Ntchifukwa Wuli Ŵanthu Atinkhana Ukongwa?

Kumbi Kutinkhana Kung’anamuwanji?

Kutinkhana nkhuleka kwanja ukongwa munthu munyaki pamwenga gulu linyaki la ŵanthu. Nkhukwiyiya ŵaka munthu kwanyengu yimanavi cha.

CHIFUKWA CHO ŴANTHU ATAMBIYA KUTINKHANA

Ŵanthu atamba kutinkha anyawu pa vifukwa vinandi. Kanandi ŵanthu atinkha anyawu chifukwa cha vo achita cha, kweni chifukwa cha mtundu wawu. Yiwu angaŵawona kuti mbaheni, akhumba kuŵapweteka pamwenga angasintha cha kuja ŵanthu amampha. Angaŵawona nge kuti mbakumaliyapu, mbakofya pamwenga atambisa masuzgu. Ŵanthu wo atinkhika angasuzgika ndi nkhaza, vinthu vambula urunji pamwenga vinthu vinyaki vo vichitiska kuti kutinkhana kume msisi.

MO KUWANDIYA

Munthu wangatinkha ŵanthu anyaki chinanga kuti wendakumanepu nawu. Mwakuyeruzgiyapu, munthu wangatinkha gulu linyaki la ŵanthu chifukwa chakuti ŵanthu a mubanja laki pamwenga mabwezi ngaki, nawu atilitinkha. Mwaviyo, kutinkhana kungawanda mwambula kusuzga.

Kuziŵa mo jalidu la kutinkhana liwandiya mwambula kusuzga, kutitiwovya kuziŵa chifukwa cho ŵanthu anandi atinkhiya anyawu. Kweni pe chifukwa chinyaki cho ŵanthu atinkhiyana ukongwa pacharu. Kuti tisaniyi chifukwa chaki, tikhumbika kuziŵa mo jalidu la kutinkhana likwambiya. Bayibolu livumbuwa venivi.

BAYIBOLU LIVUMBUWA MO KUTINKHANA KUKWAMBIYA

KUTINKHANA KUNGWAMBA NDI ŴANTHU CHA. Kungwamba pa nyengu yo mungelu munyaki wangugarukiya Chiuta kuchanya ndipu pavuli paki wangwamba kudanika kuti Satana Dyaboli. Dyaboli “wenga wakubaya ŵanthu kwamba” po wangugarukiya. Chifukwa chakuti “ngwaboza ndipuso ndi wisi wa boza,” iyu wachiska kutinkhana ndipuso wachitiska kuti ŵanthu achitiyanengi nkhaza. (Yohane 8:44; 1 Yohane 3:11, 12) Bayibolu litimukonkhoska kuti ngwakunanga mbiri ya ŵanthu, mukali ndipuso ngwankhaza.—Yobu 2:7; Chivumbuzi 12:9, 12, 17.

NTCHIPUSU ŴANTHU AMBULA KUFIKAPU KUTINKHANA. Munthu wakwamba Adamu, wangulondo nthowa yiheni yaku Satana. Mwaviyo, ŵanthu wosi akuhara ubudi kweniso kuleka kufikapu. (Aroma 5:12) Kayini mwana wakwamba waku Adamu, wangubaya mvurwa waki Abelu chifukwa chakuti wamutinkhanga. (1 Yohane 3:12) Mbuneneska kuti ŵanthu anandi alutirizga kulongo chanju kweniso lisungu. Kweni chifukwa chakuti tikuhara ubudi, ŵanthu anandi alongo jalidu la mbunu, bina, kweniso kujikuzga. Ndipu mijalidu yeniyi ndiyu yitambisa kutinkhana.—2 Timote 3:1-5.

ŴANTHU ATINKHANA UKONGWA CHIFUKWA CHAKULEKA KUZOMEREZA KUTI TIPAMBANA. Tija mucharu cho chichitiska kuti ŵanthu atinkhanengi, mwakuchiska jalidu lambula lisungu kweniso nkhaza. Kuŵavi chanju, sankhu, kunyozana ndipuso kunanga vinthu, vichitika chifukwa chakuti “charu chosi che mu nthazi ya muheni,” Satana Dyaboli.—1 Yohane 5 :19.

Kweni Bayibolu likamba vinandi kuluska kuvumbuwa ŵaka mo kutinkhana kukwambiya. Likamba so mo kutinkhana kungamaliya.