Achinyamata Jani “Aphamphu pa Ntchitu Zamampha”

Mukalata yo Paulo wangulembe Tito wangukamba kuti achinyamata kusazgapu iyu Tito, akhumbika kuchita vosi vo angafiska kuti aje “chakuwoniyapu pa ntchitu zamampha mu nthowa yeyosi.” (Tito 2:6, 7) Muchaputala chenichi, Paulo wangulongo so kuti Yesu watowesa ŵanthu aku Yehova kuti aje “aphamphu pa ntchitu zamampha.” (Tito 2:14) Ntchitu yakupharazga ndi kusambiza va Ufumu waku Chiuta njimoza mwa ntchitu zamampha zo Paulo wakambanga. Asani ndimwi wachinyamata, kumbi vingaŵa umampha cha kuchita upayiniya wakovya pamwenga wa nyengu zosi mweche ndi nthazi?—Nthanthi 20:29.

Asani mukhumbisiska kuchita upayiniya, wonani vo mungachita kuti mufiski vo mukhumba. (Luka 14:28-30) Mwakuyeruzgiyapu, kumbi mwazamuchita wuli kuti muzisaniyengi ndalama zo zingazikuwovyani pakuchita uteŵeti wa nyengu zosi? Kumbi mwazamuchita wuli kuti muzifiskengi maola ngo ngakhumbika? Mungachita umampha kumukambiya Yehova kuti wakuwovyeni. (Sumu 37:5) Kambiskanani ndi apapi ŵinu kweniso ŵanthu anyaki wo achita upayiniya. Pavuli paki chitanipu kanthu kuti mufiski vo mukhumba. Kukamba uneneska, Yehova watumbikengi phamphu linu pa nyengu yo mutimuteŵete.

WONERIYANI VIDIYO YAKUTI ACHINYAMATA WO ATUMBIKA YEHOVA, PAVULI PAKI MUKANI MAFUMBU YANGA:

• Kumbi ndi masuzgu wuli ngo anyaki amalanapu nangu kuti ayambi upayiniya, nanga anguchita wuli?

• Kumbi apapi angaŵawovya wuli ŵana ŵawu kuti ayambi upayiniya wa nyengu zosi?

• Ntchifukwa wuli mbumampha kulemba ndondomeku yakupharazgiya?

• Kumbi abali ndi azichi mumpingu angaŵachiska wuli apayiniya?

• Kumbi wo achita upayiniya atumbikika wuli?