Ŵanthu Ananga Charu—Kumbi Bayibolu Likambanji?

Alongozgi a vyaru angutuzga lipoti lakukwaskana ndi kusintha kwa nyengu pa 4 April 2022. Mu lipoti lenili, António Guterres yo ndi mlembi mura wa wupu wa United Nations wangukamba kuti: “Taŵanthu tichita vinthu vinandi vo vichitiskengi kuti pambula kuswera yapa nyengu yisinthiyengi limu ndi kufika paheni. Maji ngasapaliya ukongwa mumatawuni ngakulungakulu. Charu chitotcha ukongwa kuluska kali. Kuchitika so vimphepu vakofya. M’madera nganandi maji ngasoŵa. Mitundu yinandi ya vakume ndi nyama yamala. Vo tazumbuwapu yapa, vaboza cha ndipu tigozga ŵaka cha. Venivi ndivu kafukufuku wa asayansi walongo kuti vichitikengi asani vyaru visinthengi cha fundu zo vitende.”

Pa 15 June, 2022, nyuzipepala ya The New York Times yingulemba nkhani ya mutu wakuti, “Kusapaliya kwa Maji Mutawuni ya Yellowstone, Kulongo Kuti Kunthazi kwe Masuzgu Ngakulu.” Nyuzipepala iyi yingukamba kuti: “Asayansi atcheŵeska kuti muvyaka vo vituza kunthazi uku, malu ngakusungiyaku nyama ndi chilengedu pafufupi ngosi 423 [ku United States] nganangikiyengi limu chifukwa cha kusintha kwa nyengu, ukongwa chifukwa cha kotcha. Kuchitikengi vinthu vakofya nge vo tiŵerenga mu Bayibolu nge, kubuka kwa motu, kusapaliya kwa maji, kusongonoka kwa ayisi, kusazgikiyaku kwa maji nga munyanja kweniso chifundizi chikulu.”

Kumbi vingachitika kumalisa masuzgu ngakukwaskana ndi kunangika kwa chilengedu? Asani vingachitika, ndi yani yo wangangamalisa? Wonani vo Bayibolu likamba.

Bayibolu likukambiya limu kuti ŵanthu azamunanga chilengedu

Bayibolu likamba kuti Chiuta ‘wazamunanga wo ananga charu chapasi.’ (Chivumbuzi 11:18) Vesi ili lititisambiza vinthu vitatu:

1. 1. Vakuchita va ŵanthu vinangengi ukongwa charu.

2. 2. Kunangika kwa charu kwazamumala.

3. 3. Chiuta ndiyu wazamumalisa masuzgu ngakunangika kwa charu, mbanthu cha.

Charu chidu chazamuja umampha ukongwa kunthazi

Bayibolu likamba kuti “charu chijengi mpaka muyaya.” (Wakutawula 1:4) Pacharu chapasi pazamuja ŵanthu nyengu zosi.

• “Ŵanthu arunji azamulonde charu chapasi, ndipu azamuja mwenimo kwamuyaya.”—Salimo 37:29.

Vinthu vo vikunangika mucharu ichi vazamukuŵa so vamampha ukongwa.

• “Chipululu ndipuso charu chakumira, vazamukondwa, ndipu chipalamba chazamukondwa kweniso kuchita maluŵa.”—Yesaya 35:1.