“Musankhi Yo Mukhumba Kumuteŵete”

1. Kumbi tikhumbika kuchitanji kuti tisaniyi likondwa chayilu, nanga ntchifukwa wuli? (Yesaya 48:​17, 18)

AWUSEFWI akuchanya atitiyanja ukongwa ndipu akhumba kuti tikondwengi ndi umoyu sonu kweniso kunthazi. (Waku. 3:​12, 13) Yiwu akutilenga ndi malusu ngakupambanapambana. Kweni akutilenga kuti tijilamuliyengi tija cha pamwenga tisankhengi tija cho ntchamampha ndi chiheni. (Waku. 8:9; Yere. 10:23) Yiwu aziŵa kuti tingasaniya likondwa chayilu asani titiŵateŵete kweniso titende fundu zawu.—Ŵerengani Yesaya 48:​17, 18.

2. Kumbi Satana wakhumba kuti tigomezgengenji, nanga Yehova wakuchita wuli ndi boza lenili?

² Satana wakhumba kuti tigomezgengi kuti tingakondwa ndi umoyu kwambula Yehova, ndipu ŵanthu angafiska kujilamuliya ŵija. (Gene. 3:​4, 5) Yehova wakumuka boza lenili mwakuzomereza kuti ŵanthu akugaruka ajilamuliyengi ŵija kwa kanyengu kamanavi. Titijiwone tija kuti ŵanthu atondeka kujilamuliya ŵija. Kweni Bayibolu likonkhoska va anthulumi ndi anthukazi anandi wo akondwanga chifukwa chakuti ateŵetiyanga Yehova. Yumoza wa ŵanthu ŵenaŵa yo wangukondwa ukongwa pa umoyu waki wenga Yesu Khristu. Munkhani iyi, chakwamba tiwonengi chifukwa cho Yesu wangusankhiya kuteŵete Yehova. Pavuli paki, tiwonengi so chifukwa cho titenere kusope Awusefwi akuchanya. Pakumaliya, tiwonengi vifukwa vinyaki vo tisankhiya kuteŵete Yehova.

NTCHIFUKWA WULI YESU WANGUSANKHA KUTEŴETE YEHOVA?

3. Kumbi Satana wangukambiya Yesu kuti wamupaskengenji, nanga Yesu wangusankha kuchitanji?

³ Pa nyengu yo Yesu wenga pacharu chapasi, wangulongo kuti wakusankha kuteŵete Yehova pe. Yesu wati wabatizika ŵaka, Satana wangukamba kuti wamupaskengi maufumu ngosi nga pacharu chapasi asani wangamusopa kamoza pe. Kweni Yesu wangumuka kuti: “Tuwapu yapa, Satana! Chifukwa Malemba ngakamba kuti: ‘Yehova Chiuta waku ndiyu utenere kumusopa, ndipu iyu pe ndiyu utenere kumuchitiya uteŵeti wakupaturika.’” (Mate. 4:​8-10) Ntchifukwa wuli Yesu wangusankha kusopa Chiuta? Tiyeni tikambiskani vifukwa vinyaki.

4-5. Kumbi ndi vifukwa vinyaki nivi vo vinguchitiska Yesu kuti wasankhi kuteŵete Yehova?

⁴ Chifukwa chikulu cho Yesu wangusankhiya kuteŵete Yehova ntchakuti watiŵayanja ukongwa Awisi. (Yoha. 14:31) Kusazgiyapu yapa, Yesu wateŵetiyanga Yehova chifukwa chakuti Yehova ndiyu ngwakwenere kumusopa. (Yoha. 8:​28, 29; Chivu. 4:11) Iyu waziŵanga kuti Yehova ndiyu watitipaska umoyu, ngwakugomezgeka kweniso ngwakupaska. (Salimo 33:4; 36:9; Yako. 1:17) Nyengu zosi Yehova wamukambiyanga uneneska Yesu ndipu chechosi cho wenga nachu chingutuliya kwaku Yehova. (Yoha. 1:14) Kweni Satana wapambana ndi Yehova chifukwa ndiyu wakuchitiska kuti ŵanthu afwengi. Iyu ngwaboza, ngwambunu kweniso ngwakujiyanja. (Yoha. 8:44) Chifukwa chakuti Yesu wamuziŵanga umampha Yehova kweniso Satana, wanguŵanaŵanapu cha kuti wayezgi Satana ndi kugarukiya Yehova.—Afi. 2:​5-8.

⁵ Chifukwa chinyaki cho Yesu wangusankhiya kuteŵete Yehova ntchakuti waŵanaŵaniyanga vinthu vamampha vo vatingi vichitikengi chifukwa chakugomezgeka kwaki. (Ahe. 12:2) Iyu waziŵanga kuti asani walutirizgengi kuja wakugomezgeka, watowesengi zina la Awisi kweniso wawovyengi kuti masuzgu ngosi ngo Dyaboli wakuyambisa ngazimali.

NTCHIFUKWA WULI TITENERE KUSOPA YEHOVA PE?

6-7. Ntchifukwa wuli ŵanthu anandi mazuŵa nganu ateŵete Yehova cha, nanga ntchifukwa wuli tikhumbika kumusopa?

⁶ Ŵanthu anandi mazuŵa nganu ateŵete Yehova cha chifukwa chakuleka kuyiziŵa umampha mijalidu yaki kweniso vinthu vo iyu watiŵachitiya. Yiwu ayanana ŵaka ndi ŵanthu a ku Atene wo wakutumika Paulo wanguŵapharazgiya.—Machi. 17:​19, 20, 30, 34.

⁷ Paulo wangukambiya ŵanthu a ku Atene kuti Chiuta wauneneska “wapaska ŵanthu wosi umoyu, mvuchi ndi vinthu vosi.” Iyu wangukamba so kuti: “Chifukwa chaku iyu te ndi umoyu, titenda kweniso tilipu.” Chiuta ndi Mlengi yo “wakupanga mitundu yosi ya ŵanthu.” Mwaviyo, tikhumbika kusopa iyu pe.—Machi. 17:​25, 26, 28.

8. Kumbi ntchinthu wuli cho Yehova wachita cha? Konkhoskani.

⁸ Nge Mlengi kweniso Wakulamuliya chilengedu chosi, Yehova watingi wachichizgengi ŵanthu kuti amuteŵetiyengi. Kweni ndivu Yehova wachita cha. Mumalu mwaki, wapereka ukaboni wakuti iyu waliku kweniso wakuti watanja munthu weyosi pakuyija. Iyu wakhumba kuti ŵanthu anandi aje mabwezi ngaki mpaka muyaya. (1 Timo. 2:​3, 4) Ndichu chifukwa chaki Yehova watitisambiza kuti tiwovyengi ŵanthu kuti aziŵi khumbu laki kweniso vinthu vamampha vo wazakutichitiya kunthazi. (Mate. 10:​11-13; 28:​19, 20) Kweniso iyu wakutipaska mpingu kuti timusopengi mwakukoliyana ndipuso kuti tilondiyengi ulongozgi kutuwa kwa ŵara wo atitiyanja.—Machi. 20:28.

9. Kumbi Yehova walongo wuli kuti watanja ŵanthu wosi?

⁹ Yehova watiŵayanja ŵanthu wo aleka kumugomezga mwakuŵachitiya vinthu vamampha. Aŵanaŵaniyani fundu izi: Kutuwa kali, ŵanthu mabiliyoni nganandi asankha ŵija cho ntchamampha ndi chiheni mumalu mwakuvwiya Yehova. Chinanga kuti ve viyo, Yehova watiŵapaska vo akhumbikiya pa umoyu kweniso watiŵawovya kuti akondwengi. (Mate. 5:​44, 45; Machi. 14:​16, 17) Mwakuyeruzgiyapu, chifukwa chaku Yehova asaniya mabwezi ngamampha, nthengwa, ŵana, ntchitu kweniso akondwa ndi vinthu vo asaniya. (Salimo 127:3; Waku. 2:24) Venivi vilongore limu kuti Awusefwi akuchanya atanja munthu weyosi. (Eki. 34:6) Tiyeni tiwoni vifukwa vinyaki vo vititichitiska kuti tisankhi kuteŵete Yehova kweniso vitumbiku vo tisaniya asani tasankha kumuteŵete.

NTCHIFUKWA WULI TISANKHA KUTEŴETE YEHOVA?

10. (a) Kumbi ntchifukwa chikulu nichi cho chititichitiska kuti titeŵetiyengi Yehova? (Mateyu 22:37) (b) Kumbi kuzikira kwaku Yehova kwakuwovyani wuli? (Salimo 103:​13, 14)

¹⁰ Mwakuyanana ndi Yesu, nasi titeŵete Yehova chifukwa chakuti titimuyanja ukongwa. (Ŵerengani Mateyu 22:37.) Titimuyanja ukongwa Yehova asani taziŵa mijalidu yaki yamampha. Mwakuyeruzgiyapu, tiyeni tikambiskani mo Yehova wachitiya nasi vinthu mwakuzikira. Ayisirayeli ŵati aleka kumuvwiya, iyu wanguŵaŵeyere kuti: “Chondi, tuwaniku ku nthowa zinu ziheni.” (Yere. 18:11) Chinanga kuti tinangisa vinthu vinandi, Yehova watitigowoke chifukwa chakuti wakumbuka kuti te fuvu. (Ŵerengani Salimo 103:​13, 14.) Asani muŵanaŵaniya kuzikira kwaku Yehova kweniso mijalidu yaki yinyaki yamampha, vikuwovyeningi kuti musankhi kumuteŵete mpaka muyaya.

11. Kumbi ndi vifukwa vinyaki nivi vo vititichitiska kuti tisankhi kuteŵete Awusefwi akuchanya?

¹¹ Titeŵete so Yehova chifukwa chakuti iyu ngwakwenere kumusopa. (Mate. 4:10) Kusazgiyapu yapa, tiziŵa kuti asani tilutirizgengi kuja akugomezgeka kwaku Yehova, viwovyengi kuti pachitiki vinthu vinandi vamampha. Asani tilutirizga kuteŵete Yehova mwakugomezgeka, titowesa zina laku Yehova, tilongo kuti Dyaboli ngwaboza kweniso tikondwesa mtima wa Awusefwi. Ndipu asani tasankha kuteŵete Yehova sonu, vazakutiwovya kuti tizimuteŵete mpaka muyaya!—Yoha. 17:3.

12-13. Kumbi tisambiranji pa vo vinguchitikiya Jane ndi Pam?

¹² Pa nyengu yo teche ŵana, timuyanjengi ukongwa Yehova chifukwa venivi vazakutiwovya kuti tizilutirizgi kumuyanja asani takuwa. Venivi ndivu vinguchitikiya mzichi Jane ndi mvurwa waki Pam.a Jane wenga ndi vyaka 11 ndipu mvurwa waki Pam wenga ndi vyaka 10 pa nyengu yo angwamba kusambira Bayibolu. Chinanga kuti apapi ŵawu akhumbanga cha kusambira, kweni anguzomereza Jane ndi Pam kuti asambirengi ndi Akaboni aku Yehova, chikulu asani alutirizgengi kuluta ku tchalitchi kwa apapi ŵawu limoza ndi ŵanthu a mubanja lawu. Jane wangukamba kuti: “Vo Akaboni aku Yehova angundisambiza kutuwa mu Bayibolu vingundiwovya kuti ndikanengi kugwiriskiya ntchitu munkhwala wakutimbanyiza wongu kweniso kuchitaku ureŵi nge mo anyangu kusukulu achitiyanga.”

¹³ Pati pajumpha vyaka vimanavi, asungwana yaŵa anguja apharazgi. Pavuli paki, angwamba kuchita upayiniya uku aphwere apapi ŵawu akukota. Asani akumbuka vo vinguŵachitikiya, Jane wangukamba kuti: “Ndingujiwone ndija kuti Yehova waphwere nadi mabwezi ngaki ngakugomezgeka kweniso kuti vo vikambika pa lemba la 2 Timote 2:19 vauneneska. Lemba ili likamba kuti: ‘Yehova waziŵa ŵanthu wo mbaki.’” Tikayika cha kuti nyengu zosi Yehova waphwere ŵanthu wo asankha kumuteŵete kweniso wo atimuyanja!

14. Kumbi vo tikamba kweniso kuchita vitovya wuli kuti zina laku Yehova litoweseki? (Wonaniso vithuzi.)

¹⁴ Tikhumba kuwovya ŵanthu kuziŵa kuti vinthu viheni vo akuvwa vakukwaskana ndi Yehova vaboza. Tiyeruzgiyi kuti mwe ndi mubwezi winu yo ngwalisungu, wakupaska kweniso wagowoka ukongwa. Zuŵa linyaki mutuvwa munthu munyaki wakamba kuti mubwezi winu ngwankhaza kweniso wachita vinthu mwauryarya. Kumbi mungachita wuli? Mumuŵikiyengi kuvuli mubwezi winu. Mwakuyanana ŵaka, asani Satana kweniso ŵanthu wo atimulondo awandisa maboza ngakukwaskana ndi Yehova, tichita chiganga kuvikiliya zina laku Yehova mwakukamba uneneska wakukwaskana ndi Iyu. (Salimo 34:1; Yesa. 43:10) Tilongo kuti tikhumba kuteŵete Yehova ndi mtima wosi kuziya mu vo tikamba ndi kuchita.

15. Kumbi wakutumika Paulo wanguyanduwa wuli chifukwa chakuti wangusintha vinthu pa umoyu waki? (Afilipi 3:​7, 8)

¹⁵ Tija akunozgeka kusintha vinthu pa umoyu widu kuti tichitengi vinandi pakuteŵete Yehova pamwenga kuti timuteŵetiyengi mwakuzomerezeka. Mwakuyeruzgiyapu, wakutumika Paulo wangusankha kuleka udindu wapachanya wo wenga nawu mu chisopa cha Ayuda kuti waje wakusambira waku Khristu kweniso kuti wateŵetiyengi Yehova. (Aga. 1:14) Venivi vingumuwovya kuti wasaniyi vitumbiku vinandi pakuteŵete Yehova kweniso kuti waje ndi mwaŵi wakuchilamuliya limoza ndi Khristu kuchanya. Paulo wangudandawulapu cha chifukwa chakusankha kuteŵete Yehova ndipu nasi tazamudandawulapu cha.—Ŵerengani Afilipi 3:​7, 8.

16. Kumbi tisambiranji pa vo vinguchitikiya Julia? (Wonaniso vithuzi.)

¹⁶ Asani tiwona kuti kuteŵete Yehova ndichu chinthu chakukhumbika ukongwa, tikondwengi ndi umoyu sonu kweniso munthazi. Tiyeni tikambiskani vo vinguchitikiya mzichi Julia. Wechemunamana, Julia wambanga kwaya ku tchalitchi kwawu. Munthu munyaki yo wenga kaswiri wakumba, wanguziŵa kuti Julia we ndi lusu lakumba, ndipu wangwamba kumusambiza. Pati pajumpha ŵaka nyengu yimanavi, Julia wangutchuka chifukwa cha lusu laki lakumba ndipu wangwamba kumba mumalu ngakuziŵika ukongwa. Pa nyengu yo wasambiranga kusukulu yinyaki yakusambiza kumba, munyaki yo wasambiranga nayu limoza wangumukambiya vakukwaskana ndi Chiuta kweniso wangumukambiya kuti zina laku Chiuta ndi Yehova. Pati pajumpha nyengu yimanavi, Julia wangwamba kusambira Bayibolu kaŵi pa sabata. Pavuli paki, iyu wangusankha kuteŵete Yehova mumalu mwakuja kaswiri wakumba sumu. Venga vipusu cha kusankha venivi. Iyu wangukamba kuti: “Ŵanthu anandi andikambiyanga kuti lusu laku lakumba libirengi ŵaka mumaji. Kweni ini ndakhumbanga kuteŵete Yehova ndi mtima wosi.” Kumbi Julia wadandawula chifukwa cha vo wangusankha vyaka 30 vo vajumpha? Iyu wangukamba kuti: “Nde ndi chimangu cha mumtima ndipu ndigomezga kuti munthazi Yehova wazamufiska vosi vo mtima wangu ukhumba.”—Salimo 145:16.

LUTIRIZGANI KUTEŴETE YEHOVA

17. Kumbi fundu yakuti tija mu nyengu yakumaliya, yitiŵakwaska wuli ŵanthu wo akusankha kuteŵete Chiuta kweniso wo ŵechendasankhi kuteŵete Chiuta?

¹⁷ Tija mu nyengu yakumaliya. Wakutumika Paulo wangukamba kuti: “Kwaja ‘kanyengu kamanavi,’ ndipu ‘yo watuza, wafikengi ndipu waswerengi cha.’” (Ahe. 10:37) Kumbi venivi vititikwaska wuli? Nyengu yo yajaku kuti ŵanthu asankhi kuteŵete Yehova njimana ukongwa. (1 Akori. 7:29) Ndipu asani tikusankha kali kuteŵete Chiuta, tiziŵa kuti masuzgu ngo tikunthiyapu pasonu panu, nga “kanyengu kamanavi.”

18. Kumbi Yesu ndi Yehova akhumba kuti tichitenji?

¹⁸ Yesu wanguchiska ŵanthu kuti aje akusambira ŵaki kweniso kuti alutirizgi kumulondo. (Mate. 16:24) Mwaviyo, asani tateŵete Yehova kwa vyaka vinandi tingaweriyanga vuli cha chifukwa Yehova wakhumba kuti tilutirizgi kumuteŵete. Tikhumbika kuchita phamphu kuti tilutirizgi kumuteŵete. Kuchita viyo nkhupusu cha, kweni tingakondwa ndi umoyu ndipuso tingalonde vitumbiku vinandi chinanga mphasonu panu!—Salimo 35:27.

19. Kumbi tisambiranji pa vo vinguchitikiya Gene?

¹⁹ Ŵanthu anyaki awona kuti munthu wakhumbika kujinola vinthu vinandi kuti wateŵetiyengi Yehova. Asani ndimwi wachinyamata, kumbi muwona kuti munolekengi vinthu vinyaki asani mungasankha kuteŵete Yehova? Mubali munyaki wachinyamata zina laki Gene wangukamba kuti: “Ndawonanga kuti vinthu vinandi vindipambengi asani ndingaja Kaboni waku Yehova. Chifukwa ŵana anandi a sayizi yangu akondwanga kuchita mapate, kuja ndi vibwezi pamwenga kutchaya magemu nga viwawa. Penipo ini ndamaliyanga nyengu yangu ku maunganu ndi mu uteŵeti.” Kumbi kuja ndi maŵanaŵanu ngenanga kungumukwaska wuli Gene? Iyu wangukamba kuti: “Ndingwamba kuchita vinthu viheni vo anyangu achitanga, ndipu kwa kanyengu ndawonanga nge kuti ndikondwa. Kweni ndengavi likondwa chayilu. Ndingwamba kuŵanaŵaniya fundu za mu Bayibolu zo ndinguleka kuzigwiriskiya ntchitu ndipu ndingusankha kuteŵete Yehova ndi mtima wosi. Kutuwa pa nyengu yeniyi, Yehova walutirizga kumuka mapempheru ngangu ngosi.”

20. Kumbi titenere kusimikiza kuchitanji?

²⁰ Munthu munyaki yo wakulembaku buku la Masalimo wangukamba kuti: “Ngwakukondwa munthu yo [yimwi Yehova] mwasankha ndi kuza nayu pafupi kuti wazije mumabalaza nginu.” (Salimo 65:4) Tiyeni tosi tilutirizgi kuteŵete Yehova. Nge Yoswa tiyeni tisimikizi mtima ndi kukamba kuti: “Kweni ini ndi a munyumba yangu, titeŵetiyengi Yehova.”—Yoswa 24:15.