wuli panyengu yo wakuwonere dera wacheze mpingu wawu?
2 Asani Wakuwonere Dera Wacheze Mpingu Winu: Sonu anandi achitengi upayiniya wakovya m’nyengu yo wakuwonere dera wacheziyengi mpingu wawu ndipuso akondwengi ndi kuchiskika chifukwa chakugwiriya nayu nchitu limoza mu uteŵeti. (Ŵar. 1:11, 12) Apayiniya akovya wo agwira nchitu mkati mwa sabata angamupempha kuti ayende nayu limoza mu uteŵeti pa Chisulu pamwenga pa Sabata. Anandi akhoza kupemphe limu ku nchitu kwawu kuti aziyende nayu limoza. Kweniso viŵengi vakukondweska ukongwa kuti apayiniya akovya asanirikengepu pa unganu wo wakuwonere dera wachita ndi apayiniya anyengu zosi.
3. Nchifukwa wuli nyengu ya Chikumbusku njamampha ukongwa kuchita upayiniya wakovya?
3 Mu March ndi April: Wo anguchitapu upayiniya wakovya wa maora 30 kwa mwezi umoza m’nyengu ya Chikumbusku kuvuli uku, sonu akhoza kusazgiyaku kupereka ‘sembi yakuthamika’ Chiuta. (Ŵah. 13:15) March ndipuso April ndi myezi yamampha ukongwa kusazgiyaku uteŵeti widu, chifukwa m’nyengu iyi chaka chechosi tituŵa ndi mwaŵi wakudaniya ŵanthu ku Chikumbusku. Tituŵa so ndi mwaŵi wakugwira nchitu limoza ndi apharazgi akupambanapambana chifukwa chakuti abali ndi azichi anandi asazgiyaku uteŵeti wawu m’nyengu yeniyi. Asani Chikumbusku chakapu, titiŵayende akunweka wo anguza kuzivwisiya nkhani ya pade. Tiyeni tiyesesi kugwiriskiya nchitu mwazeru mwaŵi wasonu uwu, mwakuchitaku upayiniya wakovya!—Luka 6:45.