Mo Mlengi Watitikambiya Malayizgu Ngaki

Kutuliya po ŵanthu angulengeke, Mlengi widu waja wachikambiskana ndi ŵanthu kuziya mwa angelu ndipuso achimi. Kweniso wangusankha kuti uthenga waki ndi vitumbiku vo wakulayizga vilembeki. Chiuta watitilayizga kuti tazamukondwa ukongwa kunthazi. Kweni kumbi tingangasaniya pani malayizgu ngaku Chiuta?

Uthenga wo Chiuta watitikambiya usanirika mu Malemba Ngakupaturika. (2 Timote 3:16) Kumbi Chiuta wanguŵagwiriskiya wuli ntchitu achimi kuti alembi uthenga waki? (2 Peturo 1:21) Chiuta wanguŵika maŵanaŵanu ngaki mumitima ya ŵanthu wo alembanga ndipu angulemba nadi maŵanaŵanu ngaki. Venivi ndivu so vichitika mazuŵa nganu. Asani munthu wa bizinesi wakambiya mlembi waki kuti walembi uthenga unyaki, taŵanthu tiwona kuti mweneku wa bizinesi ndiyu walemba uthenga. Mwakuyanana waka Chiuta wangugwiriskiya ntchitu ŵanthu kuti alembi uthenga waki kweni iyu ndiyu Mlembi chayiyu wa Uthenga Wakupaturika.

MAZU NGAKU CHIUTA NGASANIRIKA PACHARU CHOSI CHAPASI

Uthenga wakutuliya kwaku Chiuta ngwakukhumbika ukongwa. Mwaviyo, iyu wakhumba kuti ŵanthu wosi awuŵerengengi ndi kuwuvwisa. Mazuŵa nganu “uthenga wamampha wamuyaya” usanirika “ku mtundu wewosi, fuku lelosi ndipuso chineneru chechosi.” (Chivumbuzi 14:6) Chiuta watitumbika ukongwa taŵanthu, chifukwa buku laki la Malemba Ngakupaturika lisanirika muvineneru vakujumpha 3,000. Buku ili ndakuwanda ukongwa pacharu chosi chapasi kuluska buku linyaki lelosi ndipu lisanirika losi lamphumphu pamwenga kachigaŵa kaki.