Ntchifukwa Wuli Nkhondu Kweniso Vachiwawa Vilutiriya?

UBUDI

Chiuta wangulenga apapi ŵidu akwamba Adamu ndi Heva mu chikozgu chaki. (Genezesi 1:27) Fundu iyi ying’anamuwa kuti yiwu angulengeka ndi mijalidu yaku Chiuta kusazgapu chimangu ndipuso chanju. (1 Akorinto 14:33; 1 Yohane 4:8) Kweni Adamu ndi Heva angumuvwiya cha Chiuta ndipu angubuda. Chifukwa cha venivi, tosi tikutoliyaku ubudi kweniso nyifwa. (Aroma 5:12) Ubudi wo tikuhara utitichitiska kuti tiŵanaŵanengi kweniso tichitengi vinthu vachiwawa.—Genezesi 6:5; Mariko 7:​21, 22.

MABOMA NGA ŴANTHU

Chiuta wakutilenga kuti tijilamuleyengi tija cha. Bayibolu likamba kuti: “Munthu yo watenda walivi nthazi zakunyoloske maphazi ngaki.” (Yeremiya 10:23) Chifukwa cha venivi, maboma nga ŵanthu ngangamalisa cha nkhondu pamwenga vachiwawa.

SATANA NDI VIŴANDA VAKI

Bayibolu likamba kuti “charu chosi che mu nthazi ya muheni yo.” (1 Yohane 5:19) “Muheni yo” wakambika pa lemba ili ndi Satana Dyaboli ndipu iyu wabaya ŵanthu. (Yohane 8:44) Satana limoza ndi viŵanda vaki ndiwu achitiska kuti pacharu paŵengi nkhondu kweniso vachiwawa.—Chivumbuzi 12:​9, 12.