Mujulengi Mtima Winu Asani Musambira

Asani tinozgeke kuti tisambiri Mazu ngaku Chiuta, tijifumbengi kuti, ‘Kumbi ndisambirengenji mu nkhani iyi?’ Nyengu zinyaki tingakhaza kuti tisambirengi vo isi tiziŵa kali pa nkhani yo, kweni Yehova wangakhumba kuti tisambirepu vinthu vinyaki vasonu. Kumbi tingajula wuli mtima widu asani tisambira Mazu ngaku Chiuta?

Mupempherengi kuti Yehova wakupaskeni zeru. Mupempheni Yehova kuti wakuwovyeni kuziŵa vo iyu wakhumba kuti musambiri pa nyengu yo. (Yako. 1:5) Mungakhorwanga ŵaka ndi vinthu vo mukusambirapu kali cha.—Nthanthi 3:​5, 6.

Nthazi ya Mazu ngaku Chiuta yigwirengi ntchitu pa umoyu winu. “Mazu ngaku Chiuta ngamoyu.” (Ahe. 4:12) Mwaviyo, asani tiŵerenga Bayibolu, tingasambira vinthu vasonu kweniso lingatiwovya mu nthowa zakupambanapambana. Kweni venivi vingachitika pija asani tijuliya limu mtima widu kuti tisambirepu kanthu pa vo tiŵerenga.

Muwongengi vosi vo Yehova watikupaskani pathebulu laki. Chakurya chaki chauzimu che nge “phwandu la vakurya vamampha.” (Yesa. 25:6) Mungalekanga cha kurya “vakurya” vauzimu vo muwona kuti vingakukondwesani cha. Asani muchitengi venivi Chiuta wakuwovyeningi kuti muje munthu wamampha ndipu mukondwengi ukongwa ndi vo musambira!