TICHITENGI VINTHU NGE AKHRISTU

Kupharazga Ndipuso Kusambiza Kutovya Ukongwa Kuti Ŵanthu Aje Akusambira

Yesu wangukambiya akusambira ŵaki kuti aluti kuchisambiza ŵanthu kuti aje akusambira. (Mate. 28:19) Ivi ving’anamuwa kupharazga ndipuso kusambiza. Nyengu zosi titenere kujifumba kuti, ‘Kumbi ndingachita wuli kuti ndipharazgengi ndi kusambiza umampha?’

KUPHARAZGA

Mumalu mwakulindiza kuti ŵanthu ndiwu achitengi kuza kwaku isi, isi ndisi titenere kupenja wo ‘mbakwenere.’ (Mate. 10:11) Asani te mu uteŵeti, kumbi tiyesesa kugwiriskiya ntchitu mpata wewosi wo ungasanirika kuti tikambiskani ndi ŵanthu wo ‘taŵasaniya’? (Machi. 17:17) Lidiya wanguja wakusambira chifukwa chakuti Paulo wenga waphamphu pa ntchitu yakupharazga.—Machi. 16:13-15.

Samuel watimugaŵiya magazini Ezekiel; Solomon ndi Mary apharazgiya Ezekiel ndi Abigail — “Mija mbewu yaku ndi mlenji, ndipu ungapumuzganga cha janja laku mpaka mazulu” (Waku. 11:6)

WONERIYANI VIDIYO YAKUTI LUTIRIZGANI KUPHARAZGA ‘KWAMBULA KULEKEZA’—MWAMWAŴI KWENISO NYUMBA NDI NYUMBA, PAVULI PAKI MUKANI MAFUMBU YANGA:

Kumbi Samuel wangulongo wuli kuti wakhumbisiskanga kupanda mbewu za uneneska nyengu zosi?
Ntchifukwa wuli tikhumbika kukunthiyapu asani tipharazga?
Kumbi mbanthu naŵa wo mungaŵakambiyaku uthenga wa Ufumu?

KUSAMBIZA

Kuti tipangi akusambira, tikhumbika kuŵasiriya waka mabuku pe cha ŵanthu. Kuti tiŵawovyi kuti aje pa ubwezi wakukho ndi Yehova, tikhumbika kuweliyaku ndi kuchitiska masambiru nga Bayibolu. (1 Akori. 3:6-9) Kweni wuli asani tiyesesa kusambiza ŵanthu uneneska wa Ufumu kweni asintha cha? (Mate. 13:19-22) Tikhumbika kulutirizga mbwenu kufufuza ŵanthu amtima wa nge “dongu lamampha.”—Mate. 13:23; Machi. 13:48.

Solomon ndi Mary asambira Bayibolu ndi Ezekiel ndi Abigail; Ezekiel ndi Abigail apharazga mumalu ngo musanirika ŵanthu anandi — “Ini ndingupanda, Apolo wangudiriya, kweni Chiuta ndiyu wakuzganga” (1 Akori. 3:6)

WONERIYANI VIDIYO YAKUTI LUTIRIZGANI KUPHARAZGA ‘KWAMBULA KULEKEZA’—KUMALU NGO KUSANIRIKA ŴANTHU ANANDI KWENISO KUSAMBIZA ŴANTHU, PAVULI PAKI MUKANI MAFUMBU YANGA:

Kumbi Solomon ndi Mary angudiriya wuli mbewu za uneneska mumtima waku Ezekiel ndi Abigail?
Kumbi titenere kuja ndi chilatu wuli mu uteŵeti, kusazgapu asani tipharazga kumalu ngo kusanirika ŵanthu anandi?
Kumbi tingachita wuli kuti tiŵikiyengepu mtima ukongwa pa ntchitu yakusambiza ŵanthu uneneska?