Kumbi Vingachitika Kuti Pacharu Chapasi Pachitikengi Vinthu va Urunji?

Vinthu vambula urunji ve peposi. Tiyeni tiwoni vakuwoniyapu viŵi va ŵanthu wo angumangika mwambula urunji.

• Mu January 2018, wakweruzga ku United States wangulamula kuti munthu munyaki yo wanguja mujeri vyaka pafufupi 38 watuzgiki mujeri. DNA yaki yingupereka ukaboni wakuti iyu wangupalamula mulandu wewosi cha.

• Mu September 1994, anyamata atatu ku Africa anguŵamanga chifukwa chakukana kusere usilikali chifukwa cha vo agomezga. Pakufika mu September 2020, angukwanisa vyaka 26 ŵe mujeri kwambula kuŵamba mulandu pamwenga kuchiwoneke mu khoti.

Asani namwi akukuchitiyanipu vinthu mwambula urunji, mungavwa nge mo Yobu yo wazumbulika mu Bayibolu wanguvwiya. Iyu wangukamba kuti: “Ndilutirizga kudaniriza kuti ndisaniyi chovyu, kweni palivi urunji.” (Yobu 19:7) Chinanga kuti kuchita vinthu mwaurunji kungaŵa kwakusuzga mazuŵa nganu, kweni Bayibolu lilayizga kuti yazamukwana nyengu yo ŵanthu wosi wo akhumba urunji, azakuwusaniya. Mwaviyo, fundu za mu Bayibolu zingakuwovyani pasonu panu kuti mumalani ndi vinthu vambula urunji.

Kumbi ndi vinthu wuli vo vichitiska ŵanthu kuti achitengi vinthu vambula urunji?

Vinthu vambula urunji vichitiskika ndi ŵanthu wo akana kulondo ulongozgi waku Chiuta. Bayibolu lilongo kuti urunji utuliya kwaku Chiuta. (Yesaya 51:4) Mu Bayibolu, mazu ngo akungafwatuliya kuti “urunji” kweniso “cheruzgu chambula kwanjiya” ngosi ngakoliyana. (Salimo 33:5) Asani ŵanthu achita vinthu mwakukoliyana ndi fundu zaku Chiuta vitovya kuti achitengi vinthu mwaurunji pamwenga mwakunyoroka. Kweni ŵanthu achita vinthu vambula urunji chifukwa cha ubudi, vo ving’anamuwa kuti avwiya cha fundu za urunji zaku Chiuta. Wonani vakuyeruzgiyapu ivi:

• Kujiyanja. Mtima wakujiyanja ndi ubudi vakukoliyana (Yakobe 1:14, 15) Asani ŵanthu akhumba chinthu chinyaki, anandi asaniliyapu mwaŵi kuchitiya anyawu vinthu vambula urunji. Kweni Chiuta wakhumba kuti tiŵikengi vakukhumba va anyidu pa malu ngakwamba.—1 Akorinto 10:24.

• Kuleka kuziŵa vinthu. Ŵanthu anyaki achitiya anyawu vinthu vambula urunji kwambula kuziŵa, kweni Chiuta wawona kuti kuchita viyo naku nkhunanga. (Aroma 10:3) Mwakuyeruzgiyapu, ŵanthu wo angubaya Yesu Khristu anguchita venivi chifukwa cha kuleka kuziŵa.—Machitidu 3:15, 17.

• Kutondeka kwa ulamuliru wa ŵanthu. Kanandi andali, amalonda ndipuso avisopa akamba kuti achita vinthu mwaurunji. Kweni uneneska ngwakuti yiwu ndiwu anangisa vinthu vinandi, achita chinyengu, atanjiya, mbambunu kweniso atuvwa cha vo anyawu atiŵakambiya. Venivi vichitiska kuti pacharu pachitikengi vinthu vambula urunji vinandi. Kweni asani ŵanthu wosi aleka kulondo ulongozgi waku Chiuta palivi chazeru cho angachita.—Wakutawula 8:9; Yeremiya 10:23.

Kumbi Chiuta vitimukwaska asani vinthu vambula urunji vititichitikiya?

Hinya, iyu watinkha vinthu vambula urunji ndipuso mijalidu yo yichitiska kuti ŵanthu achitengi vambula urunji. (Nthanthi 6:16-18) Iyu wangukambiya mchimi Yesaya kulemba kuti: “Ini Yehova,a nditanja urunji, nditinkha unkhungu kweniso vinthu vambula urunji.”—Yesaya 61:8.

Dangu lo Chiuta wangupereka kwa Ayisirayeli lalongonga kuti iyu wakhumbanga kuti ŵanthu achitengi vinthu mwaurunji. Iyu wangulamula akweruzga kuti angalondanga vinyeda cha pamwenga vinthu vinyaki kuti aleki kubendezga urunji. (Dotoronome 16:18-20) Iyu wangukana Ayisirayeli wo anguleka kumuvwiya ndipu aryiyanga masuku pamutu ŵanthu wo ŵenga akavu ndipuso akusika. Iyu wanguŵakana so chifukwa chakukana kulondo fundu zaki zapachanya.—Yesaya 10:1-3.

Kumbi Chiuta wazamumalisa vinthu vambula urunji?

Hinya. Kuziya mwaku Yesu Khristu, Chiuta wazamutuzgapu ubudi chifukwa ndiwu uchitiska kuti ŵanthu achitengi vinthu vambula urunji ndipu wazamuwovya ŵanthu kuti azije arunji. (Yohane 1:29; Aroma 6:23) Chiuta wakuŵika so Ufumu waki wo wazamunozga charu chapasi kuti chije chifya ndipu weyosi wazamukondwa ndi urunji. (Yesaya 32:1; 2 Peturo 3:13) Kuti muziŵi vinandi vakukwaskana ndi Ufumu wa kuchanya, woneriyani vidiyo yakuti Kumbi Ufumu Waku Chiuta Ntchinthu Wuli?

Kumbi umoyu wazamuja wuli mucharu chifya cha urunji?

Pa nyengu yo charu chosi chazamuzaza ndi urunji, weyosi wazamujanga mwachimangu kweniso mwakuvikilirika. (Yesaya 32:16-18) Chiuta wawona ŵanthu wosi kuti mbakuyanana ndipu iyu wazamuchitiya weyosi vinthu mwaurunji. Kwazamuŵavi chitima, kuliya ndipuso kuvwa vakuŵaŵa chifukwa cha vinthu vosi vambula urunji ndipu mukuluta kwa nyengu tazamuyamba kuluwa vinthu vambula urunji vo ŵanthu atichitiyanga. (Yesaya 65:17; Chivumbuzi 21:3, 4) Kuti muziŵi vinandi, wonani nkhani yakuti “Kumbi ndi Vinthu Wuli vo Ufumu Waku Chiuta Ufiskengi?”

Kumbi mugomezga nadi kuti Chiuta wazamumalisa vinthu vambula urunji?

Hinya. Mu Bayibolu mwe mauchimi ngakugomezgeka, mbiri kweniso fundu zauneneska zakukwaskana ndi sayansi ndipu fundu zaki zosi zikoliyana. Wenuwu mbukaboni wakuti tingagomezga vo Chiuta wakulayizga. Nkhani zo ze mumphata zikonkhoska vinandi pa nkhani yeniyi:

• Kumbi Tingasimikiza Wuli Kuti vo Bayibolu Likamba Vaunenesa? (vidiyo)

• “Mauchimi Ngo Ngakufiskika”

• “Maulosi Onse a M’baibulo Amakwaniritsidwa”

• “Chifukwa Chake Tiyenera Kukhulupirira Baibulo”

Kumbi tingachita wuli asani ŵanthu atitichitiya vinthu vambula urunji?

Munyengu yakali, ŵanthu aku Chiuta ayesesanga kuchita vosi vo angafiska kuti ŵanthu aleki kuŵachitiya vinthu vambula urunji. Mwakuyeruzgiyapu, wakutumika Paulo angumuchitiya vinthu vambula urunji vo vatingi viŵikengi umoyu waki uje pangozi. Kweni wangujapu waka cheti cha, mumalu mwaki wangupanga apilu mulandu waki kwaku Kayisara.—Machitidu 25:8-12.

Mwaviyo, ŵanthu angafiska cha kumalisa vinthu vambula urunji vo vichitika pacharu. (Wakutawula 1:15) Chinanga kuti veviyo, ŵanthu anandi aja ndi chivwanu chifukwa cha malayizgu ngaku Chiuta ndipu asuzgika viŵi maŵanaŵanu cha asani ŵanthu aŵachitiya vinthu vambula urunji chifukwa aja ndi chimangu cha mu mtima.