Mo Tingasazgiyaku Lusu Lidu mu Uteŵeti—Kupharazga Kunyumba zo ze ndi Intakomu Pamwenga zo Akaniza Kusereku Bweka

Nchifukwa Wuli Nkhwakukhumbika?: Tiziŵa kuti nkhwakusuzga kupharazga kunyumba zo akaniza kusereku bweka pamwenga kugwiriskiya nchitu intakomu (foni ya pabwalu pa nyumba). Kweni kupharazga mwakugwiriskiya nchitu intakomu, foni pamwenga kalata kungatiwovya kuti tifikiyi ŵanthu anyaki ndi uthenga wamamapha. (Ŵar. 10:14) Sonu tingachita wuli kuti tileki kuchita mantha? Vo vinguchitikiya Akhristu anyaki vilongo kuti nthowa iyi njakovya. (Wonani Buku Lapachaka la 2011, peji 65-66, ndipuso la 2000, peji 54, ndimi 3.) Tiyeni tiwoni masachizgu ngo nge mumphata.

Mo Mungachitiya:

Nozgekiyani mwakulembe limu vo mungakambiya mweneku wa nyumba pa foni ya m’manja pamwenga pa intakomu. Ivi vingakuwovyani kuti muleki kuchita mantha. Chakwamba, mukambiyeni mweneku wa nyumba vo mwapukwa. Mungagwiriskiya nchitu zina laki asani mutiliziŵa. Pakumaliya, musiliyeni kapepala pamwenga magazini ngo ngangamuwovya.
Chitani vinthu mwaubwezi. Mumwemwetiyengi pakulongoro nge kuti mutimuwona munthu yo mukambiskana nayu.
Mulongorongi mwakuvwika umampha kweniso mwakuzikira. Mungasiskanga pamwenga kukweza ukongwa cha mazu. Mungagotangagotanga cha pamwenga kuthaŵiriya pakuŵereŵeta.
Muchitengi vinthu mwazeru. Nyumba zikuluzikulu zingaŵa ndi ma intakomu nganandi. Mwaviyo, mungasankhapu ŵaka ngatatu pamwenga kujumpha, ndipu mutenere kukumbuka po mwalekeze. Ŵeneku anyumba angayamba kutikayikiya asani titendatenda ŵaka po pe intakomu.

Yesani Kuchita ivi Mwezi Wunu:

Pa kusopa kwa pabanja, yeseriyani mo mungapharazgiya pa intakomu ndipu pakuyesere weyosi wangalereskananga cha ndi yo wakambiskana nayu.