Kuchitiska Masambiru nga Bayibolo Mwalusu
1. Kumbi ndi udindu wuli wo apharazgi wo achitiska masambiru nga Bayibolo ŵe nawu?
1 Palivi yo wangateŵete Chiuta kwambula kuti Yehova ‘wamuguza.’ (Yoh. 6:44) Chinanga kuti ve viyo, apharazgi wo achitiska masambiru nga Bayibolo atenere kwesesa kovya ŵanthu kuti aje pa ubwezi ndi Awiskewu a kuchanya. (Yak. 4:8) Kuti ivi vichitiki, yiwu akhumbika kunozgeke. Kuŵerenga ŵaka ndimi ndi kufumba mafumbu nkhwakukwana cha kuti tiwovyi ŵanthu wo tisambira nawu Bayibolo kuvwisa vo asambira ndipuso kuluta panthazi.
2. Kumbi mpharazgi wakhumbika kuchitanji kuti yo wasambira nayu Bayibolo waluti panthazi?
2 Kuti apharazgi awovyi akusambira ŵawu kuluta panthazi, akhumbika kuŵawovya (1) kuvwisa vo Bayibolo likamba, (2) kuvizomereza ndipuso (3) kuvigwiriskiya nchitu. (Yoh. 3:16; 17:3; Yak. 2:26) Pangato myezi yinandi kuti wakusambira wachiti venivi. Kweni vosi venivi vakukhumbika ukongwa kuti waje paubwezi ndi Yehova ndipuso kuti wajipatuliyi kwaku iyu.
3. Nchifukwa wuli apharazgi alusu afumba mafumbu ngakovya kuziŵa vo munthu waŵanaŵana?
3 Kumbi Wakusambira Bayibolo Waŵanaŵananji?: Kuti tiziŵi asani munthu yo tisambira nayu Bayibolo wavwisa ndipuso wakoliyana ndi vo wasambira, tikhumbika cha kulongoro tija fundu zosi kweni timuchiskengi kuti nayu wakonkhoskengi vo wavwa. (Yak. 1:19) Kumbi wavwisa vo Bayibolo likamba pa nkhani yo mukambiskana? Kumbi wangakonkhoska nkhani yo kwambula kuyiŵerenga? Kumbi vo wasambira vitimukwaska wuli? Kumbi wagomezga kuti vo Bayibolo likamba vauneneska? (1 Ŵat. 2:13) Kumbi waziŵa kuti vo wasambira vitenere kusintha mo wachitiya vinthu pa umoyu waki? (Ŵakol. 3:10) Kuti tiziŵi kwamuka kwa mafumbu ngenanga, tikhumbika kumufumba mafumbu ngo ngangatiwovya kuziŵa maŵanaŵanu ngaki ndipu asani wamuka, tivwisiyengi.—Mat. 16:13-16.
4. Kumbi tikhumbika kuchitanji asani wakusambira watondeka kuvwisa pamwenga kugwiriskiya nchitu vo wasambizika kutuliya m’Bayibolo?
4 Nyengu zinandi vito nyengu yitali kuti munthu wasinthi kaŵanaŵaniru ndipuso mijalidu yo wakuwa nayu. (2 Ŵakor. 10:5) Nchinthu wuli cho tingachita asani munthu yo tisambira nayu wachita cha vo wasambira pamwenga kukoliyana navu? Tikhumbika kuzizipizga kuti pajumphi nyengu kuti Mazu ngaku Chiuta ndipuso mzimu wakupaturika visinthi mtima waki. (1 Ŵakor. 3:6, 7; Ŵah. 4:12) Asani wakusambira watondeka kuvwisa fundu yinyaki ya m’Bayibolo, mbumampha kuluta pa nkhani yinyaki m’malu mwakumuchichizga kuti wasinthi. Asani tilutirizga kumusambiza mwakuzizipizga kweniso mwachanju kutuliya m’Bayibolo, mukuluta kwa nyengu wangasintha.