Ntchifukwa Wuli Ŵanthu Atinkhana Ukongwa?—Kumbi Bayibolu Likambanji?

Nkhani zinandi zikamba za ŵanthu wo akamba mazu ngaheni, achita vachiwawa, kusankhana mitundu kweniso nkhondu.

Nyuzipepala ya The New York Times ya 15 November, 2023 yingukamba kuti: “Kuziya pamalu ngakucheziyapu nga pa intaneti, mazuŵa nganu ŵanthu akamba mazu ngaheni chifukwa cha nkhondu ya pakati pa charu cha Israel ndi Gaza kweniso chifukwa cha ŵanthu wo achiska viwawa ndipuso kutinkhana.”
Pa 3 November 2023, Dennis Francis yo ndi pulezidenti wa wupu wa United Nations General Assembly wangukamba kuti: “Kwambiya pa 7 October, ŵanthu akamba mazu ngaheni ukongwa kweniso achita vinthu va chiwawa ukongwa chifukwa cha kusankhana mitundu.”

Vachilendu cha kuvwa mazu ngaheni, vachiwawa kweniso nkhondu. Ndipu Bayibolu likonkhoska za ŵanthu a munyengu yakali wo “[aponyanga] mazu ngawu ngankhaza nge mo aponye mivi” kweniso wo achiskanga nkhondu kweniso chiwawa. (Salimo 64:3; 120:7; 140:1) Kweni Bayibolu likonkhoska kuti kutinkhana ko kulipu mazuŵa nganu kung’anamuwa vinthu vinyaki vakukhumbika.

Kutinkhana ntchisimikizu cha mazuŵa ngakumaliya

Bayibolu likamba vifukwa viŵi vo vichitiska kuti ŵanthu atinkhanengi ukongwa mazuŵa nganu.

1. Likukambiya limu va nyengu yo “chanju cha anandi chazamuzizira.” (Mateyu 24:12) Mumalu mwakuti ŵanthu ayanjanengi, achita vinthu vo vichitiska kuti atinkhanengi.—2 Timote 3:1-5.
2. Mazuŵa nganu, ŵanthu atinkhana ukongwa chifukwa chakuti Satana Dyaboli ndiyu wachitiska vinthu viheni kweniso kuti ajengi ndi mtima wakukhumba kupweteka anyawu. Bayibolu likamba kuti “charu chosi che mu nthazi ya muheni yo.”—1 Yohane 5:19; Chivumbuzi 12:9, 12.

Kweni Bayibolu likamba so kuti pambula kuswera Chiuta wazamutuzgapu vo vichitiska kuti ŵanthu atinkhanengi. Kusazgiyapu yapa, wazamutuzgapu masuzgu ngosi ngo ngatuza chifukwa cha kutinkhana. Bayibolu lilayizga kuti:

Chiuta “wazamuleska masozi ngosi mumasu mwawu, ndipu nyifwa yazamuŵaku so cha. Kwazamuŵavi kuliya, kukuta pamwenga urwirwi. Vinthu vakali vatuwapu.”—Chivumbuzi 21:4.