Mo Yehova Watitiwovye Kuti Tikunthiyengepu

1. Ntchifukwa wuli tikhumbika kukunthiyapu, nanga ndiyani yo wangatiwovya? (1 Peturo 5:10)

MU MAZUŴA nganu ngakumaliya, ateŵeti aku Yehova akumana ndi masuzgu ngo nyengu zinyaki ngachitiska kuti awonengi kuti angafiska cha kukunthiyapu mpaka pa umaliru. Mwakuyeruzgiyapu, anyaki atama matenda ngakulu. Anyaki, ŵe ndi chitima chifukwa chakuti munthu yo amuyanjanga wakutayika. Penipo anyaki atombozgeka ndi ŵanthu a mubanja lawu pamwenga arara aboma chifukwa cha vo agomezga. (Mate. 10:​18, 36, 37) Kweni kwali mukumana ndi masuzgu wuli pa umoyu winu, kukayika cha kuti Yehova wakuwovyeningi kukunthiyapu.—Ŵerengani 1 Peturo 5:10.

2. Kumbi ntchinthu wuli cho chitovya Akhristu kuti alutirizgi kukunthiyapu?

² Kukunthiyapu kung’anamuwa kulutirizga kuja akugomezgeka kwaku Yehova kweniso kulutirizga kumuteŵete mwalikondwa chinanga kuti tikumana ndi masuzgu, titombozgeka pamwenga tiyeseka kuti tichiti vinthu viheni. Kuti tilutirizgi kukunthiyapu, tikhumbika kugomezga kuti vinthu viŵengi umampha kunthazi. Kweni pakutija, tingafiska cha kukunthiyapu. Mumalu mwaki, tithemba Yehova yo watitipaska “nthazi yakujumpha yo tituŵa nayu” kuti watiwovyi kukunthiyapu. (2 Akori. 4:7) Munkhani iyi, tikambiskanengi vinthu vinayi vo Yehova watipaska vo vititiwovya kuti tikunthiyengepu. Tikambiskanengi so vo tingachita kuti vinthu venivi vitiwovyengi nadi.

PEMPHERU

3. Ntchifukwa wuli tikamba kuti pempheru ndi nthowa yapade ukongwa yo tikambiskiyana ndi Yehova?

³ Yehova wakutipaska mphasu ya pempheru. Ndipu mphasu yeniyi ntchinthu chapade ukongwa cho chititiwovya kuti tikunthiyengepu. Chinanga kuti ndisi ŵanthu ambula kufikapu, kweni tikambiskana nayu kuziya mupempheru ndipuso iyu watitivwisiya. (Ahe. 4:16) Aŵanaŵaniyani ivi: Isi tingapemphera kwaku Yehova nyengu yeyosi kweniso tingamukambiya chechosi. Iyu wavwisiya mapempheru ngidu muchineneru chechosi kweniso kwekosi ko tingaŵa kwali te kwaku tija pamwenga te mujeri. (Yona 2:​1, 2; Machi. 16:​25, 26) Asani tifipa mtima ukongwa mwakuti titondeka kukonkhoska vo tikhumba, Yehova watitivwisa ndipu waziŵa vo tikhumba kukamba. (Aro. 8:​26, 27) Kukamba uneneska, pempheru ndi nthowa yapade ukongwa yo tikambiskiyana ndi Yehova!

4. Ntchifukwa wuli tingakamba kuti kupempha Yehova kuti watiwovyi kukunthiyapu, kukoliyana ndi khumbu laki?

⁴ Kuziya mu Mazu ngaki, Yehova watitisimikiziya kuti “chechosi cho tingapempha mwakukoliyana ndi khumbu laki watitivwa.” (1 Yoha. 5:14) Kumbi tingamupempha Yehova kuti watiwovyi kukunthiyapu? Hinya. Kuchita viyo, kukoliyana ndi khumbu laki. Tikamba viyo chifukwa chakuti asani tikunthiyapu mayeseru, vitovya kuti Yehova wamuki Satana Dyaboli yo watimunyoza. (Nthanthi 27:11) Kusazgapu yapa, Bayibolu likamba kuti Yehova wakhumbisiska kulongo “nthazi zaki pakovya ŵanthu wo mtima wawu ngwamphumphu kwaku iyu.” (2 Mbiri 16:9) Mwaviyo, tingasimikiza kuti Yehova we ndi nthazi kweniso wakhumbisiska kutiwovya kuti tikunthiyengepu.—Yesa. 30:18; 41:10; Luka 11:13.

5. Kumbi pempheru lititiwovya wuli kuti tije ndi chimangu chamumtima? (Yesaya 26:3)

⁵ Bayibolu likamba kuti asani tipemphera kutuliya pasi pa mtima ‘chimangu chaku Chiuta cho chiluska kuziŵa vinthu kosi, chivikiliya mitima yidu ndi maŵanaŵanu ngidu.’ (Afi. 4:7) Tiwonga ukongwa kuti ndivu Chiuta watitichitiya. Ve viyo chifukwa asani ŵanthu wo ateŵete Yehova cha akumana ndi masuzgu, atesa nthowa zakupambanapambana kuti asaniyi chimangu cha mumtima. Kweni chimangu cho Yehova watitipaska asani tapemphera, chiluska chimangu chechosi cho ŵanthu anyaki angasaniya. Asani tipemphera kwaku Yehova tilongo kuti titimuthemba ukongwa kweniso iyu watitipaska “chimangu chambula kumala.” (Ŵerengani Yesaya 26:3.) Ndipu nthowa yimoza yo Yehova watitipaskiya chimangu nkhutikumbusa fundu zakuchiska zauneneska zo tingusambira mu Mazu ngaki. Fundu zenizi zititikumbusa kuti iyu watitiyanja ukongwa kweniso wakhumba kutiwovya. Venivi vititiwovya kuti tije ndi chimangu cha mumtima.—Salimo 62:​1, 2.

6. Kumbi mungachita wuli kuti mapempheru nginu ngajengi ngamampha ukongwa? (Wonaniso chithuzi.)

⁶ Vo mungachita. Asani mwakumana ndi masuzgu ‘muponyiyengi Yehova mphingu yinu’ ndipuso mumupemphengi kuti wakupaskeni chimangu cha mumtima. (Salimo 55:22) Mumupemphengi so kuti wakupaskeni zeru kuti muziŵi vo mungachita pa suzgu lo mwakumana nalu. (Nthanthi 2:​10, 11) Asani mupempha Yehova kuti wakuwovyeni kukunthiyapu masuzgu, mungaluwanga cha kumuwonga pa vo watikuchitiyani. (Afi. 4:6) Pa nyengu yo mukumana ndi masuzgu, muŵanaŵaniyengi mo Yehova watikuwovyiyani pa suzgu lo ndipu mumuwongengi. Mungazomerezanga cha kuti masuzgu ngakutondekeseni kuwona mo Yehova watikuwovyiyani.—Salimo 16:​5, 6.

MAZU NGAKU CHIUTA

7. Kumbi kusambira Bayibolu kungatiwovya wuli kuti tikunthiyengepu?

⁷ Yehova watipaska Mazu ngaki kuti watiwovyi kukunthiyapu. Mu Bayibolu mwe malemba nganandi ngo ngatitisimikiziya kuti Yehova watiwovyengi. Mwakuyeruzgiyapu, lemba la Mateyu 6:8 likamba kuti: “Awusemwi aziŵa vo mukhumba chinanga mphanyengu yo mwechendaŵapemphi.” Yesu ndiyu wangukamba mazu yanga ndipu watimuziŵa umampha ukongwa Yehova kuluska munthu munyaki weyosi. Mwaviyo tikayika cha kuti Yehova waziŵa umampha vinthu vo tikhumbikiya pa nyengu yo tikumana ndi masuzgu. Ndipu mu Bayibolu mwe vinthu vinandi vo Yehova watilayizga vo vingatiwovya kuti tikunthiyengepu masuzgu.—Salimo 94:19.

8. (a) Kumbi ndi fundu ya mu Bayibolu niyi yo yingatiwovya kuti tikunthiyepu? (b) Kumbi ntchinthu wuli cho chingatiwovya kukumbuka fundu za mu Bayibolu asani tikhumba kuzigwiriskiya ntchitu?

⁸ Fundu za mu Bayibolu zingatiwovya kuti tikunthiyepu. Fundu zenizi zingatiwovya kuti tije ndi zeru kuti tisankhengi umampha vinthu. (Nthanthi 2:​6, 7) Mwakuyeruzgiyapu, Bayibolu lititikambiya kuti titenere cha kufipiya mtima vinthu vo vingachitika kunthazi, mumalu mwaki tithembengi ukongwa Yehova zuŵa lelosi. (Mate. 6:34) Asani titanja kuŵerenga Bayibolu zuŵa lelosi kweniso kuŵanaŵaniya vo taŵerenga, vingatiwovya kukumbuka fundu zo tikhumbikiya kuti tisankhi vinthu mwazeru pamwenga tikunthiyepu suzgu yo takumana nayu.

9. Kumbi nkhani za mu Bayibolu zingatiwovya wuli kuti tigomezgengi ukongwa kuti Yehova watiwovyengi?

⁹ Mu Bayibolu mwe nkhani za ŵanthu chayiwu wo athembanga Yehova ndipu iyu wanguŵawovya. (Ahe. 11:​32-34; Yako. 5:17) Asani tiŵanaŵaniya mo Yehova wanguŵawovye, vingatiwovya kuti nasi tigomezgengi kuti watiwovyengi. Bayibolu likamba kuti Yehova “ndi malu ngidu ngakuthaŵiyaku kweniso nthazi zidu, chovyu chakusanirikiya limu pa nyengu ya masuzgu.” (Salimo 46:1) Asani tiŵanaŵaniya mo ateŵeti akali aku Yehova angulongore chivwanu mwaku iyu kweniso kulutirizga kumuteŵete chinanga mphanyengu yo akumananga ndi masuzgu, vititiwovya kuti nasi tiŵayezgengi.—Yako. 5:​10, 11.

10. Kumbi mungachita wuli kuti Mazu ngaku Chiuta ngakuwovyeningi ukongwa?

¹⁰ Vo mungachita. Muŵerengengi Bayibolu zuŵa lelosi ndipu mulembengi pamphepeti malemba ngo muwona kuti ngangakuwovyani. Abali ndi azichi anandi atanja kupanga lemba la zuŵa ndi mulenji ndipu venivi vitiŵawovya kuti zuŵa losi aŵanaŵaniyengi fundu zo asambira. Venivi ndivu vinguwovya mzichi munyaki zina laki Mariea yo waphweriyanga anyina ndi awisi wo atamanga khansa. Kumbi ntchinthu wuli cho chingumuwovya kuti wakunthiyepu kwati kwaja myezi yimanavi kuti afwi? Iyu wangukamba kuti: “Mlenji wewosi ndaŵerenganga lemba la zuŵa mukabuku ka Kukambiskana Malemba Zuŵa Lelosi ndipu pavuli paki ndaŵanaŵaniyanga lemba lo. Venivi vingundiwovya kuti zuŵa lelosi ndiŵanaŵaniyengi ukongwa fundu za mu Malemba mumalu mwakuŵanaŵaniya ukongwa masuzgu ngo ndakumananga nangu.”—Salimo 61:2.

AKHRISTU ANYIDU

11. Ntchifukwa wuli vakuchiska kuziŵa kuti te tija cha asani tikumana ndi masuzgu?

¹¹ Yehova wakutipaska abali ndi azichi kuti atiwovyi kukunthiyapu masuzgu. Ndipu kuziŵa kuti “gulu losi la abali [ŵidu] . . . likumana ndi masuzgu ngakuyanana” ndi ngo tikumana nangu kutitisimikiziya kuti te tija cha. (1 Petu. 5:9) Mwaviyo, tikumbukengi kuti kwali tikumanengi ndi masuzgu wuli, abali ŵidu nawu akukumanapu ndi masuzgu ngo ndipu angufiska kukunthiyapu. Venivi vingatiwovya kuti nasi tikunthiyengepu!—Machi. 14:22.

12. Kumbi Akhristu anyidu angatiwovya wuli, nanga isi tingaŵawovya wuli? (2 Akorinto 1:​3, 4)

¹² Abali ndi azichi angatiwovya kuti tikunthiyengepu. Ndipu venivi ndivu vinguchitikiya wakutumika Paulo. Kanandi Paulo wawonganga Akhristu wo amuwovyanga pa nyengu yo wenga paukayidi wa panyumba ndipu wachitanga kuŵazumbuwa mazina. Yiwu amuchiskanga, amupembuzganga kweniso amupaskanga vo wakhumbikiyanga. (Afi. 2:​25, 29, 30; Ako. 4:​10, 11) Mazuŵa nganu nasi abali ndi azichi angatiwovya mu nthowa zakupambanapambana. Mwaviyo, asani tikhumbika chovyu kuti tikunthiyepu, abali ndi azichi angatiwovya. Ndipu asani nawu akhumbika chovyu, nasi tingaŵawovya.—Ŵerengani 2 Akorinto 1:​3, 4.

13. Kumbi ntchinthu wuli cho chinguwovya mzichi Maya kuti wakunthiyepu?

¹³ Abali ndi azichi angumuchiska ukongwa mzichi Maya yo waja ku Russia. Mu 2020, apolisi angufufuza munyumba yaki ndipu pavuli paki wakhumbikanga kuluta kukhoti kuti wakamuki mulandu wakukonkhoske anyaki vo wagomezga. Maya wangukamba kuti: “Pa nyengu yeniyi, abali ndi azichi andilembiyanga mameseji, makalata kweniso andimbiyanga foni. Yiwu andisimikiziyanga kuti atindiyanja ukongwa. Chinanga kuti ndaziŵanga kali kuti abali ndi azichi atindiyanja kweniso tosi te mubanja limoza, kweni kwambiya mu 2020 ndipu ndingusimikiza kuti atindiyanja nadi chifukwa cha vo angundichitiya.”

14. Kumbi tingachita wuli kuti Akhristu anyidu atiwovyengi kukunthiyapu? (Wonaniso chithuzi.)

¹⁴ Vo mungachita. Pa nyengu yo mukunthiyapu masuzgu, mbumampha kuti muchezengi kweniso muchiskanengi ndi Akhristu anyinu. Ndipu mungalekanga cha kupempha chovyu ku ŵara. Yiwu ndi “malu ngakubisamiyapu mphepu, [kweniso] malu ngakuthaŵiyaku pa nyengu ya chimphunga.” (Yesa. 32:2) Kweni mukumbukengi so kuti Akhristu anyinu nawu akumana ndi masuzgu. Mwaviyo, namwi muwovyengi anyinu wo akhumbika chovyu ndipu venivi vikuwovyeningi kuti mukondwengi kweniso mukunthiyengepu masuzgu ngo mukumana nangu.—Machi. 20:35.

CHILINDIZGA CHIDU

15. Kumbi chilindizga chingumuwovya wuli Yesu, nanga isi chititiwovya wuli? (Aheberi 12:2)

¹⁵ Yehova watipaska chilindizga chamampha ukongwa cho chititiwovya kukunthiyapu. (Aro. 15:13) Kumbukani kuti pa zuŵa lo Yesu wangubayikiya, wangukunthiyapu masuzgu ngakulu chifukwa walindizganga vinthu vamampha ukongwa vo Yehova wangumulayizga. (Ŵerengani Aheberi 12:2.) Yesu wanguziŵa kuti asani walutirizgengi kuja wakugomezgeka, viwovyengi kuti zina laku Yehova litoweseki. Yesu waziŵanga so kuti waweriyengi kuchanya kwa Awisi, ndipu asani pajumpha nyengu wamulamuliya mu Ufumu wakuchanya limoza ndi Akhristu akusankhika. Mwakuyanana ŵaka, kuŵanaŵaniya umoyu wamuyaya wo Chiuta watilayizga mucharu chifya, kungatiwovya kuti tikunthiyengepu masuzgu ngengosi ngo tingakumana nangu mucharu chaku Satana ichi.

16. Kumbi kuŵanaŵaniya vinthu vo Yehova watilayizga kungumuwovya wuli mzichi Alla kukunthiyapu, nanga musambiranji pa vo iyu wangukamba?

¹⁶ Tiyeni tiwoni mo kuŵanaŵaniya vinthu vo Yehova watilayizga kungumuwovye mzichi Alla wa ku Russia. Mulumu waki wangumangika ndi kumujaliya mujeri kuti walindizgi zuŵa la mulandu waki. Ivi vati vachitika, Alla wangukamba kuti: “Kanandi ndapempheranga kweniso ndaŵanaŵaniyanga vinthu vamampha vo Yehova watilayizga. Venivi vandiwovyanga kuti ndilekengi kuwere vuli. Ndaziŵanga kuti asani masuzgu ngenanga ngajumphapu, vinthu viŵengi umampha. Yehova waŵathereskengi arwani ŵaki ndipu nasi watipaskengi mphotu.”

17. Kumbi tingalongo wuli kuti tiwonga vinthu vo Yehova watilayizga? (Wonaniso chithuzi.)

¹⁷ Vo mungachita. Muŵanaŵaniyengi ukongwa vinthu vamampha vo Yehova watilayizga. Mujiyeruzgiyengi kuti mwe mucharu chifya ndipu muŵanaŵaniyengi mo umoyu wazamuŵiya munthazi. Venivi vikuwovyeningi kuti muwonengi kuti masuzgu ngo mukumana nangu pasonu panu “ngakanyengu kamanavi ndipuso ngapepu.” (2 Akori. 4:17) Kweniso muchitengi vosi vo mungafiska kuti mukambiyengeku anyinu vo mugomezga. Muŵanaŵaniyengi mo ŵanthu wo ateŵete Yehova cha asuzgikiya ndi umoyu. Nawu akumana ndi masuzgu nganandi kweni ativiziŵa cha vinthu vamampha vo Yehova watilayizga. Mwaviyo, asani mungaŵakonkhoske ŵaka vinthu vimanavi vakukwaskana ndi vo Yehova wazamuchita kunthazi, vingawovya kuti aje ndi mtima wakukhumba kuziŵa vinandi.

18. Ntchifukwa wuli tikhumbika kugomezga ukongwa vinthu vo Yehova watilayizga?

¹⁸ Yobu wati wakunthiyapu mayeseru nganandi, wangukambiya Yehova kuti: “Sonu ndaziŵa kuti mungafiska kuchita chechosi ndipuso kuti palivi chinthu cho yimwi mwaŵanaŵana kuti muchitengi, cho chingakutondani.” (Yobu 42:2) Yobu wanguziŵa kuti palivi cho chingatondekeska Yehova kufiska vo walayizga. Kuŵanaŵaniya fundu yeniyi, kungatiwovya kuti tikunthiyengepu. Kuti tivwisi, tiyeni tiyeruzgiyi kuti munthukazi munyaki yo watama ukongwa waguŵa chifukwa chakuti madokotala nganandi ngatondeka kuchizga matenda ngaki. Kweni pakumaliya, wakumana ndi dokotala munyaki yo watiyiziŵa umampha ntchitu yaki. Dokotala yo wayiziŵa nthenda yaki ndipu watimukambiya munkhwala wo wamupaskengi. Wati wavwa ivi, munthukazi uyu mtima waki uzika chinanga kuti patongi nyengu kuti wachiri. Venivi vitimuwovya kukunthiyapu matenda ngaki chifukwa waziŵa kuti wachirengi. Mwakuyanana ŵaka, asani nasi tiŵanaŵaniya vinthu vamampha vo tilindizga kunthazi vititiwovya kuti tikunthiyengepu.

19. Kumbi ndi vinthu wuli vo vingatiwovya kuti tikunthiyengepu?

¹⁹ Nge mo tawone munkhani iyi, Yehova watitiwovya kukunthiyapu mayeseru kuziya mu pempheru, Mazu ngaki, Akhristu anyidu kweniso chilindizga chidu. Asani tichita vosi vo tingafiska kuti vinthu venivi vitiwovyengi nadi, Yehova watiwovyengi pa masuzgu ngosi ngo tingakumana nangu mpaka pa nyengu yo ngazamumaliya.—Afi. 4:13.