NKHANI YAKUSAMBIRA YA NAMBALA 34
SUMU 107 Yehova Wakutilongo mo Tingalongore Chanju
Mo Ŵara Angamulongore Chanju Kweniso Lisungu Mkhristu yo Wabuda
“Chiuta mwalisungu laki wakhumba kukuwovya kuti ulapi.” —ARO. 2:4.
FUNDU YIKULU
Mo ŵara awovye Mkhristu yo wachita ubudi ukulu.
1. Kumbi ndi vinthu wuli vo vingachitika asani munthu munyaki wachita ubudi ukulu?
MU NKHANI yajumpha, tinguwona vo wakutumika Paulo wangukambiya mpingu wa ku Korinto kuti uchiti, munthu munyaki wati wachita ubudi ukulu. Munthu mwenuyu wangulapa cha, ndipu wangumikika dankha mu mpingu. Kweni lemba lo patuliya mutu wa nkhani iyi, lilongo kuti Chiuta wangawovya munthu yo wachita ubudi ukulu kuti walapi. (Aro. 2:4) Kumbi ŵara angamuwovya wuli munthu yo wabuda kuti walapi?
2-3. Kumbi tikhumbika kuchitanji asani taziŵa kuti Mkhristu munyidu wachita ubudi ukulu, nanga ntchifukwa wuli?
2 Ŵara ŵechendawovyi munthu, akhumbika dankha kuyiziŵa umampha nkhani yo. Kumbi tikhumbika kuchitanji asani taziŵa kuti Mkhristu munyidu wachita ubudi ukulu, vo vingachitiska kuti wamikiki dankha mu mpingu? Tikhumbika kumuchiska kuti waluti ku ŵara kuti akamuwovyi.—Yesa. 1:18; Machi. 20:28; 1 Petu. 5:2.
3 Kweni kumbi tingachita wuli asani munthu yo wachita ubudi wakana kuchikambiya ŵara? Asani vaŵa viyo, mbwenu isi tikaŵakambiyi ŵara kuti munthu yo wawovyeki. Venivi vingalongo kuti titimuyanja chifukwa tiziŵa kuti ŵara angamuwovya. Asani iyu walutirizga kuchita ubudi wo, wangananga ubwezi waki ndi Yehova. Iyu wangananga so mbiri ya mpingu. Chinanga kuti vingaŵa vakusuzga kuchikambiya ŵara, kweni tichita chiganga chifukwa chakuti titanja Yehova kweniso mubali widu yo wachita ubudi ukulu.—Salimo 27:14.
MO ŴARA ATOVYE WO ACHITA UBUDI UKULU
4. Kumbi ŵara akhumbika kuŵa ndi maŵanaŵanu wuli asani akumana ndi munthu yo wachita ubudi ukulu?
4 Asani Mkhristu wachita ubudi ukulu, wupu wa ŵara usankha abali ŵatatu akwenere kuti ateŵete nge komiti ya ŵara.a Ŵara ŵenaŵa akhumbika kuja akujiyuyuwa kweniso ambula kuchita vinthu mwakujumphisa. Chinanga kuti yiwu akhumba kuwovya munthu yo wachita ubudi kuti walapi, kweni aziŵa kuti angamuchichizga cha kuti wasinthi. (Doto. 30:19) Ŵara aziŵa kuti mbanthu wosi cha wo achita ubudi wo angalapa nge mo Fumu Davidi yinguchitiya. (2 Samu. 12:13) Ŵanthu anyaki wo abuda angasankha kuleka kuvwiya ulongozgi waku Yehova. (Gene. 4:6-8) Chinanga vingaŵa viyo, ŵara achita vosi vo angafiska kuwovya munthu yo wachita ubudi kuti walapi. Kumbi ndi fundu nizi zo zitiŵawovya pa nyengu yo akumana ndi munthu yo wachita ubudi ukulu?
5. Kumbi ŵara akhumbika kukumbuka fundu nizi pa nyengu yo akumana ndi munthu yo wachita ubudi ukulu? (2 Timote 2:24-26) (Wonaniso chithuzi.)
5 Ŵara awona kuti munthu yo wachita ubudi ukulu ndi mbereri yakuzirwa yo yalanda. (Luka 15:4, 6) Mwaviyo, asani akumana ndi munthu yo wachita ubudi, alongoro nayu mwaukali cha pamwenga kuchita nayu vinthu mwankhaza. Ŵara akhumbika cha kuchita ŵaka vinthu mwadangu, kung’anamuwa kufumba ŵaka mafumbu kweniso kuziŵa vo vachitika. Mumalu mwaki, alongo mijalidu yo ye pa 2 Timote 2:24-26. (Ŵerengani.) Ŵara alutirizga kuchita vinthu mwakuzika, mwaulemu kweniso mwalisungu kuti amufiki pa mtima munthu yo wachita ubudi.
Nge aliska a viŵetu a mu nyengu yakali, ŵara ayesesa kusaniya mbereri yo yasoŵa (Wonani ndimi 5)
6. Kumbi ŵara anozgekereska wuli mtima wawu ŵechendakumani ndi munthu yo wachita ubudi ukulu? (Aroma 2:4)
6 Ŵara anozgekeresa mitima yawu. Yiwu ayezga Yehova asani awovya munthu yo wachita ubudi ndipu akumbuka mazu ngo Paulo wangukamba ngakuti: “Chiuta mwalisungu laki wakhumba kukuwovya kuti ulapi.” (Ŵerengani Aroma 2:4.) Ŵara akhumbika kukumbuka kuti ntchitu yawu yikulu ukongwa njakuchita uliska mwakulongozgeka ndi Khristu. (Yesa. 11:3, 4; Mate. 18:18-20) Mwaviyo, ŵechendakumani ndi munthu yo wachita ubudi, ŵara apemphera kwaku Yehova kuti akayesesi kuwovya munthu yo kuti walapi. Yiwu afufuza fundu mu Malemba kweniso mumabuku ngidu ndipu apemphera kwaku Yehova kuti waŵawovyi kuvwisa vakukwaskana ndi munthu yo kweniso vo vamuchitikiya. Yiwu aŵanaŵaniya vo akhumbika kuziŵa, kung’anamuwa chechosi chakukwaskana ndi munthu yo kweniso vo vingumuchitikiyapu pa umoyu waki, vo panyaki ndivu vinguchitiska kuti wachiti ubudi wo.—Nthanthi 20:5.
7-8. Kumbi ŵara angachita wuli vinthu mwakuzikira nge Yehova asani akumana ndi munthu yo wachita ubudi ukulu?
7 Ŵara ayezga Yehova pa nkhani ya kuzikira. Yiwu akumbuka mo Yehova wanguchitiya ndi ŵanthu wo angubuda mu nyengu yakali. Mwakuyeruzgiyapu, Yehova wangukambiskana ndi Kayini mwakuzikira ndipu wangumutcheŵesa va masuzgu ngo wakumanengi nangu chifukwa chakuchita ubudi kweniso wangumukambiya kuti wangasintha. (Gene. 4:6, 7) Yehova wangugwiriskiya ntchitu mchimi Natani kuti wawovyi Davidi. Natani wangugwiriskiya ntchitu chakuyeruzgiyapu cho chingumufika pamtima Davidi. (2 Samu. 12:1-7) Ndipu Yehova ‘watumanga’ achimi ŵaki “mwakuwerezawereza” kuti awovyi mtundu wa Isirayeli wo wenga wambula kuvwiya. (Yere. 7:24, 25) Iyu wakhazanga cha kuti ŵanthu ŵaki alapi dankha wechendaŵawovyi. Mumalu mwaki iyu ndiyu wayambanga kuŵachiska kuti alapi.
8 Ŵara ayezga Yehova asani awovya munthu yo wachita ubudi ukulu. Nge mo lemba la 2 Timote 4:2 likambiya, yiwu akambiskana ndi munthu yo wabuda “mwakuzikira ukongwa.” Mwaviyo, nyengu zosi ŵara akhumbika kuchita vinthu mwakuzikira kweniso mwakufwasa, kuti awovyi munthu yo wachita ubudi kuti wasinthi maŵanaŵanu ngaki, ndi kuchita cho ntchakwenere. Asani ŵara achita vinthu mwaukali pamwenga mwabundi, munthu yo wabuda wangavwiya cha ulongozgi wo wapaskika pamwenga wangaŵavi mtima wakulapa.
9-10. Kumbi ŵara angamuwovya wuli munthu kuziŵa kuti wakuchita vinthu viheni?
9 Ŵara ayesesa kuziŵa vo vachitiska kuti Mkhristu wachiti ubudi ukulu. Mwakuyeruzgiyapu, kumbi iyu wangulopwa chifukwa chakuti wanguleka kusambira pakuyija pamwenga kupharazga? Kumbi iyu wanguleka kupemphera kwaku Yehova kaŵikaŵi? Kumbi iyu wanguleka kukana makhumbiru ngaheni? Kumbi iyu wachezanga ndi ŵanthu a mtundu wuli, nanga wasankhanga vakukondwesa va mtundu wuli? Kumbi venivi vingunanga wuli mtima waki? Kumbi iyu waziŵa mo vakusankha kweniso vakuchita vaki vakwaskiya Awisi a Yehova?
10 Ŵara angafumba mafumbu ngo ngangawovya munthu yo wachita ubudi kuti wafwatuki kukonkhoska vo vinguchitiska kuti walopwi ndipu pavuli paki wachiti ubudi. Yiwu achita venivi mwaulemu ndipu afumba cha nkhani zo zileka kuŵakwaska, zo akhumbika cha kuziziŵa. (Nthanthi 20:5) Nge mo Natani wanguchitiya ndi Davidi, yiwu angagwiriskiya ntchitu vakuyeruzgiyapu kuti amuwovyi kuŵanaŵaniyapu kweniso kuwamu kuti wanguchita vinthu viheni. Panyaki achikumana nayu kakwamba, munthu yo wangayamba kujichitiya chitima chifukwa cha vo wanguchita. Ndipu nyengu zinyaki wangalapa pa ulendu wenuwu.
11. Kumbi Yesu wachitanga wuli ndi ŵanthu wo achita ubudi?
11 Ŵara ayesesa kuyezga Yesu. Pa nyengu yo wawovyanga Saulo wa ku Tariso, Yesu wangumufumba fumbu lakovya munthu kuŵanaŵaniyapu lakuti: “Saulo, Saulo, utinditombozgiyanji?” Mwakuchita venivi, Yesu wanguwovya Saulo kuziŵa kuti vo wachitanga venga viheni. (Machi. 9:3-6) Ndipu pa nkhani ya “munthukazi yuwa Yezebeli,” Yesu wangukamba kuti: “Ndingumupaska nyengu yakuti walapi.”—Chivu. 2:20, 21.
12-13. Kumbi ŵara angamupaska wuli nyengu munthu wakubuda kuti walapi? (Wonaniso chithuzi.)
12 Ŵara ayezga Yesu ndipu athaŵiriya cha kuŵanaŵana kuti munthu yo wachita ubudi ukulu wangalapa cha. Anyaki angalapa pa ulendu wakwamba wo akumana ndi komiti ya ŵara penipo anyaki angakhumbika nyengu kuti alapi. Mwaviyo, ŵara anganozga vakuti akumani so ndi munthu yo wabuda maulendu nganandiku. Nyengu zinyaki, Mkhristu yo wabuda wangayamba kuŵanaŵaniyapu vo ŵara angukambiskana nayu pa ulendu wakwamba. Iyu wangajiyuyuwa ndi kupempha Yehova kuti wamugowoke. (Salimo 32:5; 38:18) Venivi vingawovya kuti munthu yo wabuda walongo mtima wakulapa pa ulendu wasonu, kuphara mo wanguchitiya pa ulendu wakwamba.
13 Kuti awovyi munthu yo wabuda kuti walapi, ŵara akhumbika kulongo chanju ndipuso lisungu. Yiwu apemphera kwaku Yehova kuti watumbiki vo atesesa kuchita pakuwovya Mkhristu yo wabuda ndipu akhaza kuti iyu wasinthengi nkharu yaki kweniso walapengi.—2 Timo. 2:25, 26.
Ŵara angakumana ndi munthu yo wachita ubudi maulendu nganandiku, kuti amupaski nyengu yakuti walapi (Wonani ndimi 12)
14. Kumbi ndiyani yo watovya munthu yo wachita ubudi kuti wasinthi, nanga ntchifukwa wuli?
14 Asani munthu wakubuda walapa, vikondwesa ukongwa! (Luka 15:7, 10) Kweni kumbi ndiyani yo watimuwovya ukongwa kuti wasinthi? Kumbi mbara? Kumbukani vo Paulo wangukamba vakukwaskana ndi ŵanthu akubuda. Iyu wanguti: “Panyaki Chiuta wangaŵawovya kuti alapi.” (2 Timo. 2:25) Mwaviyo ndi munthu cha yo wawovya Mkhristu kuti wasinthi maŵanaŵanu kweniso nkharu yaki, kweni ndi Yehova. Paulo wangukonkhoska vinthu vamampha vo vichitika asani munthu walapa. Munthu mwenuyu watiwuziŵa umampha uneneska, wawamu ndi kusintha maŵanaŵanu ngaki ndipu wapona muviŵana vaku Satana.—2 Timo. 2:26.
15. Kumbi ŵara angalutirizga wuli kuwovya munthu wakubuda yo walapa?
15 Asani munthu yo wangubuda walapa, abali wo ŵe mu komiti ya ŵara anganozga kuti ŵara a mukomiti yeniyi pamwenga ŵara anyaki achitengi maulendu nga uliska kuti munthu yo walutirizgi kulimbana ndi viŵana vaku Satana kweniso kunyoloska nthowa za maphazi ngaki. (Ahe. 12:12, 13) Mbuneneska kuti ŵara akambiya ŵanthu anyaki cha chechosi chakukwaskana ndi ubudi wo munthu yo wachita. Kweni kumbi ndi vinthu wuli vo mpingu ungakhumbika kuziŵa?
“UŴACHENYENGI PAKWERU”
16. Mwakukoliyana ndi lemba la 1 Timote 5:20, kumbi Paulo wachikamba kuti “uŵachenyengi pakweru” wang’anamuwanganji?
16 Ŵerengani 1 Timote 5:20. Paulo wangukambiya Timote yo wenga so mura munyaki kuti ŵanthu wo achita ubudi ‘waŵachenyi pakweru.’ Kumbi Paulo wang’anamuwanga kuti munthu wakubuda wachenyeki pamasu pa mpingu wosi? Viŵi cha. Mumalu mwaki wang’anamuwanga ŵanthu amanavi wo aziŵa kali va ubudi wo. Angaŵa ŵanthu wo anguwona ndi masu pamwenga angaŵa ŵanthu wo iyu mweneku wanguŵakambiya kuti wachita ubudi. Ŵara angachita vinthu mwazeru mwakuŵakambiya ŵanthu ŵenaŵa pe kuti nkhani yo ayiphwere ndipu wakubuda yo amuwovya.
17. Ntchifukwa wuli chipharazgu chakuti munthu wachenyeka chingaperekeka ku mpingu?
17 Nyengu zinyaki ubudi wo munthu wachita, ŵanthu anandi angawuziŵa mu mpingu pamwenga kuti awuziŵengi. Asani vaŵa viyo, ‘kuchenyeka pakweru’ kungasazgapu mpingu wosi. Mwaviyo, mura wangapharazga ku mpingu kuti mubali pamwenga mzichi ngana wachenyeka. Chifukwa wuli? Paulo wamuka kuti: “Anyaki wosi asambirepu kanthu” kuti nawu aleki kuchita ubudi ukulu.
18. Kumbi ŵara akhumbika kuchita wuli asani mwana wakubatizika wachita ubudi ukulu? (Wonaniso chithuzi.)
18 Kumbi ŵara akhumbika kuchita wuli asani Mkhristu yo wechendafiki vyaka 18 wachita ubudi ukulu? Wupu wa ŵara utenere kusankha ŵara ŵaŵi kuti akakumani ndi mwana yo limoza ndi apapi ŵaki wo Mbakaboni aku Yehova.b Ŵara akhumbika kuziŵa vinthu vo apapi achitapu kali pakovya mwana yo kuti walapi. Asani mwana yo wavwiya ulongozgi wa apapi ŵaki kweniso wasintha nkharu yaki, ŵara wo angasankha kuti apapi wo alutirizgi kumuwovya mwana wawu, ndipu komiti ya ŵara yingakhumbika so cha. Ve viyo chifukwa apapi ndiwu akupaskika udindu ndi Chiuta kuti alunguchizgengi ŵana ŵawu mwachanju. (Doto. 6:6, 7; Nthanthi 6:20; 22:6; Aefe. 6:2-4) Nyengu ndi nyengu ŵara akambiskanengi ndi apapi kuti awonesesi kuti mwana yo wawovyeka mwauzimu. Kweni kumbi ndi vinthu wuli vo vingachitika asani mwana yo walutirizga kuchita vinthu viheni ndipu walapa cha? Komiti ya ŵara yingakumana nayu limoza ndi apapi ŵaki.
Asani mwana yo wakubatizika wachita ubudi ukulu, ŵara ŵaŵi atenere kukumana nayu limoza ndi apapi ŵaki wo Mbakaboni aku Yehova (Wonani ndimi 18)
“YEHOVA NGWACHANJU CHIKULU UKONGWA KWENISO NGWALISUNGU”
19. Kumbi ŵara ayezga wuli Yehova pakovya ŵanthu wo achita ubudi?
19 Ŵara wo ateŵete mu makomiti ŵe ndi udindu pamasu paku Yehova wakovya kuti mpingu ujengi wakutowa. (1 Akori. 5:7) Yiwu achita vosi vo angafiska kuwovya munthu yo wachita ubudi ukulu kuti walapi. Ndipu achiwovya munthu yo, akhaza kuti iyu wasinthengi. Chifukwa wuli? Chifukwa akhumba kuyezga Yehova yo “ngwachanju chikulu ukongwa kweniso ngwalisungu.” (Yako. 5:11) Wonani mo wakutumika Yohane yo wenga wakukota wangulongore mijalidu yeniyi. Iyu wangulemba kuti: “Mwaŵana ŵangu akwanjiwa, nditikulembiyani vinthu venivi kuti muleki kuchita ubudi. Kweni asani munyaki wachita ubudi, te ndi wakovya murunji yo ndi Yesu Khristu, mweniyo we kwa Ada.”—1 Yoha. 2:1.
20. Kumbi tikambiskanengenji mu nkhani yakulondopu?
20 Vachitima kuti nyengu zinyaki Mkhristu yo wachita ubudi wakana kulapa. Asani vaŵa viyo, iyu watenere kumikika dankha mu mpingu. Kumbi ŵara achita wuli asani vaŵa viyo? Tikambiskanengi venivi mu nkhani yakulondopu.
SUMU 103 Aliska Ndi Mphasu
a Kali komiti yeniyi yadanikanga kuti komiti yakuyeruzga mulandu. Kweni tikuleka kugwiriskiya ntchitu mazu ngenanga chifukwa chakuti ŵara agwira ntchitu yakuyeruzga pe cha pakomiti. Sonu yidanika kuti komiti ya ŵara.
b Apapi wo akambika yapa angaja so ŵanthu anyaki wo aja ndi mwana yo pamwenga wo atimuphwere wo Mbakaboni aku Yehova.