NKHANI YAKUSAMBIRA YA NAMBALA 18
SUMU 1 Mijalidu Yaku Yehova
Mugomezgengi ‘Wakweruzga Walisungu wa Charu Chosi Chapasi’!
“Kumbi wakweruzga wa charu chosi chapasi wachitengi vinthu mwaurunji cha?”—GENE. 18:25.
FUNDU YIKULU
Tivwisengi umampha ukongwa lisungu kweniso urunji waku Yehova pa nkhani ya chiyuka cha ŵanthu ambula urunji.
1. Kumbi ndi fundu yakupembuzga niyi yo Yehova wangusambiza Abrahamu?
NYENGU yinyaki Abrahamu wangukambiskana ndi Yehova ndipu vo angukambiskana pa zuŵa lenili, Abrahamu wanguviluwapu cha. Kuziya mwa mungelu, Chiuta wangukambiya Abrahamu kuti wakhumba kunanga matawuni nga Sodomu ndi Gomora. Munthu wakugomezgeka mwenuyu wangusuzgika maŵanaŵanu. Mwakuti wangufumba kuti: “Kumbi munangengi nadi ŵanthu arunji pamoza ndi aheni? . . . Kumbi wakweruzga wa charu chosi chapasi wachitengi vinthu mwaurunji cha?” Mwakuzikira Yehova wangusambiza mubwezi waki Abrahamu fundu yakukhumbika ukongwa yo yititiwovya kweniso kutipembuzga mazuŵa nganu. Fundu yaki njakuti, Chiuta wanangengepu cha ŵanthu arunji.—Gene. 18:23-33.
2. Kumbi ntchinthu wuli cho chisimikiziya kuti Yehova wayeruzga mwaurunji kweniso mwalisungu?
2 Kumbi tingasimikiza wuli kuti Yehova wayeruzga ŵanthu mwaurunji kweniso mwalisungu? Chifukwa tiziŵa kuti “Yehova wawona mumtima” wa munthu. (1 Samu. 16:7) Tingakamba ŵaka kuti, iyu waziŵa “mtima wa munthu weyosi.” (1 Mafu. 8:39; 1 Mbiri 28:9) Venivi wakukondwesa ukongwa. Yehova we ndi zeru ukongwa kuphara isi mwakuti mphakusuzga kuti tivwisi. Ndichu chifukwa chaki pakukamba vakukwaskana ndi Yehova Chiuta, Paulo wakukamba kuti: “Palivi yo wangafiska kufufuza vyeruzgu vaki!”—Aro. 11:33.
3-4. Kumbi nyengu zinyaki tingajifumba mafumbu wuli, nanga tikambiskanengenji mu nkhani iyi? (Yohane 5:28, 29)
3 Isi nasi tingaŵa ndi mafumbu ngakuyanana ndi ngo Abrahamu wenga nangu. Tingajifumba kuti: ‘Kumbi ŵanthu wo Yehova wakuŵananga nge a ku Sodomu ndi Gomora angaziyuskika so? Kumbi vingazichitika kuti nawu so aziyuki pa “chiyuka cha ŵanthu . . . ambula urunji”?’—Machi. 24:15.
4 Tiyeni tikambiskani so vo tiziŵa pa nkhani ya chiyuka. Pambula kuswera yapa, tingusambira kuti pe kusintha pa mo tavwiyanga pa nkhani ya ŵanthu wo “azamuyuka kuti alonde umoyu” ndi wo “azamuyuka kuti ayeruzgiki.”a (Ŵerengani Yohane 5:28, 29.) Kusintha kwenuku kwapangisa kuti paje so kusintha kwakusazgikiyapu ndipu venivi ndivu tikambiskanengi mu nkhani yinu kweniso yakulondopu. Pa nkhani ya mo Yehova wayeruzgiya ŵanthu mwaurunji, tikambiskanengi vo tileka kuziŵa, ndipu pavuli paki tikambiskanengi vo tiziŵa.
VO TILEKA KUZIŴA
5. Kumbi mabuku ngidu kali ngakambanganji va ŵanthu wo Yehova wanguŵananga nge a ku Sodomu ndi Gomora?
5 Kali mabuku ngidu ngakonkhoskanga kuti ŵanthu wo Yehova wakuŵananga, nge ŵanthu a ku Sodomu ndi Gomora azamuyuskika cha. Kweni pavuli pakuyiŵanaŵaniya ndipuso kuyipemphere mwakuphwere nkhani yeniyi, tawona kuti mphakuvwika cha kusimikiza kuti ŵanthu yaŵa azamuyuskika cha. Chifukwa wuli?
6. Kumbi mphanyengu niyi po Yehova wanguyeruzga ŵanthu ambula urunji, nanga ndi vinthu wuli vo tiziŵa cha?
6 Tiyeni tikambiskani mafumbu nganyaki ngakukwaskana ndi nkhani yeniyi. Mu Bayibolu mwe nkhani zinandi zo zilongo mo Yehova wanguyeruzgiya ŵanthu ambula urunji. Mwakuyeruzgiyapu, Yehova wangunanga ŵanthu anandi pa nyengu ya Chigumula kupatuwaku Nowa ndi banja laki. Nyengu yinyaki Yehova wangugwiriskiya ntchitu Ayisirayeli kuti anangi mitundu 7 ya ŵanthu wo ajanga Mucharu Chakulayizgika. Ndipuso Yehova wangugwiriskiya ntchitu mungelu yumoza kuti wabayi asilikali a ku Asiriya akukwana 185,000 usiku umoza pe. (Gene. 7:23; Doto. 7:1-3; Yesa. 37:36, 37) Pa nkhani zenizi, kumbi Bayibolu likamba fundu zakukwana zakusimikiziya kuti Yehova wakuyeruzga kuti ŵanthu wosi ŵenaŵa mbwenu akufwiya limu, ndipu azamuyuskika so cha? Awa, ndi viyo cha. Ntchifukwa wuli tingakamba viyo?
7. Kumbi ndi vinthu wuli vo tiziŵa cha vakukwaskana ndi ŵanthu wo angufwa pa Chigumula kweniso ŵanthu wo angubayika pa nyengu yo Ayisirayeli alondanga charu cha Kanani? (Wonani chithuzi.)
7 Tiziŵa cha mo Yehova wanguyeruzgiya munthu weyosi pakuyija. Kweniso tiziŵa cha asani ŵanthu wo angubayika ŵenga ndi mwaŵi wakusambira vaku Yehova kweniso kulapa. Pakukamba vakukwaskana ndi Chigumula, Bayibolu likamba ŵaka kuti Nowa wenga “mupharazgi wa urunji.” (2 Petu. 2:5) Kweni likambapu cha kuti pa nyengu yo Nowa wakhomiyanga chombu, wangupharazgiya so munthu weyosi pacharu Chigumula chechendazi. Mwakuyanana ŵaka, tiziŵa cha asani mitundu yosi yo yajanga mucharu cha Kanani, yenga ndi mwaŵi wakusambira vaku Yehova kweniso kusintha mijalidu yawu.
Nowa ndi banja laki akhoma chombu. Viziŵika cha asani Nowa wangunozga vakuti wapharazgiyi ŵanthu wosi a nyengu yaki Chigumula chechendachitiki (Wonani ndimi 7)
8. Kumbi ndi vinthu wuli vo tiziŵa cha vakukwaskana ndi ŵanthu a ku Sodomu ndi Gomora?
8 Nanga wuli va ŵanthu wo angubayika pa nyengu yo Yehova wanangiyanga tawuni ya Sodomu ndi Gomora? Loti yo wenga munthu murunji wajanga pakati pa ŵanthu ŵenaŵa ku Sodomu. Kweni kumbi tiziŵa kuti Loti wanguŵapharazgiya wosi? Awa! Wosi achitanga vinthu viheni. Kweni kumbi munthu weyosi pakuyija waziŵanga chamampha ndipuso chiheni? Kumbukani kuti chigulu cha anthulumi chakhumbanga kukolere alendu aku Loti. Bayibolu likamba kuti chigulu cha anthulumi ŵenaŵa, ŵenga “kwambiya anyamata mpaka arara.” (Gene. 19:4; 2 Petu. 2:7) Kumbi tisimikiza kuti Yehova yo ndi Chiuta walisungu, wakuŵabayiya limu wosi mwakuti palivi chinanga njumoza wa ŵanthu ŵenaŵa yo wazamuyuskika? Mbuneneska nadi kuti ŵanthu arunji mu Sodomu akwananga cha 10. (Gene. 18:32) Mwaviyo ŵenga ŵanthu ambula urunji ndipu mphakuvwika kuti Yehova wanguŵabaya chifukwa cha vo achitanga. Kweni kumbi tingasimikiza kuti palivi chinanga njumoza waku yiwu yo wazamuyuskika pa “chiyuka cha ŵanthu . . . ambula urunji”? Awa, tingasimikiza cha venivi!
9. Kumbi ndi vinthu wuli vo tiziŵa cha vakukwaskana ndi Solomoni?
9 Mu Bayibolu mwe so nkhani za ŵanthu arunji wo anguja ambula urunji. Fumu Solomoni wenga yumoza wa ŵanthu ŵenaŵa. Iyu wamuziŵanga umampha Chiuta ndipu Yehova wangumutumbika ukongwa kweni pavuli paki wangwamba kusopa achiuta aboza. Vo wanguchita vingumukwiyisa ukongwa Yehova, ndipu mtundu wosi wa Ayisirayeli ungukumana ndi masuzgu kwa nyengu yitali chifukwa cha maubudi ngaku Solomoni. Kwa vyaka vinandi taŵanaŵananga kuti Solomoni wazamuyuskika. Ve viyo chifukwa Malemba ngakamba kuti Solomoni “wangugona kuti wapumuwi limoza ndi apapi ŵaki akali.” Ndipu venivi ndivu so Bayibolu likamba vakukwaskana ndi anthulumi akugomezgeka nge Fumu Davidi. (1 Mafu. 11:5-9, 43; 2 Mafu. 23:13) Kweni pakuti Bayibolu likamba kuti iyu “wangugona kuti wapumuwi limoza ndi apapi ŵaki akali,” kumbi venivi ving’anamuwa kuti iyu wazamuyuskika? Bayibolu likambapu chechosi cha. Anyaki angaŵanaŵana kuti Solomoni wazamuyuskika chifukwa Bayibolu likamba kuti, “munthu yo wafwa, wafwatulika ku ubudi waki.” (Aro. 6:7) Venivi vauneneska nadi, kweni lemba ili ling’anamuwapu cha kuti wosi wo akufwa azamuyuskika. Ve viyo chifukwa chakuti nyifwa ndi satifiketi cha yakupangisa munthu kuzilonde umoyu wamuyaya. Kweni chiyuka ndi mphasu yakutuliya kwaku Chiuta widu wachanju. Ndipu iyu wapereka mphasu yeniyi ku ŵanthu wo wakhumba kuŵapaska mwaŵi wakuti amuteŵete kwa umoyu wawu wosi. (Yobu 14:13, 14; Yoha. 6:44) Kumbi Solomoni wazamulonde mphasu yeniyi? Yehova ndiyu waziŵa, isi tiziŵa cha. Kweni cho tiziŵa ntchakuti Yehova wazamuchita cho ntchakwenere.
VO TIZIŴA
10. Kumbi Yehova watuvwa wuli pa nkhani ya kunanga ŵanthu? (Ezekiyeli 33:11) (Wonani so chithuzi.)
10 Ŵerengani Ezekiyeli 33:11. Yehova watitikambiya mo iyu wavwiya pa nkhani ya kweruzga ŵanthu. Mwakuyanana ndi vo Ezekiyeli wangulemba, wakutumika Peturo wangukamba kuti: “Yehova . . . wakhumba cha kuti weyosi wanangiki.” (2 Petu. 3:9) Mazu ngenanga ngakuchiska ukongwa, chifukwa tiziŵa kuti Yehova wathaŵiriya cha kunanga ŵanthu aheni, pijapija asani pe chifukwa chakuvwika cha kuchitiya viyo. Iyu ngwalisungu likulu ndipu walongo lisungu lenili asani mphakwenere kuchita viyo.
Pa chiyuka cha ŵanthu ambula urunji, ŵanthu akupambanapambana azamupaskika mwaŵi wakusambira vaku Yehova (Wonani ndimi 10)
11. Kumbi mbayani wo azamuyuskika cha, nanga tiziŵa wuli venivi?
11 Kweni kumbi tiziŵanji vakukwaskana ndi ŵanthu wo azamuyuskika cha? Bayibolu lizumbuwapu vakuwoniyapu vimanavi ŵaka.b Yesu wangulongo kuti Yudasi Isikariyoti wazamuyuskika cha. (Mariko 14:21; Yoha. 17:12)c Yudasi wanguziŵa kuti vo wachita nkhugarukiya Yehova Chiuta kweniso Mwana Waki. Kweni wanguchita mbwenu. (Mariko 3:29)d Mwakuyanana ŵaka Yesu wangukamba kuti alongozgi anyaki avisopa wo amususkanga asani ŵafwa azamuyuskika cha. (Mate. 23:33; Yoha. 19:11) Ndipu wakutumika Paulo wangutcheŵeska kuti ŵanthu ampatuku ambula kulapa, nawu azamuyuskika cha.—Ahe. 6:4-8; 10:29.
12. Kumbi tiziŵanji vakukwaskana ndi lisungu laku Yehova? Kambani vakuwoniyapu.
12 Kweni kumbi tiziŵanji vakukwaskana ndi lisungu laku Yehova? Nanga kumbi iyu walongo wuli kuti “wakhumba cha kuti weyosi wanangiki”? Tiyeni tikambiskani mo iyu wangulongore lisungu ku ŵanthu anyaki wo anguchita maubudi ngakulungakulu. Fumu Davidi yinguchita maubudi ngakulungakulu, nge chigololu kweniso kubaya munthu. Kweni Davidi wangulapa, mwaviyo Yehova wangumuchitiya lisungu ndipu wangumugowoke. (2 Samu. 12:1-13) Fumu Manasi yingupanga vinthu viheni ukongwa ndipu yinguchita venivi kwa nyengu yitali pa umoyu waki. Chinanga kuti vingufika paheni viyo, kweni Yehova wangumulongo lisungu ndipu wangumugowoke chifukwa chakuti wangulapa ndi mtima wosi. (2 Mbiri 33:9-16) Vakuwoniyapu venivi vititikumbusa kuti Yehova walongo lisungu, asani wawona kuti pe chifukwa chakuvwika chakuchitiya viyo. Iyu wazakuŵayuska ŵanthu a nge ŵenaŵa chifukwa chakuti anguziŵa kuti anguchita ubudi ukulu kweniso angulapa.
13. (a) Ntchifukwa wuli Yehova wanguŵalongo lisungu ŵanthu a ku Nineve? (b) Kumbi Yesu wangukambanji vakukwaskana ndi ŵanthu a ku Nineve?
13 Tiziŵa so mo Yehova wangulongore lisungu ku ŵanthu a ku Nineve. Chiuta wangukambiya Yona kuti: “Ndawona vinthu viheni vo ŵanthu achita kweniko.” Kweni ŵati alapa maubudi ngawu, Yehova wanguŵagowoke. Iyu wenga walisungu ukongwa kuphara Yona. Chiuta wangukumbusa mchimi waki yo wangukwiya, kuti ŵanthu a ku Nineve ‘apambanisanga cha pakati pa chamampha ndi chiheni.’ (Yona 1:1, 2; 3:10; 4:9-11) Pati pajumpha nyengu, Yesu wangugwiriskiya ntchitu chakuwoniyapu chenichi kuti wasambizi ŵanthu urunji waku Yehova kweniso lisungu laki. Yesu wangukamba kuti ŵanthu a ku Nineve wo angulapa, “azamuyuka pa nyengu ya cheruzgu.”—Mate. 12:41.
14. Kumbi ndi mwaŵi wuli wo ŵanthu a ku Nineve azamupaskika asani ‘aziyuka kuti ayeruzgiki’?
14 Kweni kumbi ting’anamuwanji asani tikamba kuti “ŵanthu a ku Nineve azamuyuka pa nyengu ya cheruzgu”? Yesu wangukamba kuti kunthazi ŵanthu “azamuyuka kuti ayeruzgiki.” (Yoha. 5:29) Iyu wakambanga za Ulamuliru waki wa Vyaka 1000, pa nyengu yo “ŵanthu arunji ndi ambula urunji” azamuyuskika. (Machi. 24:15) Ŵanthu ambula urunji “azamuyuka kuti ayeruzgiki.” Venivi ving’anamuwa kuti asani ŵanthu ŵenaŵa aziyuskika, Yehova ndi Yesu azamuwona asani mbakuvwiya kweniso agwiriskiya ntchitu vo asambizika. Asani munthu wa ku Nineve waziyuskika ndipu wazikana kusopa Yehova, Yehova wazakumuzomereza cha kuti walutirizgi kuja ndi umoyu. (Yesa. 65:20) Kweni wosi wo azamusankha kusopa Yehova mwakugomezgeka, cheruzgu chawu chazamuja chakukondwesa. Yiwu azamupaskika mwaŵi wakuja ndi umoyu kwamuyaya!—Dani. 12:2.
15. (a) Ntchifukwa wuli tikhumbika cha kukamba kuti pa ŵanthu wosi a ku Sodomu ndi Gomora wo Yehova wanguŵabaya, palivi yo wazamuyuskika? (b) Kumbi lemba la Yuda 7 ling’anamuwanji? (Wonani bokosi lakuti, “Kumbi Yuda Wang’anamuwanganji?”)
15 Pakukamba va ŵanthu a ku Sodomu ndi Gomora Yesu wangukamba kuti azamuyeruzgika umampha “pa Zuŵa la Cheruzgu” kuphara ŵanthu wo angukana iyu kweniso wo angukana vo iyu wasambizanga. (Mate. 10:14, 15; 11:23, 24; Luka 10:12) Kumbi iyu wang’anamuwanganji? Kumbi tingakamba kuti Yesu wagozganga ŵaka wachikamba kuti ŵanthu a mu nyengu yaki ŵenga aheni ukongwa kuphara ŵanthu a ku Sodomu ndi Gomora? Kumbukani kuti Yesu wachikamba kuti ŵanthu a ku Nineve “azamuyuka kuti ayeruzgiki” wakamba ŵaka cha kweni waneneskanga. Venivi ving’anamuwa so kuti pakukamba va ŵanthu a ku Sodomu ndi Gomora napu wakambanga ŵaka cha kweni waneneskanga. “Zuŵa la Cheruzgu” lo Yesu wanguzumbuwa mu nkhani zosi ziŵi izi ndakuyanana ŵaka. Nge ŵanthu a ku Nineve, ŵanthu a ku Sodomu ndi Gomora nawu achitanga vinthu viheni. Kweni ŵanthu a ku Nineve ŵenga ndi mwaŵi wakulapa. Kweniso kumbukani vo Yesu wangukamba vakukwaskana ndi ŵanthu wo “azamuyuka kuti ayeruzgiki.” Yiwu asazgapu so “wo anguchita vinthu viheni.” (Yoha. 5:29) Venivi vilongo kuti pangaŵa chilindizga chakuti ŵanthu anyaki a ku Sodomu ndi Gomora angaziyuskika. Ndipu tingaziŵa ndi mwaŵi wakuziŵasambiza vakukwaskana ndi Yehova kweniso Yesu Khristu.
16. Kumbi Yehova wazamuwonanji kuti waziyuski ŵanthu? (Yeremiya 17:10)
16 Ŵerengani Yeremiya 17:10. Lemba ili lititiwovya kuziŵa fundu iyi yakuti: Nyengu zosi asani Yehova wayeruzga, ‘wafufuza mtima, ndipu wasanda maŵanaŵanu ngamukati.’ Pakukamba za chiyuka cha munthazi iyu ‘wazamupereka mphotu kwaku weyosi mwakukoliyana ndi nthowa zaki.’ Yehova wazamuchita vinthu mwaurunji kweniso mwalisungu asani mphakwenere kuchita viyo. Mwaviyo tikhumbika cha kukamba kuti munthu munyaki wazamuyuskika cha, pijapija asani tiziŵa kuti ndivu Bayibolu likamba.
“WAKWERUZGA WA CHARU CHOSI CHAPASI” WAZAMUCHITA “VINTHU MWAURUNJI”
17. Kumbi ndi vinthu wuli vo vazamuchitikiya ŵanthu wo akufwa?
17 Kutuliya pa nyengu yo Adamu ndi Heva angukoliyana ndi Satana kuti agarukiya Yehova Chiuta, ŵanthu mabiliyoni nganandi atufwa. Nyifwa yo ndi murwani widu wakofya, wapurutuwa ŵanthu anandi. (1 Akori. 15:26) Kumbi ndi vinthu wuli vo vazamuchitikiya ŵanthu wosi ŵenaŵa? Akusambira aku Khristu akugomezgeka amanavi akukwana 144,000, azamulonde umoyu wambula kufwa kuchanya. (Chivu. 14:1) Ndipu anthulumi ndi anthukazi anandi akugomezgeka wo atanja Yehova, azamuja mugulu la “chiyuka cha ŵanthu arunji.” Yiwu azamuja kwamuyaya pacharu chapasi asani azilutirizga kuja arunji mu Ulamuliru Waku Khristu wa Vyaka 1000 kweniso pa nyengu ya kuyeseka kakumaliya. (Dani. 12:13; Ahe. 12:1) Pa nyengu ya Ulamuliru Waku Khristu wa Vyaka 1000, ŵanthu “ambula urunji” kung’anamuwa wo anguteŵetiyapu Yehova cha, wo asazgapu so wo “achitanga vinthu viheni” azamupaskika mwaŵi wakuti asinthi nthowa zawu ndi kuja ateŵeti aku Yehova akugomezgeka. (Luka 23:42, 43) Kweni ŵanthu anyaki achitanga vinthu viheni ukongwa ndipu angusimikiza kugarukiya Yehova. Chifukwa cha venivi Yehova wakusankha kuti azamuyuskika so cha.—Luka 12:4, 5.
18-19. (a) Ntchifukwa wuli tikhumbika kugomezga kuti Yehova wazamuyeruzga mwaurunji ŵanthu akufwa? (Yesaya 55:8, 9) (b) Kumbi tazamusambiranji mu nkhani yakulondopu?
18 Kumbi te ndi vifukwa vakuvwika vakugomezge kuti asani Yehova wayeruzga ŵanthu, nyengu zosi wayeruzga mwaurunji? Hinya! Abrahamu wati wasambira vaku Yehova, wanguvwisa kuti Yehova ngwakufikapu, we ndi zeru ukongwa ndipuso ‘ngwakweruzga walisungu wa charu chosi chapasi.’ Iyu wakusambiza Mwana waki kweniso wakumupaska udindu wakuyeruzga ŵanthu wosi. (Yoha. 5:22) Wosi ŵaŵi, Yehova kweniso Yesu aziŵa vo ve mumtima wa munthu. (Mate. 9:4) Mwaviyo asani ayeruzga munthu nyengu zosi achita “vinthu mwaurunji.”
19 Tiyeni tosi tisimikizi kulutirizga kugomezga ukongwa Yehova kweniso vo iyu wasankha. Tiziŵa kuti isi te akwenere cha kweruzga kweni Iyu ngwakwenere. (Ŵerengani Yesaya 55:8, 9.) Ndichu chifukwa chaki tigomezga Yehova ndipuso Mwana waki, kuti ndiwu ayeruzgengi. Tiziŵa so kuti Fumu yidu Yesu, wazamuyezga mwakufikapu mijalidu ya Awisi nge urunji kweniso lisungu. (Yesa. 11:3, 4) Kweni kumbi Yehova ndipuso Yesu azakuŵayeruzga wuli ŵanthu pa nyengu ya chisuzgu chikulu? Kumbi ndi vinthu wuli vo tileka kuziŵa? Nanga ndi vinthu wuli vo tiziŵa? Nkhani yakulondopu yazamumuka mafumbu ngenanga.
SUMU 57 Tipharazgiya Ŵanthu a Mitundu Yosi
b Pa nkhani yakukwaskana ndi Adamu, Heva kweniso Kayini, wonani Chigongwi cha Mlinda cha Chichewa cha January 1, 2013, peji 12, mazu ngamumphata.
c Mazu ngakuti mwana wa pharanyiku ngo angagwiriskiya ntchitu pa Yohane 17:12, ngang’anamuwa kuti Yudasi wati wafwa, mbwenu kukumala walivi so chilindizga cha kuzija ndi umoyu kunthazi.
d Wonani nkhani ya mutu wakuti “Kodi ndi Tchimo Liti Limene Munthu Sangakhululukidwe?” pa jw.org.