Bayibolu​—Kumbi ‘Likulembeka Nadi Mwakulongozgeka ndi Chiuta’?

KUMBI mugomezga kuti Bayibolu likutuliya nadi kwaku Chiuta? Pamwenga muwona kuti ndi buku lo mwe maŵanaŵanu nga ŵanthu?

Ŵanthu anandi kusazgapu wo akamba kuti mbakhristu, ŵeche kususkana pa nkhani yeniyi. Mwakuyeruzgiyapu, kafukufuku yo wanguchitika mu 2014, ku United States, wangulongo kuti Akhristu anandi anguzomereza kuti “Bayibolu ndakutuliya kwaku Chiuta.” Kweni pa kafukufuku mwenuyu, munthu yumoza pa ŵanthu 5 angukamba kuti Bayibolu ndi “buku la nthanu waka, la mbiri yakali kweniso ndi buku la marangu ngo ngakulembeka ndi ŵanthu.” Venivi vititipangisa kujifumba kuti, kumbi Bayibolu ‘likumbeka nadi mwakulongozgeka ndi Chiuta’?—2 Timote 3:16.

KUMBI MAZU NGAKUTI ‘LIKULEMBEKA MWAKULONGOZGEKA’ NGANG’ANAMUWANJI?

Bayibolu le ndi mabuku ngamanangamana ngakukwana 66. Mabuku ngenanga ngakulembeka ndi ŵanthu pafupifupi 40, kwa vyaka pafupifupi 1,600. Asani Bayibolu likumbeka ndi ŵanthu, nanga ntchifukwa wuli likambika kuti ‘likulembeka mwakulongozgeka ndi Chiuta’? Mazu ngakuti ‘likulembeka mwakulongozgeka ndi Chiuta,’ ngang’anamuwa kuti uthenga wo we m’Bayibolu ukutuliya kwaku Chiuta. Bayibolu likamba kuti: “Ŵanthu angulongoro mazu ngakutuliya kwaku Chiuta mwakulongozeka ndi mzimu wakupaturika.” (2 Petro 1:21) Tingakamba kuti Chiuta wangugwirisiya ntchitu mzimu wakupaturika wo ndi nthazi yaki yambula kuwoneka kuti wapereki uthenga ku ŵanthu wo alembanga Bayibolu. Ivi vingayanana waka ndi bwana yo watuma mlembi waki kuti wamulembe kalata. Iyu wakambiya mlembi mazu ngakuti walembi. Mweneku wa kalata iyi ndi bwana chifukwa fundu zo ze mukalata zaki, za mlembi cha.

Kumbi Chiuta waŵakambiyanga wuli ŵanthu ŵenaŵa uthenga wakuti alembi? Anyaki waŵakambiyanga mwakugwirisiya ntchitu angelu. Anyaki waŵalongonga viwona. Anyaki waŵakambiyanga kuziya mumalotu. Nyengu zinyaki Chiuta waŵazomerezanga kuti alembi uthenga waki mumazu ngawu. Kweni nyengu zinyaki waŵakambiyanga mazu chayingu ngakuti alembi. Chinanga kuti Chiuta wangugwirisiya ntchitu nthowa zakupambanapambana, ŵanthu wo akulemba Bayibolu akulemba maŵanaŵanu ngawu cha kweni ngaku Chiuta.

Kumbi tingasimikiza wuli kuti ŵanthu wo akulemba Bayibolu akulilemba mwakulongozgeka ndi Chiuta? Wonani maukaboni ngatatu ngo ngasimikiziya fundu yeniyi.