Mubali Wasonu Wa Mu Wupu Wakulongozga

PA Chitatu ndi mulenji pa 24 January, 2018, abali ndi azichi wo ateŵete pa Beteli ku United States ndi ku Canada angukondwa kuvwa chipharazgu chakuti: Mubali Kenneth Cook, Jr., wasankhika kuja yumoza wa mu Wupu Wakulongozga wa Akaboni aku Yehova.

Mubali Cook wanguwiya ku Pennsylvania, mucharu cha U.S.A. Munyaki yo wasambiranga nayu sukulu ndiyu wangumusambiza uneneska kwati kwaja kamanavi kuti wamalizi. Iyu wangubatizika pa 7 June, 1980. Mubali Cook wangwamba kuchita upayiniya wa nyengu zosi pa 1 September, 1982. Wati wachita upayiniya kwa vyaka viŵi, angumudana ku Beteli. Iyu wangwamba kuchita uteŵeti uwu pa 12 October , 1984 mutawuni ya Wallkill ku New York.

Kwa vyaka 25, mubali Cook wanguteŵete mumadipatimenti ngakupambanapambana kusazgapu dipatimenti yakupurinta mabuku. Iyu wangutorana ndi Jamie mu 1996 ndipu nayu wangwamba kuteŵete pa Beteli ya ku Wallkill. Mu December 2009, mubali ndi mzichi Cook anguŵatuma ku Patterson, New York ko kuchitikiya masukulu nga gulu laku Yehova. Ŵati afika, Mubali Cook angumukambiya kuti wateŵetiyengi mu Dipatimenti Yakumuka Makalata. Yiwu anguwere so ku Wallkill ko angujaku kwa nyengu yimanavi. Ndipu mu April 2016 Mubali ndi Mzichi Cook anguŵakambiya kuti aluti ku Brooklyn, New York. Pati pajumpha myezi 5, anguluta ku likulu lidu mutawuni ya Warwick ku New York. Mu January 2017, Mubali Cook angumusankha kuti wawovyengi mu Komiti Yakuwonere Ntchitu Yakulemba ya Wupu Wakulongozga.