Ntchifukwa Wuli Ndikhumbika Kupepesa?

Asani mwenga yimwi, kumbi mwatingi muchitengi wuli mu vakuchitika ivi?

1. Musambizi winu watikukalipiyani chifukwa chakuti mwachitanga chiwawa mukilasi.

   Kumbi mungamupepesa musambizi winu chinanga kuti muwona kuti wanguchita vinthu mwakujumpha mwesu?

2. Mubwezi winu waziŵa kuti mungukamba vinthu viheni vakukwaskana ndi iyu.

   Kumbi mungamupepesa mubwezi winu chinanga kuti muwona kuti vo mungukamba venga vauneneska?

3. Awisemwi akukwiyiskani ndipu vachitiska kuti mulongoro mwambula ulemu.

   Kumbi mungaŵapepesa awisemwi chinanga kuti muwona kuti yiwu ndiwu anangisa?

Kwamuka kwa mafumbu ngosi yanga nkhwakuti hinya. Kweni ntchifukwa wuli mukhumbika kukamba kuti “pepani” chinanga kuti muwona kuti mwenga ndi vifukwa vakuvwika vakuchitiya vo munguchita?

• Ntchifukwa wuli ndikhumbika kupepesa?

• Kumbi ndingapepesa wuli?

• Vo achinyamata anyinu akamba

Ntchifukwa wuli ndikhumbika kupepesa?

• Kupepesa kulongo kuti munthu ngwakukhwima. Asani muchitapu kanthu pa vo mungukamba pamwenga kuchita, vilongo kuti mukuwa ndi mijalidu yamampha yo yazakukuwovyani asani mwakuwa.

  “Kujiyuyuwa kweniso kuzikira kungatiwovya kuti tipepesi ndi kuvwisiya vo munyidu wakhumba kukamba.”—Rachel.

• Kupepesa kutovya kuti muje pa chimangu ndi anyinu. Ŵanthu wo akamba kuti “pepani” alongo kuti akhumbisiska kuja pa chimangu ndi anyawu mumalu mwakukhumba kulongo kuti yiwu mbarunji ndipu munyawu ndiyu ngwakunanga.

  “Chinanga kuti mungaŵa kuti yimwi ndimwi mwananga cha, kweni kujalikisa chimangu ndichu chiŵengi chinthu chakwamba kwaku yimwi. Ntchakufyo cha kukamba kuti “pepani,” kweni kungawovya kuti ŵanthu ayambi so kukoliyana.”—Miriam.

• Kupepesa kungakuwovyani kuti muvwengi umampha mumtima. Kujimba mulandu chifukwa chakuti tanangiya munyidu kuziya mu vo takamba pamwenga kuchita, kungaja nge tanyamuwa chimphingu. Kweni asani tapepesa tija nge tathula mphingu yo tingunyamuwa.a

  “Nyengu zinyaki ndaŵamukanga mwambula kuŵanaŵaniyapu ama ndi ada. Ndavwanga umampha cha kweniso vandisuzganga kupepesa. Kweni asani ndapepesa ndavwanga umampha ndipu mubanja lidu mwaŵanga so chimangu.”—Nia.

  

Kumbi munthu wakhumbika kufwiyapu kuti wapepesi? Hinya! Msungwana munyaki zina laki Dena, yo wakhumbikanga kupepesa kananandi waka chifukwa waŵachitiyanga mtafu anyina, wangukamba kuti: “Chenga chipusu cha kukamba kuti ‘pepani.’ Ndavwanga nge kuti pakhosi pe chinthu ndipu mazu ngatondeka kutuwa!”

Kumbi tingapepesa wuli?

• Asani vingachitika mupepesengi pamasu ndi pamasu. Kupepesa pamasu ndi pamasu kutovya kuti munyinu wawoni kuti vo mukamba vituliya pasi pa mtima. Kweni asani mupepesa waka pa meseji, munyinu wangakugomezgani cha. Chinanga kuti vo mungalemba mungawikapu kachithuzi kakulongo kuti mwakwaskika, kweni vingalongo cha kuti mupepesa ndi mtima wosi.

  Vo mungachita: Asani mungafiska cha kupepesa munthu pamasu ndi pamasu, mungamumbiya foni pamwenga kumulembe pa khadi. Kwali mupepesengi munthowa wuli, kweni muwonesesengi kuti mwasankha mazu ngamampha.

  Fundu ya mu Bayibolu: “Mtima wa munthu murunji uŵanaŵaniyapu dankha wechendamuki.”—Nthanthi 15:28.

• Mupepesengi nyengu yeniyo. Asani muswera kupepesa, suzgu yo yingakuwa ukongwa. Ndipu ubwezi winu ndi munthu yo wakunangiyani ungatimbanyizgika ukongwa.

  Vo mungachita: Jani ndi chilatu. Mwakuyeruzgiyapu, ‘mungasankha kupepesa zuŵa lenilo.’ Sankhani nyengu yo mukhumba kupepese ndipu chitani vo mwasankha.

  Fundu ya mu Bayibolu: “Umalisengi liŵi nkhani.”—Mateyu 5:25.

• Mupepesengi kutuliya pasi pa mtima. Kukamba kuti “pepani kuti ndimu muvwiya,” nkhupepesa cha! Wachinyamata munyaki zina laki Janelle wangukamba kuti: “Munthu yo mwamunangiya wangakutumbikani asani wawona kuti muchitapu kanthu pa vo mungunangisa.”

  Vo mungachita: Mungachitanga kaseluta kaseweku cha asani mupepesa. Mungakambanga cha kuti: “Ndipepesengi pa vo ini ndingunangisa asani nawi upepesengi pa vo ungunangisa.”

  Fundu ya mu Bayibolu: “Tiyeni tilondo vinthu vo vitovya kuti paŵi chimangu.”—Aroma 14:19.