“Paulo Wanguwonga Chiuta Ndipu Wanguchiskika”

Mpingu wa ku Roma wati wavwa kuti Paulo watuza, abali anyaki angutumika kuti akakumani nayu panthowa ndipu angwenda mtunda wa makilomita 64. Kumbi Paulo wangukwaskika wuli ndi chanju cho ŵanthu yaŵa angumulongo? Bayibolu likamba kuti: “Paulo wati waŵawona, wanguwonga Chiuta ndipu wanguchiskika.” (Machi. 28:15) Chinanga kuti Paulo waziŵikanga kuti ndiyu wachiskanga mipingu yo wayendiyanga, kweni pa nyengu iyi po wangumangika, iyu ndiyu wanguchiskika ukongwa.​—2 Akori. 13:10.

Mazuŵa nganu napu, akuwonere madera atende mipingu yakupambanapambana kuti achiski abali ndi azichi. Nge mo viŵiya ndi ŵanthu wosi aku Chiuta, nyengu zinyaki nawu avuka, afipa mtima kweniso akumana ndi vinthu vakuguŵiska. Asani wakuwonere dera ndi muwolu waki ŵaza mumpingu winu, kumbi mungachita wuli kuti achiskiki kweniso kuti ‘muchiskani’?​—Aro. 1:11, 12.

• 

  Musanirikengi pa maunganu ngakunozgeke uteŵeti. Wakuwonere dera wachiskika ukongwa asani apharazgi atijipereka ndi mtima wosi pa sabata yapade. (1 Ate. 1:2, 3; 2:20) Vingaja umampha ukongwa kuchitaku upayiniya wakovya mumwezi wo wazamucheze mpingu winu. Mungayende limoza mu uteŵeti ndi wakuwonere dera pamwenga muwolu waki. Mungaluta so nawu ku sambiru linu. Yiwu akondwa ukongwa kupharazga ndi ŵanthu akupambanapambana, kaya ndi wo abatizika waka sonu pamwenga wo atijiwona kuti atondeka kupharazga mwalusu.

• 

  Muŵalondiyengi. Kumbi mungayanja kuti azigonengi kunyumba kwinu pamwenga kuŵadana kuti aziryi kwinu chakurya? Venivi vingalongo kuti mutiŵayanja ukongwa. Yiwu akhumbika kuŵanozge vinthu vakudula pe cha.​—Luka 10:38-42.

• 

  Muvwiyengi ulongozgi wo wakuwonere dera wapereka ndipu muwugwiriskiyengi ntchitu. Wakuwonere dera watitiwovya mwachanju kuti tiziŵi vo tingachita kuti titeŵetiyengi umampha Yehova. Nyengu zinyaki wangatichenya. (1 Akori. 5:1-5) Wakuwonere dera wakondwa ukongwa asani tivwiya ulongozgi wo wapereka.​—Ahe. 13:17.

• 

  Muŵawongengi. Mungachita umampha kukambiya wakuwonere dera ndi muwolu waki mo phamphu lawu lakuwovyiyani. Mungachita venivi mwakuŵakambiya pamasu ndi pamasu pamwenga kuŵalembe meseji.—Ako. 3:15.