Kumbi Tingagwiriskiya Wuli Ntchitu Masachizu nga mo Tingakambiskiyana ndi Ŵanthu?

Kwambiya mu January 2018, mukabuku ka Unganu wa Umoyu Widu Wachikhristu Ndipuso Uteŵeti musanirika masachizu nga mo tingakambiskiyana ndi ŵanthu. Kumbi masachizu yanga tingangagwiriskiya wuli ntchitu?

Asani Mukamba Nkhani ya Wakusambira: Mugwiriskiyengi ntchitu mafumbu, lemba kweniso fumbu la ulendu wakuweliyaku. Kweni ivi ving’anamuwa kuti mukambengi ndendende nge mo alongolore mu vidiyo cha. Mungasankha mwija nthowa yakupharazgiya, mazu ngakwamba, kweniso fundu zinyaki zo mungakonkhoska. Mungagaŵiya buku lelosi lo le pa mundandanda wa Vidya vo Tigwiriskiya Ntchitu Pakusambiza chinanga kuti pa ulongozgi akambapu cha kuti mugaŵiyi buku wuli.

Asani te mu Uteŵeti: Masachizu nga mo tingakambiskiyana ndi ŵanthu ngakunozgeka kuti ngatiwovyengi kusaniya fundu zakuti tikambi. Asani munthu walongo linweka ndipu wakhumba kuziŵa vinandi mungalutirizga kukambiskana nayu mwakugwiriskiya ntchitu masachizgu ngo nge pa ulendu wakuweliyaku. Mungasintha fundu zinyaki pa masachizu nga mo mungakambiskiyana ndi ŵanthu pamwenga mungagwiriskiya ntchitu fundu zo muwona kuti zingawovya. Kumbi nkhani pamwenga lemba lo mungugwiriskiya ntchitu mwezi wamala vinguwovya ŵanthu muchigaŵa chinu? Kumbi ŵanthu muchigaŵa chinu akondwa kuvwa nkhani yo yachitika waka pamwenga akondwa kuvwa nkhani zo zichitika muchigaŵa chawu? Kwali mungagwiriskiya ntchitu masachizu nga mo mungakambiskiyana ndi ŵanthu mwakupambana ndi mo ngakulembeke kweni mutenere kuja ndi chilatu chakuti muchitengi ‘vinthu vosi chifukwa cha uthenga wamampha, kuti mugaŵiyeku ŵanthu anyaki.’​—1 Akori. 9:22, 23.