Wovyani wo Musambira Nawu Bayibolu Kuti Ayambi Kuteŵete Yehova

1-2. (a) Ntchifukwa wuli ŵanthu anyaki wo tisambira nawu achita vidazi kuti ayambi kuteŵete Yehova? (b) Nanga tikambiskanengenji munkhani iyi?

KUMBI pe vinthu vinyaki vo vakutondekesaningi kuti muje Kaboni waku Yehova? Panyaki kumbi mwawopanga kuti wo mugwira nawu ntchitu, mabwezi nginu, ŵanthu a mubanja linu angakukwiyiyani? Pamwenga mwawonanga kuti mungafiska cha kwende fundu zaku Chiuta pa umoyu winu? Asani ndimu ve nge ndi yimwi, ndikuti mungamuvwisa yo musambira nayu Bayibolu asani watopa kuti waje Kaboni waku Yehova.

² Yesu waziŵanga kuti vinthu venivi vingatondekesa munthu kuti wayambi kuteŵete Yehova. (Mate. 13:​20-22) Kweni wanguleka cha kuwovya ŵanthu wo achitanga vidazi. Iyu wangulongo akusambira ŵaki mo angawovye ŵanthu ŵenaŵa (1) kuziŵa vo vingaŵatondekesa kuti ayambi kuteŵete Yehova, (2) vo angachita kuti amuyanjengi ukongwa Yehova, (3) vo angachita kuti awonengi kuti kuteŵete Yehova ndiku nkhwakukhumbika ukongwa, ndipuso (4) kuziŵa vo angachita asani anyawu atiŵasuska. Kumbi nasi tingagwiriskiya wuli ntchitu vo Yesu wangusambiza akusambira ŵaki, kuti tiwovyi wo tisambira nawu Bayibolu mwakugwiriskiya ntchitu buku la Kondwani ndi Umoyu Kwamuyaya! kuti ayambi kuteŵete Yehova?

WOVYANI WO MUSAMBIRA NAWU BAYIBOLU KUTI AZIŴI VO VINGAŴATONDEKESA KUTI AYAMBI KUTEŴETE YEHOVA

3. Kumbi ntchinthu wuli cho chamutondekesanga Nikodimu kuti waje wakusambira waku Yesu?

³ Penga vinthu vinyaki vo vamutondekesanga Nikodimu yo wenga mulongozgi wa Ayuda kuja wakusambira waku Yesu. Pati pajumpha ŵaka myezi pafufupi 6 kutuwa po Yesu wangwambiya uteŵeti waki, Nikodimu wanguziŵa kuti Yesu wenga Mesiya. (Yoha. 3:​1, 2) Chinanga kuti venga viyo, Nikodimu wangusankha kukumana ndi Yesu ndi usiku “chifukwa cha kopa Ayuda.” (Yoha. 7:13; 12:42) Iyu watenere kuti waŵanaŵananga kuti asani wangaja wakusambira waku Yesu ndikuti watayengi udindu waki kweniso chuma.a

4. Kumbi Yesu wangumuwovya wuli Nikodimu kuti waziŵi vo Chiuta wakhumbanga kuti wachitengi?

⁴ Nikodimu waliziŵanga Dangu laku Mozesi, kweni wakhumbikanga kuwovyeka kuti waziŵi vo Yehova wakhumbanga kuti wachitengi. Kumbi Yesu wangumuwovya wuli? Yesu wenga wakunozgeka kugwiriskiya ntchitu nyengu yaki kuti wawovyi Nikodimu ndi usiku. Ndipu Yesu wangukambiya Nikodimu vo wakhumbikanga kuchita kuti waje wakusambira. Iyu wangumukambiya kuti wakhumbikanga kulapa, kubatizika kweniso kuja ndi chivwanu mwa Mwana waku Chiuta.—Yoha. 3:​5, 14-21.

5. Kumbi tingachita wuli kuti timuwovyi yo tisambira nayu Bayibolu kuti waziŵi vo vitimutondekesa kuteŵete Yehova?

⁵ Chinanga kuti yo musambira nayu Bayibolu wavwisa umampha fundu za mu Malemba, kweni wangakhumbika mbwenu kumuwovya kuti waziŵi vo vitimutondekesa kuteŵete Yehova. Mwakuyeruzgiyapu vingaŵa kuti ntchitu yo wagwira ndiyu yitimumaliya nyengu pamwenga abali ŵaki akhumba cha kuti waje Kaboni waku Yehova. Mwaviyo, nge Yesu namwi musaniyengi nyengu yakumuwovye wakusambira winu. Mungamudaniya kunyumba kwinu kuti mukaryi nayu chakurya. Venivi vingamuwovya kuti wakukambiyeni masuzgu ngaki mwakufwatuka. Mumuchiskengi kuti wasinthi vinthu vinyaki pa umoyu kuti wakondwesi Yehova, yimwi cha.

6. Kumbi mungamuwovya wuli yo musambira nayu Bayibolu kuti wagwiriskiyengi ntchitu vo wasambira? (1 Akorinto 16:13)

⁶ Asani wakusambira Bayibolu wagomezga kuti Yehova wamuwovyengi kuchita cho ntchakwenere, vimuwovyengi kuti wagwiriskiyengi ntchitu vo wasambira. (Ŵerengani 1 Akorinto 16:13.) Vo muchita asani musambira ndi munthu Bayibolu tingaviyeruzgiya ndi vo msambizi wachita. Mwakuyeruzgiyapu, po mwenga pa sukulu kumbi ndi msambizi nuyu yo mwamuyanjanga ukongwa? Mutenere kuti mwayanjanga msambizi yo wakuwovyaningi mwakuzikira kuti mulekengi kujikayikiya kuti mukwerengi. Mwakuyanana waka, msambizi wamampha wasambiza waka vo Chiuta wakhumba kuti tichiti pe cha kweni watimusimikiziya wakusambira waki kuti Yehova wamuwovyengi kusintha vinthu vinyaki pa umoyu waki. Kumbi mungachita wuli venivi?

WOVYANI WO MUSAMBIRA NAWU BAYIBOLU KUTI AYANJENGI UKONGWA YEHOVA

7. Kumbi Yesu wanguŵawovya wuli ŵanthu wo amuvwisiyanga kuti amuyanjengi ukongwa Yehova?

⁷ Yesu waziŵanga kuti kwanja Chiuta kungachitiska kuti akusambira ŵaki agwiriskiyengi ntchitu vo asambira. Kanandi wasambizanga akusambira ŵaki kuti aŵayanjengi ukongwa Awusewu akuchanya. Mwakuyeruzgiyapu, iyu wanguyeruzgiya Yehova ndi da yo wapereka vinthu vamampha ku ŵana ŵaki. (Mate. 7:​9-11) Akusambira anyaki aku Yesu atenere kuti ayanjikanga cha ndi awusewu. Aŵanaŵaniyani mo yiwu anguvwiya Yesu wati wakamba ntharika ya da walisungu yo wangulondere mwana waki yo pakwamba wachitanga vinthu viheni ndipu wangusintha. Yiwu anguziŵa kuti Yehova watanja ukongwa ŵana ŵaki a pacharu chapasi.—Luka 15:​20-24.

8. Kumbi yo musambira nayu mungamuwovya wuli kuti wamuyanjengi ukongwa Yehova?

⁸ Namwi mungawovya yo musambira nayu kuti wamuyanjengi ukongwa Yehova. Mungachita venivi asani mutimusambiza vakukwaskana ndi mijalidu yamampha yaku Yehova. Pa sambiru lelosi, mumuwovyengi kuwona mo Yehova watitiyanjiya. Asani mukambiskana nayu vakukwaskana ndi sembi, mumuwovyengi kuziŵa mo sembi yitimukwaskiya. (Aro. 5:8; 1 Yoha. 4:10) Yo musambira nayu Bayibolu wangayamba kumuyanja ukongwa Yehova asani waŵanaŵaniya mo watimuyanjiya.—Aga. 2:20.

9. Kumbi ntchinthu wuli cho chinguwovya Michael kusintha nkharu yaki?

⁹ Tiyeni tikambiskani vo vinguchitikiya Michael waku Indonesia. Iyu wakulereke mubanja la Akaboni kweni wangubatizika cha. Panyengu yo wenga ndi vyaka 18, wanguluta kucharu chinyaki ndipu wagwiranga ntchitu yakwendesa mathiraki. Pavuli paki, wanguwere ku Indonesia kuti wakato. Iyu wanguwere so ku ulendu kuti wakalutirizgi kugwira ntchitu yaki kweni banja laki losi wangulisiya ku Indonesia. Mukuluta kwa nyengu muwolu waki ndi mwana waki angwamba kusambira Bayibolu ndipu alutanga panthazi mwauzimu. Anyina aku Michael ŵati atayika, iyu wanguweku ku ulendu kuti wakaphweriyengi awisi ndipu nayu wangwamba kusambira Bayibolu. Michael wangukwaskika ukongwa pa nyengu yo wasambiranga chigaŵa chakuti “Sambirani Vinandi” mu sambiru 27 mubuku lakuti Kondwani ndi Umoyu Kwamuyaya! Michael wanguliya panyengu yo waŵanaŵaniyanga mo Yehova wanguvwiya kuwona Mwana Waki wachisuzgika. Wati wavwisa mo Yehova ndi Yesu atimuyanjiya, vingumuchitiska kuti wawongengi sembi yeniyi, wasinthi nkharu yaki ndipu wangubatizika.

WOVYANI WO MUSAMBIRA NAWU KUTI AWONENGI KUTI KUTEŴETE YEHOVA NDIKU NKHWAKUKHUMBIKA UKONGWA

10. Kumbi Yesu wanguŵawovya wuli akusambira ŵaki kuti aŵikengi ntchitu yakupharazga pa malu ngakwamba? (Luka 5:​5-11) (Wonaniso chithuzi.)

¹⁰ Akusambira aku Yesu anguswera cha kuziŵa kuti Yesu ndi Mesiya wakulayizgika. Kweni akhumbikanga kuwovyeka kuti awonengi kuti kuteŵete Yehova ndiku nkhwakukhumbika ukongwa. Pa nyengu yo Yesu wangukambiya Peturo ndi Andireya kuti amulondongi ndipu mbakusambira ŵaki kali. (Mate. 4:​18, 19) Yiwu limoza ndi Yakobe kweniso Yohane agwiranga ntchitu yakubaya somba ndipu vaŵayendiyanga ukongwa. (Mariko 1:​16-20) Peturo ndi Andireya “angujowo mikwawu yawu” kuti alondongi Yesu ndipu angusaniya nthowa ya mo angaphwelere mabanja ngawu. Kumbi ndi vinthu wuli vo vinguŵawovya kuti aŵikengi ntchitu yakupharazga pamalu ngakwamba? Nkhani yo Luka wakulemba yilongo kuti vakuziziswa vo Yesu wanguchita vinguwovya akusambira ŵaki kuti agomezgengi kuti Yehova waŵaphweriyengi.—Ŵerengani Luka 5:​5-11.

11. Kumbi mungagwiriskiya wuli ntchitu vo vingukuchitikiyani kuti muchiski yo musambira nayu Bayibolu?

¹¹ Chinanga kuti tingachita vakuziziswa cha nge mo Yesu wanguchitiya, kweni tingakambiyaku wo tisambira nawu mo Yehova watovye ŵanthu wo aŵika vinthu va Ufumu pa malu ngakwamba. Mwakuyeruzgiyapu, kumbi mukumbuka mo Yehova wangukuwovyiyani mwati mwayamba kuwungana? Panyaki mwakhumbikanga kukumana dankha ndi abwana ŵinu kuti muŵapemphi kuti muŵelukengi liŵi pa zuŵa la maunganu. Mumukonkhoskiyengi yo musambira nayu Bayibolu mo mungwambiya kumuthemba ukongwa Yehova mwati mwawona kuti watumbika vo mukusankha.

12. (a) Ntchifukwa wuli tikhumbika kuluta ndi apharazgi akupambanapambana ku sambiru lidu? (b) Kumbi mungagwiriskiya wuli ntchitu mavidiyo kuti muwovyi wakusambira winu? Kambani chakuyeruzgiyapu.

¹² Yo musambira nayu Bayibolu wangayanduwa so asani watuvwa mo Akhristu anyinu angusinthiya vinthu kuti ateŵetiyengi Yehova. Mwaviyo, asani muluta ku sambiru linu mulutengi ndi apharazgi akupambanapambana. Muŵapemphengi kuti amukonkhoskiyengi yo musambira nayu mo angusambiriya uneneska kweniso vo anguchita kuti asinthi vinthu pa umoyu wawu. Kusazgiyapu yapa, mungamuwonesa mavidiyo ngo nge pa chigaŵa chakuti “Sambirani Vinandi” pamwenga “Fufuzani” mubuku la Kondwani ndi Umoyu Kwamuyaya! Mwakuyeruzgiyapu, asani musambira nayu sambiru 37, mungawonere vidiyo yakuti Yehova Watipasengi Vinthu vo Tikhumbika, ndipu pavuli paki mungakambiskana fundu zo ze mu vidiyo yeniyi.

WOVYANI WO MUSAMBIRA NAWU KUZIŴA VO ANGACHITA ASANI ANYAWU ATIŴASUSKA

13. Kumbi Yesu wanguŵanozekeresa wuli akusambira ŵaki?

¹³ Yesu wangukambiya akusambira ŵaki kuti azamususkikanga ndi anyawu kweniso ŵanthu a mubanja lawu. (Mate. 5:11; 10:​22, 36) Kukumaliya kwa uteŵeti waki, Yesu wangutcheŵeska akusambira ŵaki kuti azamubayika chifukwa cha kusopa Yehova. (Mate. 24:9; Yoha. 15:20; 16:2) Iyu wanguŵachiska kuti akhumbika kuchita vinthu mwakuchenje pa uteŵeti wawu. Iyu wanguŵachiska so kuti akhumbika cha kupindana ndi ŵanthu wo atiŵasuska kweniso achitengi vinthu mwazeru kuti alutirizgi kupharazga.

14. Kumbi yo tisambira nayu Bayibolu tingamunozgekeresa wuli? (2 Timote 3:12)

¹⁴ Nge Yesu, tingakonkhoske yo tisambira nayu Bayibolu vo anyaki a ku ntchitu, mabwezi ngaki kweniso ŵanthu a mubanja laki angakamba ndipuso kuchita chifukwa chakuti wasambira Bayibolu. (Ŵerengani 2 Timote 3:12.) Anyaki angamuseka chifukwa chakuti watesesa kugwiriskiya ntchitu vo wasambira. Ndipu abali ŵaki anyaki angakoliyana navu cha vo iyu wasambira mu Bayibolu. Mwaviyo asani yo tisambira nayu Bayibolu titimunozekeresa mwaliŵi, vingazimuwovya kuti waleki kuthera asani wasuskika.

15. Kumbi ndi vinthu wuli vo vingawovya yo musambira nayu asani wasuskika ndi ŵanthu a mubanja laki?

¹⁵ Asani yo musambira nayu wasuskika ndi ŵanthu a mubanja laki, mumuwovyengi kuziŵa chifukwa cho abali ŵaki akwiyiya. Vingachitika kuti abali ŵaki angayamba kuŵanaŵana kuti walandizgika pamwenga atinkhana waka ndi Akaboni aku Yehova. Yesu nayu ŵanthu a mubanja laki akondwanga cha ndi vo wachitanga. (Mariko 3:21; Yohane 7:5) Musambizengi yo musambira nayu kuti wachitengi vinthu mwakuzikira kweniso mwaulemu ndi ŵanthu, kusazgapu ŵanthu a mubanja laki.

16. Kumbi tingaŵawovya wuli wo tisambira nawu kuti apharazgengi mwaulemu?

¹⁶ Mukambiyengi yo musambira nayu kuti wakhumbika cha kuŵakonkhoske chechosi pa nyengu yimoza ŵanthu a mubanja laki chinanga kuti angalongo kuti akhumba kuziŵa vinandi. Asani wangaŵakonkhoske vinthu vinandi, angakhumba cha kuzivwisiya so zuŵa linyaki. Mwaviyo, mumuchiskengi kuti waŵakambiyengi mu nthowa yakuti azivwisiyi so zuŵa linyaki. (Ako. 4:6) Panyaki wangaŵakambiya kuti asere pa webusayiti yidu ya jw.org. Ivi vingaŵawovya kuti asambiri vinandi vakukwaskana ndi Akaboni aku Yehova pa nyengu yo angayanja.

17. Kumbi mungamuwovya wuli yo musambira nayu Bayibolu kuziŵa mo wangamukiya mafumbu ngakukwaskana ndi Akaboni aku Yehova? (Wonaniso chithuzi.)

¹⁷ Mumuwovyengi yo musambira nayu Bayibolu kuti walekengi kusuzgika kumuka mafumbu ngo anyaki aku ntchitu pamwenga abali ŵaki angamufumba. Mwakuyeruzgiyapu, mungamusambiza mo wangagwiriskiya ntchitu nkhani zo zisanirika pachigaŵa chakuti “Mafumbu ngo Ŵanthu Afumba Kaŵikaŵi” pa jw.org. (2 Timo. 2:​24, 25) Kweniso asani mwamaliza kusambira nayu sambiru lelosi mubuku la Kondwani ndi Umoyu Kwamuyaya!, mukambiskanengi nayu chigaŵa chakuti “Ŵanthu Anyaki Akamba Kuti.” Mumuchiskengi kuti wayeseriyengi mo wangachimukiya ŵanthu. Mungamuwovya kuziŵa mo wangakonkhoske mwakuvwika umampha vo wagomezga. Asani muyesesa kuyesere nayu limoza mo wangamukiya, wangasuzgika cha kukonkhoske ŵanthu vo wagomezga kweniso vifukwa vo wagomezge fundu zo.

18. Kumbi mungachita wuli kuti mumuchiski yo musambira nayu Bayibolu kuti waje mupharazgi wambula kubatizika? (Mateyu 10:27)

¹⁸ Yesu wanguchiska akusambira ŵaki kuti apharazgengi pakweru uthenga wamampha. (Ŵerengani Mateyu 10:27.) Asani yo musambira nayu Bayibolu wayamba kupharazga, vingamuwovya kuti wamuthembengi ukongwa Yehova. Kumbi mungachita wuli kuti mumuwovyi yo musambira nayu Bayibolu kuti wayambi kupharazga? Asani pa mpingu paperekeka chipharazgu chakukwaskana ndi ntchitu yinyaki yapade yakupharazga, mungamuchiska kuti waŵanaŵaniyepu vo wangachita kuti nayu waje wakwenere kuja mupharazgi. Mukonkhoskiyeni kuti kanandi vituŵa vipusu ukongwa kupharazga pa nyengu ya ntchitu yapade yakupharazga. Mungamuchiska so kuti walembesi kuti wayambi kukamba nkhani pa maunganu nga mukati mwa sabata. Asani wangalembesa, vingamuwovya kuti waziŵiliyi mo wangachikonkhoske vo wagomezga.

MUNGAŴAKAYIKIYANGA CHA WO MUSAMBIRA NAWU BAYIBOLU

19. Kumbi Yesu wangulongo wuli kuti waŵakayikiyanga cha akusambira ŵaki, nanga isi tingamuyezga wuli?

¹⁹ Yesu wechendaluti kuchanya, wangukambiya akusambira ŵaki kuti zuŵa linyaki azamukuŵa so limoza. Kweni yiwu anguwamu cha kuti wang’anamuwanga kuti nawu azamuluta kuchanya. Chinanga kuti akusambira ŵaki vinthu vinyaki avivwisanga cha, iyu waŵathembanga mbwenu. (Yoha. 14:​1-5, 8) Yesu wanguziŵa kuti asani pajumpha nyengu akusambira ŵaki azamuvwisa kuti nawu aluta kuchanya. (Yoha. 16:12) Mwakuyanana ndi Yesu, nasi tiŵalongongi akusambira ŵidu kuti titiŵakayikiya cha.

20. Kumbi mzichi waku Malawi wangulongo wuli kuti waligomezganga sambiru laki?

²⁰ Tingakayikiyanga cha kuti wakusambira widu wakhumbisiska kuchita cho ntchakwenere. Mwakuyeruzgiyapu tiyeni tikambiskani vakukwaskana ndi mzichi munyaki wa ku Malawi zina laki Chifundo. Iyu wangwamba kusambira Bayibolu ndi Alinafe yo wenga wa Katolika ndipu asambiranga buku la Kondwani ndi Umoyu Kwamuyaya! Ŵati amaliza kusambira sambiru 14, Chifundo wangumufumba Alinafe vakukwaskana ndi kugwiriskiya ntchitu vikozgu pakusopa. Alinafe wanguguŵa ndipu wangumuka kuti, “Ndivu ndamweni ndikusankha!” Alinafe wati wamuka viyo, Chifundo wangumukayikiya cha. Iyu wangulutirizga kumusambiza mwakuzikira ndipu wenga ndi chigomezgu kuti mukuluta kwa nyengu Alinafe wayambengi kuvwisa kuti kusopa vikozgu nkhuheni. Pati pajumpha myezi yimanavi, Chifundo wangufumba Alinafe fumbu lo le mu sambiru 34 lakuti “Kumbi kusambira Bayibolu kweniso vakukwaskana ndi Yehova yo ndi Chiuta wauneneska, kwakuwovyani wuli kufika sonu panu?” Chifundo wangukamba kuti, “Alinafe wangukonkhoska fundu zinandi zakukondwesa, yimoza mwa fundu zenizi yenga yakuti Akaboni achitaku cha chechosi cho Bayibolu likamba kuti ntchiheni.” Pati pajumpha waka nyengu yimanavi Alinafe wanguleka kugwiriskiya ntchitu vikozgu pakusopa ndipu wangubatizika.

21. Kumbi yo tisambira nayu Bayibolu tingamuwovya wuli kuti wayambi kuteŵete Yehova?

²¹ Chinanga kuti Yehova “ndiyu wakuzga,” isi te ndi udindu wakovya wakusambira widu kuti waluti panthazi mwauzimu. (1 Akori. 3:7) Tikhumbika kuchita vinandi kuphara waka kumukambiya vo Chiuta wakhumba kuti wachiti. Titenere kumuwovya kuti wamuyanjengi ukongwa Yehova. Tikhumbika so kumuchiska kuti walongongi kuti watanja Chiuta mwakuŵika vinthu va ufumu pamalu ngakwamba. Kweniso timusambizengi mo wangathembe Yehova asani wakumana ndi masuzgu. Ndipu asani tilongo kuti titimugomezga kuti wakhumba kuchita vo vikondwesa Yehova, vimuwovyengi kuti wasankhi kumuteŵete.