Abali Asonu Ŵaŵi a mu Wupu Wakulongozga

PA UNGANU wa pachaka wo unguchitika pa 5 October 2024, pangupharazgika chipharazgu chapade chakuti: Mubali Jody Jedele ndipuso Mubali Jacob Rumph asankhika kuti ateŵetiyengi mu Wupu Wakulongozga wa Akaboni aku Yehova. Abali wosi ŵaŵi ŵenaŵa ateŵete Yehova mwakugomezgeka kwa nyengu yitali.

Mubali Jedele wakuwiya ku Missouri ku U.S.A. ndipu apapi ŵaki ŵenga Akaboni aku Yehova. Banja lawu lajanga muchigaŵa cho mwenga Akaboni aku Yehova amanavi. Chifukwa cha venivi, iyu wanguziŵana ndi abali ndi azichi anandi wo azanga kuziwovya pa ntchitu yakupharazga kwenuku. Abali ŵenaŵa ayanjananga kweniso akoliyananga ukongwa ndipu venivi vingumuchiska ukongwa. Iyu wangubatizika pa 15 October mu 1983 weche wachinyamata. Iyu wakondwanga ukongwa ndi ntchitu yakupharazga. Mwaviyo, wangwamba kuchita upayiniya wa nyengu zosi wati wamaliza ŵaka sukulu mu September 1989.

Mubali Jedele weche wachinyamata, apapi ŵaki ayanjanga kuluta nayu kuchiwona malu ku Beteli limoza ndi mzichi waki. Kuchita venivi kunguŵawovya wosi ŵaŵi kuti aje ndi chilatu chakuti aziteŵetiyengi pa Beteli ndipu angufiska nadi venivi. Mubali Jedele wangwamba kuteŵete pa Beteli ku Wallkill mu September 1990. Pakwamba iyu wateŵetiyanga mu Dipatimenti Yakutowesa Malu ndipu pavuli paki wateŵetiyanga mu Dipatimenti Yachipatala.

Pa nyengu yeniyi, mipingu yapafupi ya Chisipanishi yakuwanga ukongwa ndipu mwakhumbikanga abali. Mwaviyo, Mubali Jedele wangwamba kuwungana mu mpingu wa Chisipanishi kweniso wangwamba kusambira chineneru chenichi. Pati pajumpha nyengu yimanavi, iyu wangukumana ndi mzichi Damaris yo wachitanga upayiniya mudera lenili. Pavuli paki, yiwu angutorana ndipu Damaris nayu wangwamba kuteŵete pa Beteli.

Mu 2005 yiwu anguleka uteŵeti wa pa Beteli kuti akaphweriyengi apapi ŵawu. Pa nyengu yeniyi, yiwu achitanga upayiniya wa nyengu zosi. Mubali Jedele wasambizanga Sukulu ya Uteŵeti wa Upayiniya kweniso wateŵetiyanga mu Komiti Yakukambiskana ndi Madokotala kweniso Komiti Yakuwonere Ntchitu Zakuzenga ya Chigaŵa.

Mu 2013, Mubali ndi Mzichi Jedele angudanika so kuti akateŵetiyengi pa Beteli kuti akawovyi pa ntchitu yakuzenga yo yachitikanga ku Warwick. Kwambiya pa nyengu yeniyi, yiwu ateŵetiyapu so ku Patterson ndi ku Wallkill. Mubali Jedele wanguteŵetiyapu mu Dipatimenti ya LDC kweniso mu Dipatimenti Yakusambiza va Chipatala. Mu March 2023, iyu wangusankhika kuti wateŵetiyengi nge wakovya Komiti Yakuwonere Uteŵeti. Asani wakumbuka mauteŵeti ngo wachitapu, iyu wangukamba kuti: “Asani wapaskika uteŵeti wasonu, nyengu zinyaki ungachita mantha kuti uwufiskengi cha. Kweni pa nyengu yeniyi ndipu utenere kuthemba Yehova chifukwa iyu ndiyu watitiwovya kufiska chechosi cho watipempha kuti tichiti.”

Mubali Rumph wakuwiya ku California ku U.S.A. Weche munamana, anyina ŵenga mupharazgi wakulopwa kweni ayesesanga kumusambiza uneneska. Kweniso chaka chechosi walutanga kuchiwona ambuyaki wo ŵenga Kaboni wakugomezgeka. Yiwu angumuwovya kuti wawuyanjengi ukongwa uneneska, ndipu wati wafika vyaka 13 wanguŵakambiya kuti wakhumba kwamba kusambira Bayibolu. Mwaviyo, iyu wangubatizika pa 27 September 1992 weche wachinyamata. Vakukondwesa kuti anyina angwamba so kuwungana kweniso kupharazga. Ndipu awisi kweniso abali ŵaki nawu anguluta panthazi mwauzimu mpaka kubatizika.

Po wenga wachinyamata Mubali Rumph wawonanga mo apayiniya akondwiyanga ndi uteŵeti. Mwaviyo wati wamaliza sukulu, wangwamba kuchita upayiniya mu September 1995. Mu 2000, iyu wangusamiya ku Ecuador kuti wakateŵetiyengi kuchigaŵa ko kwakhumbikanga apharazgi anandi. We kwenuku, wangukumana ndi mzichi Inga, yo wachitanga upayiniya kwenuku kweni kwawu kwenga ku Canada. Ndipu pati pajumpha nyengu, angutorana. Ŵati atorana ŵaka ateŵetiyanga mutawuni yinyaki ya ku Ecuador ko kwenga kagulu kamanavi ka apharazgi. Kweni sonu, kwe mpingu ukulu ndipu mwe apharazgi aphamphu.

Pati pajumpha nyengu, Mubali ndi Mzichi Rumph angusankhika kuti ateŵetiyengi nge apayiniya apade ndipu pavuli paki angwamba kwende dera. Mu 2011 yiwu angudanika kuti akasere Sukulu ya Giliyadi kilasi nambala 132. Ŵati amaliza sukulu yeniyi, anguchiteŵete muvyaru vakupambanapambana kweniso anguchitaku mauteŵeti ngakupambanapambana nge uteŵeti wa pa Beteli, umishonale kweniso kwende dera. Mubali Rumph wanguteŵetiyapu so nge mlangizi wa Sukulu ya Apharazgi a Ufumu.

Chifukwa cha mulili wa COVID-19, Mubali ndi Mzichi Rumph anguwere ku United States. Yiwu angudanika kuti akateŵetiyengi pa Beteli ku Wallkill ko Mubali Rumph wasambizikanga ntchitu mu Dipatimenti ya Uteŵeti. Pati pajumpha nyengu, yiwu anguwere so ku Beteli ya ku Ecuador ko Mubali Rumph wateŵetiyanga mu Komiti ya Nthambi. Mu 2023 yiwu angupempheka kuti aluti ku Warwick. Ndipu mu January 2024, Mubali Rumph wangwamba kuteŵete nge wakovya Komiti Yakuwonere Uteŵeti. Asani waŵanaŵaniya malu ngo wateŵetiyaku, iyu wangukamba kuti, “Cho chichitiska kuti uteŵeti uje wapade ndi malu ngo uteŵete cha kweni ŵanthu wo uteŵete nawu.”

Titiŵawonga ukongwa abali ŵenaŵa chifukwa agwira ntchitu mwaphamphu ndipu tilutirizga “kuŵatumbika ukongwa [abali] aviyo.”—Afi. 2:29.