Vo Akuŵerenga Afumba

Asani Mkhristu wapata muwolu waki pa vifukwa vambula kukoliyana ndi Malemba ndipu watorana ndi munthu munyaki, kumbi mpingu utenere kuyiwona wuli nthengwa yakali kweniso yasonu?

Asani vaŵa viyo, mpingu utenere kuwona kuti nthengwa yakali yikumala pa nyengu yo munthulumi wangutole so munthukazi munyaki ndipu nthengwa yasonu, utenere kuyiwona kuti njakuzomerezeka. Kuti tivwisi vifukwa vo tikambiya viyo, tiyeni tiwoni vo Yesu wangukamba pa nkhani ya kupatana ndipuso kuto pamwenga kuyirwa so.

Pa Mateyu 19:9, Yesu wangukamba chifukwa chimoza pe cha mu Malemba cho chingachitiska kuti nthengwa yimali. Iyu wangukamba kuti: “Weyosi yo wapata muwolu waki kwambula kuti wachita ureŵi, ndipu wato munthukazi munyaki, wachita chigololu.” Pa vo Yesu wangukamba tisambira (1) kuti ureŵi ndichu chifukwa chija cha mu Malemba cho chingachitiska kuti nthengwa yimali ndipuso (2) kuti munthulumi yo wapata muwolu waki kwambula chifukwa cha mu Malemba ndipu wato munthukazi munyaki, wachita chigololu.a

Kumbi mazu ngaku Yesu ngang’anamuwa kuti munthulumi yo wachita ureŵi ndi kupata muwolu waki, ngwakuzomerezeka mwa Malemba kuto so munthukazi munyaki? Awa. Asani munthulumi wachita chigololu mu banja, munthukazi yo ngwambula kunanga, wangasankha kumugowoke mulumu waki pamwenga cha. Asani munthukazi wakana kumugowoke ndipu apatana mwadangu, wosi ŵaŵi mbakufwatuka kutorana so ndi munthu munyaki asani ndondomeku yosi yakupatana yachitika.

Nyengu zinyaki vingachitika kuti munthukazi yo ngwambula kunanga wakhumba kuti nthengwa yingamalanga cha ndipu wakhumbisiska kumugowoke mulumu waki. Kweni wuli asani munthulumi yo wachita chigololu wakana kuti muwolu waki wamugowoke ndipu yija wachito chikalata chakumalisiya nthengwa? Chifukwa chakuti munthukazi wakhumbisiska kumugowoke munthulumi ndi kulutirizga kuja nayu pa nthengwa, mwa Malemba munthulumi yo walivi wanangwa wakuto so munthukazi munyaki. Asani munthulumi walutirizga kuchita vinthu mwakupambana ndi malemba ndipu wato so munthukazi munyaki po walivi wanangwa wakuchitiya viyo, ndi kuti wachita so chigololu. Venivi vingachitiska kuti wakumani so ndi komiti ya kuyeruzga milandu.—1 Akori. 5:1, 2; 6:9, 10.

Asani munthulumi yo walivi wanangwa wa mu Malemba wato so, kumbi mpingu utenere kuyiwona wuli nthengwa yakali kweniso yasonu? Kumbi nthengwa yakali yeche ŵaka mwakukoliyana ndi vo Malemba ngakamba? Kumbi munthukazi wambula kunanga wangamugowoke mbwenu mulumu waki wakali pamwenga cha? Kumbi mpingu utenere kuwona kuti nthengwa yasonu nja chigololu?

Kali mpingu wawonanga kuti nthengwa yasonu nja chigololu asani munthukazi wakali weche wamoyu, wechendayirwi kweniso asani wakuchita ureŵi cha. Kweni Yesu wanguzumbuwapu cha va munthukazi wambula kunanga pa nyengu yo wakambanga nkhani yakupatana kweniso kuto so. Mumalu mwaki, wangukonkhoska kuti munthulumi yo wapata muwolu waki kwambula chifukwa cha mu Malemba ndipu pavuli paki wato so munthukazi munyaki, wachita chigololu. Asani vaŵa viyo, kupatana kweniso kuto so, ko Yesu wangukamba kuti kuyanana ŵaka ndi kuchita chigololu, vichitiska kuti nthengwa yakali yimali.

Asani munthulumi wapata muwolu waki ndi kuto so, vingachitika cha kuti muwolu waki wakali yo ngwambula kunanga wamugowoke pamwenga cha. Mwaviyo, munthukazi yo wangasuzgikanga cha kuja ndi maŵanaŵanu ngakuti wamugowoke pamwenga cha. Ndipuso mo mpingu utenere kuwone nthengwa yasonu, vithemba cha pa fundu yakuti munthukazi wambula kunanga, wafwi pe, wayirwi so pamwenga wachiti ureŵi.b

Mu chakuyeruzgiyapu cho takambiskana pachanya yapa, munthulumi wanguchita chigololu, vo vinguchitiska kuti nthengwa yimali. Ntchinthu wuli chingachitika asani munthulumi wachita chigololu cha, kweni wapata muwolu waki ndipu pavuli paki wato so? Pamwenga wuli asani munthulumi wachita ureŵi cha wechendapati muwolu waki kweni wachita venivi wati wamupata ndipu pavuli paki wato munthukazi munyaki chinanga kuti muwolu waki wakali wakhumbisiska kumugowoke? Mu vakuyeruzgiyapu vosi venivi, chipata ndipuso kuto so, ko nkhuchita chigololu, vichitiska kuti nthengwa yakali yimali. Nthengwa yasonu njakuzomerezeka mwadangu. Chigongwi cha Mlinda cha November 15, 1979, peji 32, chingukamba kuti: “Sonu, munthulumi wayamba nthengwa yasonu ndipu wangayimalisa waka bweka cha ndi kuweriyana so ndi muwolu waki wakali. Nthengwa yakali yikumala chifukwa cha kumupata, chigololu kweniso kuto so.”

Kusintha kwenuku kung’anamuwa cha kuti Mkhristu waŵanaŵanengi kuti nthengwa njambula kupaturika pamwenga kuti chigololu mbubudi umana. Munthulumi yo wapata muwolu waki pa vifukwa vambula kukoliyana ndi Malemba ndipu wato so munthukazi munyaki penipo walivi wanangwa wa mu Malemba wakuchita viyo, wangakumana ndi komiti ya kuyeruzga mulandu chifukwa chakuti wachita chigololu. (Asani nthengwa yasonu watorana ndi mzichi Wachikhristu, mzichi mwenuyu nayu wakumanengi ndi komiti ya kuyeruzga mulandu chifukwa chakuti wachita chigololu.) Chinanga kuti nthengwa yasonu mpingu utenere kuyiwona kuti nja chigololu cha, kweni munthulumi yo wangayenere cha kupaskika mauteŵeti ngapade mumpingu kwa vyaka vinandi kweniso mpaka po ŵanthu aleke kuguŵa nayu chifukwa cha vinthu viheni vo wanguchita kuvuli pamwenga mpaka po ayambiya kumutumbika. Wechendapaskiki uteŵeti wewosi, ŵara atenere kuŵanaŵaniya so mo vinthu viliri ndi muwolu waki wakali yo wangumuchitiya chinyengu kweniso ŵana anamana wo wanguŵajowo ndi iyu.—Mala. 2:14-16.

Chifukwa cha masuzgu ngakulu ngo ngaŵapu asani ŵanthu apatana pa vifukwa vambula kukoliyana ndi malemba ndipuso kuto so, Akhristu atenere kuwona kuti nthengwa njakupaturika nge mo Yehova watiyiwone.—Waku. 5:4, 5; Ahe. 13:4.