Wovyani Achibulumutiya Kuti Aziŵi Yehova

1. Kumbi Yesu wanguŵalongo wuli lisungu ŵanthu achibulumutiya?

¹ Kunguja mazuŵa ngamanavi kuti Yesu wabayiki. Pa nyengu yo watuwanga ku Yeriko, ŵanthu ŵaŵi achibulumutiya angumupempha kuti: “Ambuya tichitiyeni lisungu!” Chinanga kuti wangusuzgika maŵanaŵanu chifukwa cha masuzgu ngo wenga pafupi kukumana nangu, kweni wanguma, wanguŵadana ndipu wanguŵachizga. (Mat. 20:29-34) Yesu wanguchitiya lisungu ŵanthu achibulumutiya. Kumbi isi tingamuyezga wuli?

2. Kumbi tingachita wuli kuti tipharazgiyi munthu wachibulumutiya?

² Muŵawovyengi: Asani mwakumana ndi wachibulumutiya, mutawuzgeni ndi kumukambiya zina linu. Pavuli paki, muwovyeni. Nyengu zinyaki ŵanthu achibulumutiya angakukayikiyani chifukwa chakuti kanandi ŵanthu atiŵachitiya nkhaza. Kweni wangakukayikiyani cha asani mungachita nayu vinthu mwachanju kweniso asani mwalongo kuti mukhumba nadi kumuwovya. Mutenere so kuziŵa kuti ŵanthu achibulumutiya apambanapambana. Ivi vingachitiska kuti muŵawovyi mwakwenere. Asani mwamuwovya, mukambiyeni kuti mupharazga uthenga wamampha wa m’Bayibolu. Mupempheni kuti mumuŵerenge lemba la Sumu 146:8 pamwenga Yesaya 35:5, 6. Asani wakuziŵa kuŵerenga mabuku nga ŵanthu achibulumutiya, mufumbeni asani wangayanja kuti mumupaski buku lo lingamuwovya kuti wasambiri vinandi va m’Bayibolu. Kweniso mungamuwovya kukopa nkhani zakuvwisiya pa jw.org/tog. Asani we ndi kompyuta yo yiŵerenga vo valembeka pasikirini, mungamuwovya kuti wasaniyi nkhani zo ze pa jw.org/tog.—Wonani kabokosi kakuti, “Vo Mungachita Asani Mutovya Wachibulumutiya . . . ”

3. Kumbi tingafufuza wuli ŵanthu achibulumutiya m’chigaŵa chidu?

³ Fufuzani Ŵanthu Achibulumutiya: Ŵanthu achibulumutiya afwatuka cha kulongoro ndi ŵanthu bweka. Ivi vichitiska kuti tileki kuja ndi mwaŵi wakulongoro nawu asani tipharazga nyumba ndi nyumba. Mwaviyo, tikhumbika kuyesesa “kufufuza” ŵanthu achibulumutiya kuti tiŵapharazgiyi. (Mat. 10:11) Kumbi mwe ndi munyinu wachibulumutiya yo musambira nayu sukulu pamwenga kugwira nayu ntchitu? Yambani imwi kulongoro nayu. Asani m’chigaŵa chinu mwe sukulu ya ŵanthu achibulumutiya, mungaŵapaskaku mabuku ngidu nga ŵanthu achibulumutiya kuti akaŵiki pa layibulare yawu. Kumbi pe banja linyaki lo muziŵa kuti pe munthu wachibulumutiya? Kumbi m’chigaŵa chinu mwe wupu unyaki wo utovya ŵanthu achibulumutiya? Asani ndi viyo, kambiskanani ndi ŵanthu wo atiŵawovya kuti ndimwi Akaboni aku Yehova ndipu mukhumbisiska kuwovya ŵanthu achibulumutiya. Akambiyeni kuti mukhumba kuza ndi nkhani zakuvwisiya ndipuso mabuku nga ŵanthu achibulumutiya. Alongoni layizgu la m’Bayibolu lakuti Chiuta wazamuchizga wosi achibulumutiya kuti aziyambi so kuwona. Asani vingachitika, mungaŵalongo so vidiyo ya pa jw.org yamutu wakuti, “Without It, I Would Feel Lost,” yo yilongo munthu munyaki wachibulumutiya yo wakonkhoska mo wayanduliya ndi Bayibolu la ŵanthu achibulumutiya. Kukonkhoska umampha chifukwa cho mwaziya kungawovya kuti akuzomerezgeni kukumana ndi ŵanthu achibulumutiya.

4. Kumbi tisambiranjipu pa vo vinguchitikiya Janet?

⁴ Mzichi munyaki wachibulumutiya, zina laki Janet, wanguluta ko kuja ŵanthu achibulumutiya. Iyu wangwamba kukambiskana ndi msungwana. Janet wangumukambiya kuti, “Yesu wanguchizga ŵanthu achibulumutiya kuti walongo vo wazamuchitiya ŵanthu achibulumutiya.” Iyu wangumuŵerenge lemba la Chivumbuzi 21:3, 4, ndipu wangumukonkhoske mo Ufumu waku Chiuta wazamufiskiya layizgu lenili. Msungwana uyu wanguja dankha cheti ndipu pavuli paki wangukamba kuti: “Nkhakwamba kuvwa munthu wachibulumutiya munyangu walongoro fundu iyi. Ŵanthu anandi akamba kuti ŵanthu aja achibulumutiya chifukwa cha vo yiwu pamwenga apapi ŵawu akuchita.” Janet wangumulembe meseji ya kumukambiya malu ngo wangakopapu buku la Kumbi Bayibolo Lisambizanji Weniukongwa? Ndipu sonu wasambira nayu Bayibolu kaŵi pa sabata.

5. Kumbi tingayanduwa wuli asani tingachitiya lisungu ŵanthu achibulumutiya?

⁵ Chinanga kuti isi tingachizga cha ŵanthu achibulumutiya nge po Yesu wanguchitiya, kweni tingawovya ŵanthu wo maŵanaŵanu ngawu ngabulumutizika ndi Satana kweniso wo mbachibulumutiya nadi kuti aziŵi uneneska wa m’Mazu Ngaku Chiuta. (2 Ŵakor. 4:4) Yesu wanguchizga anthurumi ŵaŵi pafupi ndi Yeriko, chifukwa wanguŵachitiya “lisungu.” (Mat. 20:34) Asani nasi tichitiya lisungu ŵanthu achibulumutiya tingaŵawovya kuti aziŵi Yehova yo wazamuchizga achibulumutiya kwamuyaya.