Kumbi Nkhondu Kweniso Vachiwawa Vazamumala Wuli?

CHIUTA WAZAMUTUZGAPU MABOMA NGA ŴANTHU

Bayibolu likamba kuti Chiuta wazamutuzgapu maboma nga ŵanthu pa nkhondu ya Aramagedoni.a (Chivumbuzi 16:16) Pa nyengu yeniyi, “mafumu nga pacharu chosi chapasi” ngazamuwunganiskika pamoza kuti ngachiti “nkhondu ya zuŵa likulu laku Chiuta Wanthazizosi.” (Chivumbuzi 16:14) Chiuta wazamugwiriskiya ntchitu nkhondu ya Aramagedoni kuti wamalisi nkhondu zosi pacharu chapasi.

Chiuta wazamutuzgapu maboma nga ŵanthu, ndipu mumalu mwaki wazamuŵikapu Ufumu waki pamwenga kuti boma lo lazamulamuliyanga kutuliya kuchanya ndipu lazamubwangandulika cha. (Daniyeli 2:44) Chiuta wakusankha Mwana waki Yesu Khristu kuti ndiyu waje Fumu. (Yesaya 9:​6, 7; Mateyu 28:18) Boma lenili ndilu Ufumub wo Yesu wangusambiza akusambira ŵaki kuti awupempheriyengi kuti uzi. (Mateyu 6:​9, 10) Pa nyengu yeniyo, charu chosi chazamulamulikanga ndi boma limoza pasi paku Yesu Khristu ndipu ŵanthu azamukoliyananga.

Mwakupambana ndi ŵanthu wo alamuliya, Yesu wazamugwiriskiya ntchitu mazaza ngaki kuti wayanduwi mweneku cha. Chifukwa chakuti iyu wachita vinthu mwaurunji ndipuso mwambula kwanjiya, palivi yo wazamudandawulanga kuti wasankhika chifukwa cha mtundu, charu pamwenga fuku laki. (Yesaya 11:​3, 4) Ndipuso ŵanthu azamukhumbika kuchita nkhondu cha kuti asaniyi wanangwa. Chifukwa wuli? Chifukwa Yesu wazamuchitanga vinthu vakuyandulisa weyosi. Bayibolu likamba kuti: “Pakuti iyu wazamutaska akavu wo apempha chovyu, ndipuso ŵanthu akusika kweniso weyosi yo walivi wakumuwovya. . . . Wazakuŵataska ku ŵanthu ankhaza kweniso achiwawa.”—Salimo 72:​12-14.

Ufumu waku Chiuta wazamupeya vidya vosi vankhondu pacharu chapasi. (Mika 4:3) Wazamutuzgapu so ŵanthu wosi aheni wo akana kuleka kuchita nkhondu ndipuso wo atimbanyiza chimangu cha anyawu. (Salimo 37:​9, 10) Munthu weyosi, kwali ndi munthulumi, munthukazi pamwenga mwana, wazamuyendanga kwekosi pacharu chapasi kwambula kopa.—Ezekiyeli 34:28.

Ŵanthu azamujanga umoyu wamampha ukongwa asani boma laku Chiuta laziyamba kulamuliya. Boma ili lazamutuzgapu masuzgu ngo ngachitiska kuti ŵanthu achitengi nkhondu nge ukavu, nja kweniso kusoŵa pakuja. Weyosi wazamuja ndi chakurya chamampha chakukwana ndipuso wazamukuŵa ndi nyumba yamampha.—Salimo 72:16; Yesaya 65:​21-23.

Ufumu waku Chiuta wazamutuzgapu masuzgu ngo ŵanthu akumana nangu chifukwa cha nkhondu. Mwakuyeruzgiyapu ŵanthu azamuchizgika vilonda vo akupwetekeka kweniso wazamutuzgapu urwirwi wo ŵanthu atuvwa mumtima chifukwa cha masuzgu ngo angukumana nangu pa nyengu ya nkhondu. Ndipuso ŵanthu wo angubayika pa nkhondu, azamuyuskika kuti ajeso ndi umoyu pacharu chapasi. (Yesaya 25:8; 26:19; 35:​5, 6) Ŵanthu a mubanja limoza azamukumana so ndipu azamukumbuka so cha vinthu viheni vo vinguchitika pa nyengu ya nkhondu chifukwa vazamuja mugulu la ‘vinthu vakali vo vazamutuwapu.’—Chivumbuzi 21:4.

CHIUTA WAZAMUTUZGAPU UBUDI

Asani Ufumu waku Chiuta waziyamba kulamuliya charu chapasi, ŵanthu wosi azamusopanga Chiuta yija wauneneska Yehova,c yo ndi “Chiuta wachanju ndipuso wachimangu.” (2 Akorinto 13:11) Ŵanthu azamukwamba kuja limoza mwachimangu. (Yesaya 2:​3, 4; 11:9) Weyosi yo wazamugwiriskiyanga ntchitu vo wasambira, wazamufwatuka ku ubudi.—Aroma 8:​20, 21.

CHIUTA WAZAMUTUZGAPU SATANA NDI VIŴANDA VAKI

Ufumu waku Chiuta wazamutuzgapu Satana ndi viŵanda vaki wo atambisa nkhondu. (Chivumbuzi 20:​1-3, 10) Asani yiwu azituzgikapu, “chimangu chazamuja chikulu.”—Salimo 72:7.

Kukayikiya cha kuti Chiuta wazamufiska nadi layizgu laki lakuti wazamumalisa nkhondu kweniso vinthu vachiwawa. Tikamba viyo chifukwa chakuti iyu we ndi nthazi ndipuso wakhumbisiska kuti wazichiti venivi.

• Chiuta we ndi zeru kweniso nthazi zakumalisiya nkhondu kweniso vinthu vachiwawa. (Yobu 9:4) Palivi cho chingamutonda.—Yobu 42:2.

• Chiuta vitimuŵaŵa ukongwa asani wawona ŵanthu asuzgika. (Yesaya 63:9) Kweniso “iyu watinkha munthu weyosi yo watanja chiwawa.”—Salimo 11:5.

• Chiuta watondeka cha kufiska vo wakamba chifukwa iyu wapusika cha.—Yesaya 55:​10, 11; Tito 1:2.