Mungakayikiyanga Cha Kuti Yehova Wagowoka

1-2. Kumbi tituvwa wuli mumtima asani taziŵa kuti Yehova watigowoke? (Wonaniso chithuzi.)

FUMU Davidi yaziŵanga mo munthu wavwiya mumtima asani watijimba mulandu chifukwa cha maubudi ngo wanguchitapu kuvuli. (Salimo 40:12; 51:3; kamutu) Ve viyo chifukwa chakuti Davidi nayu wanguchitapu maubudi ngakulungakulu pa umoyu waki. Kweni iyu wangulapa kutuliya pasi pa mtima ndipu Yehova wangumugowoke. (2 Samu. 12:13) Davidi wangwamba kukondwa wati waziŵa kuti Yehova wamugowoke.—Salimo 32:1.

² Mwakuyanana ndi Davidi, tingayamba kukondwa asani taziŵa kuti Yehova watigowoke. Vakuchiska ukongwa kuziŵa kuti Yehova ngwakunozgeka kutigowoke maubudi ngidu chinanga ngangaŵa ngakulu wuli. Iyu wachita venivi asani talapa ndi mtima wosi, tasumuwa maubudi ngidu kweniso titesesa kuti tileki kuwerezapu so vo tingunangisa! (Nthanthi 28:13; Machi. 26:20; 1 Yoha. 1:9) Tikondwa so ukongwa kuziŵa kuti iyu wagowoke limu mwakuti asani watigowoke vija nge kuti ubudi wo unguchitika cha!—Ezeki. 33:16.

3-4. Kumbi mzichi munyaki wajivwanga wuli wati wabatizika, nanga tikambiskanengenji munkhani iyi?

³ Kweni nyengu zinyaki, anyaki vitiŵasuzga kuzomereza kuti Yehova wagowoka nadi. Venivi ndivu vinguchitikiya Jennifer yo wangulereke mu uneneska. Weche wachinyamata, iyu wachitanga mijalidu yabwekabweka kweni mwakubisa. Pati pajumpha vyaka, iyu wangusintha ndipu wangujipereka kwaku Yehova ndi kubatizika. Iyu wangukamba kuti: “Ndeche wachinyamata, ndayanjanga ukongwa vinthu vakuliŵavu, ndachitanga ureŵi, ndamwanga ukongwa moŵa ndipuso ndasweranga cha kukwiya. Ndaziŵanga kuti chifukwa cha sembi yaku Yesu, Yehova wangandigowoke maubudi ngangu asani ndalapa. Kweni chinanga kuti ndingulapa ndi kupempha Yehova kuti wandigowoke, mumtima ndakayikiyanga asani wakundigowoke nadi.”

⁴ Kumbi namwi nyengu zinyaki vitikusuzgani kugomezga kuti Yehova wakukugowokiyani maubudi ngo munguchita kuvuli? Ziŵani kuti Yehova ngwalisungu ndipu wakhumba kuti tikondwengi nge mo Davidi wangukondwe wati waziŵa kuti Yehova wagowoke nadi. Munkhani iyi, tiwonengi chifukwa cho titenere cha kukayikiya kuti Yehova wagowoka kweniso vo vingatiwovya kuti tilekengi kukayikiya.

NTCHIFUKWA WULI MUTENERE CHA KUKAYIKIYA KUTI YEHOVA WAGOWOKA?

5. Kumbi Satana wakhumba kuti tigomezgengenji? Kambani chakuyeruzgiyapu.

⁵ Asani tikayika cha kuti Yehova watitigowoke, vititiwovya kuti tileki kuwira muchiŵana chaku Satana. Satana watesesa kuchita vosi vo wangafiska kuti watilekesi kuteŵete Yehova. Kuti wafiski kuchita venivi, iyu watitichitiska kuti tikayikiyengi kuti Yehova wangatigowoke nadi maubudi ngidu. Kumbukani vo vinguchitikiya munthu munyaki ku Korinto yo wangumikika dankha mumpingu chifukwa cha ureŵi. (1 Akori. 5:​1, 5, 13) Iyu wati wawezeke mumpingu, Satana wakhumbanga kuti abali ndi azichi aleki kumugowoke ndipuso kuchitiya nayu vinthu limoza. Satana wanguchita venivi kuti munthu uyu wajivwengi kuti Chiuta wakumugowoke cha kweniso kuti ‘chitima chikulu chimumezi’ ndi chilatu chakuti waleki kuteŵete Yehova. Satana wakusintha cha, iyu wakhumba kuti nasi tikayikiyengi kuti Yehova wangatigowoke. Kweni isi “mauryarya ngaki titingaziŵa umampha.”—2 Akori. 2:​5-11.

6. Kumbi tingachita wuli kuti tilekengi kujimba mulandu kwa nyengu yitali chifukwa cha vo tingunangisa?

⁶ Asani tikayika cha kuti Yehova watitigowoke, vititiwovya kuti tilekengi kujimba mulandu. Asani tabuda, titijimba mulandu chifukwa cha vo tanangisa. (Salimo 51:17) Kuchita viyo nkhwamampha chifukwa njuŵi yidu yingatichitiska kuti tinozgi vo tingunangisa. (2 Akori. 7:​10, 11) Kweni asani titijimba mulandu kwa nyengu yitali chinanga kuti tikulapa ubudi wo, tingawere vuli ndi kuleka kuteŵete Yehova. Kweni asani tikayikiya cha kuti Yehova wakutigowoke, tingaleka kujimba mulandu. Venivi vingatiwovya kuti titeŵetiyengi Yehova ndi njuŵi yituŵa kweniso mwalikondwa. (Ako. 1:​10, 11; 2 Timo. 1:3) Sonu kumbi tingachita wuli kuti tigomezgengi kuti Chiuta wakutigowoke nadi?

VO VINGATIWOVYA KUTI TILEKENGI KUKAYIKA KUTI YEHOVA WAGOWOKA

7-8. Kumbi Yehova wangujikonkhoska wuli kwaku Mozesi, nanga venivi vititisimikiziyanji? (Ekisodo 34:​6, 7)

⁷ Muŵanaŵaniyengi mo Yehova wakujikonkhoske. Mwakuyeruzgiyapu, kumbukani vo Yehova wangukambiya Mozesi pa Phiri la Sinayi.a (Ŵerengani Ekisodo 34:​6, 7.) Chinanga kuti Yehova we ndi mijalidu yinandi, kweni wangukambiya Mozesi kuti iyu ndi “Chiuta walisungu kweniso wawezi.” Kumbi vingachitika kuti Chiuta yo we ndi mijalidu yeniyi watondeki kugowoke mteŵeti waki yo walapa kutuliya pasi pa mtima? Awa vingachitika cha! Kuchita viyo kungalongo kuŵavi lisungu kweniso kumila mtima. Kweni ndimu Yehova waliri cha!

⁸ Yehova wakukamba kuti ngwalisungu, ndipu tikayikiya cha venivi chifukwa chakuti wapusika cha. (Salimo 31:5) Mwaviyo, tigomezgengi vo iyu wakamba. Asani vitikusuzgani kuleka kujimba mulandu chifukwa cha maubudi ngo mukuchita kuvuli, mujifumbengi kuti: ‘Kumbi ndigomezga nadi kuti Yehova ndi Chiuta walisungu kweniso wawezi yo wagowoke munthu weyosi yo walapa?’ Asani mugomezga venivi, ndikuti mutenere cha kukayikiya kuti namwi wakukugowokiyani.

9. Kumbi mazu ngakuti Yehova wagowoka maubudi ngang’anamuwanji? (Salimo 32:5)

⁹ Muŵanaŵaniyengi vo ŵanthu wo akulemba Bayibolu akukonkhoska vakukwaskana ndi kugowoka kwaku Yehova. Mwakuyeruzgiyapu, tiyeni tiwoni vo Davidi wakukonkhoska vakukwaskana ndi kugowoka kwaku Yehova. (Ŵerengani Salimo 32:5.) Davidi wangukamba kuti: “Yimwi mungundigowoke maubudi ngangu.” Mazu nga Chiheberi ngo akungafwatuliya kuti “kugowoka” pa lemba ili, ngangang’anamuwa “kunyamuwa” pamwenga “kupinga.” Yehova wati wagowoke Davidi venga nge kuti wanyamuwa maubudi ngaki ndi kungataya kutali ndi iyu. Mwaviyo, Davidi wangujivwa nge kuti wathula katundu muzitu yo wamufyonga. (Salimo 32:​2-4) Nasi tingayamba kujivwa nge mo Davidi wanguvwiya. Asani talapa nadi kutuliya pasi pa mtima, tikhumbika cha kulutirizga kujimba mulandu pa maubudi ngo, chifukwa Yehova wakunganyamuwa ndi kungataya kutali ndi isi.

10-11. Kumbi mazu ngakuti Yehova ‘ngwakunozgeka kugowoka’ ngatitisambizanji vakukwaskana ndi iyu? (Salimo 86:5)

¹⁰ Ŵerengani Salimo 86:5. Pa lemba ili Davidi wangukamba kuti Yehova ‘ngwakunozgeka kugowoka.’ Venivi ving’anamuwa kuti Yehova wakwiya liŵi cha asani tanangisa ndipu ngwakunozgeka kugowoke ŵanthu wo alapa nadi. Kweni ntchifukwa wuli iyu wachita venivi? Salimo 86:5 lilutirizga kuti: “Wosi wo adaniya paku yimwi, mutiŵalongo chanju chikulu chambula kumala.” Nge mo tingusambiriya munkhani yajumpha, chifukwa cha chanju chaki chambula kumala, Yehova watiŵayanja ukongwa ateŵeti ŵaki akugomezgeka ndipu watiŵajowo cha. Chifukwa cha chanju chaki chenichi, iyu ‘watiŵagowoke ndi mtima wosi’ wo alapa. (Yesa. 55:​7, mazu ngamumphata) Asani vitikusuzgani kugomezga kuti Chiuta wakukugowokiyani nadi, mujifumbengi kuti: ‘Kumbi ndigomezga kuti Yehova ngwakunozgeka kuŵagowoke wosi wo alapa ndipu atimupempha kuti waŵachitiyi lisungu? Asani ndigomezga venivi, kumbi pe chifukwa chakukayikiya kuti nani wandigowokiyengi asani ndamupempha kuti wandichitiyi lisungu?’

¹¹ Bayibolu lititikambiya kuti Yehova watitivwisa umampha chifukwa te ŵanthu ambula kufikapu. Tichiskika chifukwa chakuziŵa venivi. (Salimo 139:​1, 2) Fundu yeniyi yisanirika mu salimo linyaki lo likulembeka so ndi Davidi ndipu lititiwovya kuti tilekengi kukayikiya kuti Yehova wagowoka nadi.

MUNGALUWANGA CHA VO YEHOVA WAKUMBUKA

12-13. Mwakukoliyana ndi Salimo 103:​14, kumbi Yehova wakumbukanji, nanga venivi vitimuchitiska kuti wachitengenji?

¹² Ŵerengani Salimo 103:14. Davidi wangukamba kuti Yehova “wakumbuka kuti te fuvu.” Yapa Davidi wangulongo chifukwa chinyaki cho chichitiska Yehova kuti wajengi wakunozgeka kugowoke wo alapa. Chifukwa chaki ntchakuti wakumbuka kuti te akubuda. Kuti tivwisi fundu yeniyi, tiyeni tikambiskani vo mazu ngo Davidi wangulemba pa vesi ili ngang’anamuwa.

¹³ Davidi wangukamba kuti Yehova “waziŵa umampha mo tikupangikiya.” Yehova wangupanga Adamu “kutuliya kufuvu.” (Gene. 2:7) Mwaviyo, waziŵa umampha mo taŵanthu tikupangikiya kweniso vo tikhumbikiya. Mwakuyeruzgiyapu, tikhumbika kurya, kugona kweniso kututa. Chinanga mbanthu akufikapu nawu, angaja cha ndi umoyu kwambula vinthu venivi. Kweni Adamu ndi Heva ŵati abuda, mazu ngakuti taŵanthu tikutuliya kufuvu ngangwamba kung’anamuwa so vinthu vinyaki. Pakuti te ŵana ŵawu, tiziŵika so kuti te fuvu chifukwa chakuti tikuhara ubudi wo uchitiska kuti tichitengi vinthu viheni. Chinanga kuti Yehova waziŵa kuti te akubuda, kweni wonani kuti Davidi wangulemba kuti Yehova “wakumbuka” venivi nyengu zosi. Mazu nga Chiheberi ngo akungafwatuliya kuti kukumbuka pa vesi ili, ngang’anamuwa kukumbuka ŵaka cha, kweni kuchitapu so kanthu. Mwaviyo, vo Davidi wangukamba pa vesi ili, vingakambika so kuti: Yehova waziŵa kuti nyengu zinyaki tinganangisa, ndipu asani tanangisa iyu ngwakunozgeka kutigowoke asani talapa kutuliya pasi pa mtima.—Salimo 78:​38, 39.

14. (a) Kumbi Davidi wangukambanji so vakukwaskana ndi kugowoka kwaku Yehova? (Salimo 103:12) (b) Kumbi chakuyeruzgiyapu cho Davidi wangukamba chilongo wuli kuti asani Yehova wagowoka wakumbuka so cha? (Wonani bokosi lakuti, “Yehova Wagowoka Kweniso Waluwa.”)

¹⁴ Kumbi ntchinthu wuli chinyaki cho chingatiwovya kuti tilekengi kukayikiya kuti Yehova wagowoka nadi? (Ŵerengani Salimo 103:12.) Davidi wangukamba kuti asani Yehova watigowoke, waŵika maubudi ngidu kutali “nge mo ulili utali wa pakati pa ko kutuliya lumwi [kuvuma] ndi ko liselere [kuzambwi].” Nge mo tiziŵiya, kuvuma nkhutali ukongwa ndi kuzambwi ndipu vingachitika cha kuti kuvuma ndi kuzambwi kukumani. Kumbi fundu yeniyi yititisambizanji vakukwaskana ndi kugowoka kwaku Yehova? Pakukonkhoska vesi lenili, buku linyaki lingukamba kuti vo Chiuta wachita asani watuzgapu maubudi ndi kungataya kutali ukongwa, viyanana ŵaka ndi kumalisiya limu fungu la chinthu chinyaki. Nge mo tiziŵiya, fungu la chinthu chinyaki lingatikumbusa vinthu vo vingutichitikiyapu pa umoyu. Kweni nge mo tawone, asani Yehova watigowoke vija nge kuti watuzgiyapu limu fungu lo lingamuchitiska kuti wakumbuki so ubudi wo tinguchita ndi kutimba mulandu. Mwaviyo titenere kusimikiza kuti iyu watingaŵanaŵaniya so cha maubudi ngo watigowoke ndipuso wazakutikumbusapu cha.—Ezeki. 18:​21, 22; Machi. 3:19.

15. Kumbi tikhumbika kuchitanji asani techekujimba mulandu pa vo tingunangisapu kuvuli?

¹⁵ Kumbi vo Davidi wangukamba mu Salimo 103 vititiwovya wuli kuti tilekengi kukayikiya kuti Yehova wagowoka? Asani titijimba mulandu ukongwa pa vinthu vo tingunangisapu kuvuli, tijifumbengi kuti: ‘Kumbi ndiluwa vo Yehova wakumbuka, kung’anamuwa kuti iyu wakumbuka kuti ini nde fuvu kweniso kuti wagowoke munthu weyosi yo walapa kutuliya pasi pamtima? Kweniso kumbi ndikumbuka vo Yehova waluwa, kung’anamuwa kuti ndikumbuka maubudi ngo iyu wakundigowoke mwakuti wazakundimba mulandu so cha chifukwa cha maubudi ngo?’ Yehova wajaliya ŵaka kuŵanaŵaniya vo tikunangisapu kuvuli cha. Mwaviyo nasi titenere cha kuviŵanaŵaniya. (Salimo 130:3) Asani tigomezga kuti Yehova wagowoka, tilekengi kujimba ukongwa mulandu pa vo tingunangisapu ndipu venivi vitiwovyengi kuti tilutirizgi kuteŵete Yehova mwalikondwa.

16. Kambani chakuyeruzgiyapu cho chilongo uheni wakujaliya ŵaka kuŵanaŵaniya vinthu vo tingunangisa kuvuli. (Wonaniso chithuzi.)

¹⁶ Ŵanaŵaniyani chakuyeruzgiyapu ichi. Asani munthu watendesa galimotu, nyengu zinyaki wangakhumbika kulereska pa gilasi lo litimuwovya kuwona vinthu vakuvuli. Kweni asani wajaliya ŵaka kulereska pagilasi lenili, vingachitiska kuti wachiti ngozi. Mwaviyo, kuti wakafiki umampha ko waluta, wakhumbika kulereska kunthazi. Mwakuyanana ŵaka, nyengu zinyaki nkhunanga cha kuŵanaŵaniya vinthu vo tingunangisapu kuvuli. Venivi vingatiwovya kuti tisambirepu kanthu kweniso kuti tileki kuwereza so ubudi wo. Kweni asani tijaliya ŵaka kuŵanaŵaniya maubudi ngo Yehova wakutigowoke kali, vingatichitiska kuti tileki kuteŵete umampha Yehova. Mwaviyo, tiŵikengi maŵanaŵanu ngidu ngosi pa kuteŵete Yehova kweniso tiŵanaŵaniyengi vinthu va munthazi vo Yehova watilayizga pa nyengu yo vinthu viheni ‘vazamukumbukika so cha.’—Yesa. 65:17; Nthanthi 4:25.

LUTIRIZGANI KUGOMEZGA KUTI YEHOVA WAGOWOKA

17. Ntchifukwa wuli tikhumbika kulutirizga kugomezga kuti Yehova watitiyanja kweniso kuti wagowoka?

¹⁷ Tikhumbika kulutirizga kugomezga kuti Yehova watitiyanja kweniso wagowoka. (1 Yoha. 3:19) Chifukwa wuli? Chifukwa chakuti Satana walutirizgengi kutichitiska kuti tigomezgengi kuti te akubuda ukongwa mwakuti Yehova wangatiyanja cha kweniso wangatigowoke cha. Satana wachita venivi kuti watilekesi kuteŵete Yehova. Ndipu iyu walutirizgengi kuchita venivi chifukwa chakuti waziŵa kuti waja ndi kanyengu kamanavi ukongwa. (Chivu. 12:12) Kweni tingazomerezanga cha kuti iyu wawini!

18. Ntchinthu wuli cho chingakuwovyani kuti mugomezgengi kuti Yehova watikuyanjani kweniso wagowoka?

¹⁸ Kuti mugomezgengi kuti Yehova watikuyanjani nadi, gwiriskiyani ntchitu masachizgu ngo ngakonkhoskeka munkhani yajumpha. Ndipu kuti mugomezgengi kuti Yehova wagowoka, chakwamba muŵanaŵaniyengi mo Yehova watijikonkhoske. Chachiŵi, muŵanaŵaniyengi vo ŵanthu wo akulemba Bayibolu akukonkhoska vakukwaskana ndi kugowoka kwaku Yehova. Chachitatu, mungaluwanga cha kuti Yehova waziŵa kuti te ŵanthu ambula kufikapu kweniso wachita nasi vinthu mwalisungu. Ndipu chakumaliya mukumbukengi kuti asani Yehova wagowoka, wagowoka nadi ndipu watingakumbuka so cha maubudi ngo. Kuchita venivi kukuwovyeningi kuti mukondwengi chifukwa mukayikiyengi cha kuti Yehova watikulongoni lisungu. Ndipu nge Davidi namwi mukambengi kuti, “Ndawonga Yehova, chifukwa chakuti mukundigowoke ‘maubudi ngangu’!”—Salimo 32:5.