Kumbi Vyaru Vingakoliyana Kuti Vimalisi Masuzgu ngo Ngatuza Chifukwa cha Kusintha kwa Nyengu?—Kumbi Bayibolu likambanji?

Nkhumanu ya wupu wakuwonere vakusintha kwa chilengedu (COP27 United Nations Climate Change Conference) yingumala pa Sabata, pa 20 November 2022. Chinanga kuti pa nkhumanu iyi angukoliyana kuti apereki ndalama ku vyaru vikavu kuti ziwovyi kumalana ndi ngozi zachilengedu zo zituza chifukwa cha kusintha kwa nyengu, kweni ŵanthu anandi awona kuti venivi vingamalisa cha kusintha kwa nyengu.

• Pa 19 November 2022, António Guterres yo ndi mlembi wa wupu wa United Nations wangukamba kuti: “Ndakondwa ukongwa chifukwa takoliyana kuti tisaniyi ndalama zakuti ziwovyi ŵanthu wo akumana ndi masuzgu chifukwa cha kusintha kwa nyengu. Kweni venivi vingachitiska kuti suzgu ili limali cha . . . Charu ichi chafika paheni ukongwa.”

• “Pambula kuswera yapa nyengu yisinthengi ukongwa vo vichitiskengi kuti ŵanthu anandi akumani ndi masuzgu.”—Mary Robinson, pulezidenti wakali wa ku Ireland ndipuso kazembi wakali wa United Nations wakuwona va wanangwa wa ŵanthu, 20 November 2022.

Achinyamata ndiwu afipa mtima ukongwa ndi vo vichitikiyengi charu ichi kunthazi. Kweni kumbi vyaru vingakoliyana ndi kufiska vo vikulayizga kuti vimalanengi ndi suzgu la kusintha kwa nyengu? Kumbi Bayibolu likambanji?

Kumbi vyaru vingakoliyana ndi kumalisa suzgu lenili?

Bayibolu likamba kuti chinanga kuti maboma ngangasaniya nthowa zinyaki zakumaliyana ndi masuzgu ngo ngatuza chifukwa cha kusintha kwa nyengu, kweni angamalisiya limu cha suzgu lenili. Wonani vifukwa viŵi ivi vo tikambiya viyo:

• “Cho ntchakugombete, chinganyoloreka cha.”—Wakutawula 1:15.

  Vo lemba ili ling’anamuwa: Maboma ngangafiska cha kuchita vosi vo ngakhumba chifukwa ŵanthu akulengeka munthowa yakuti angajilamuliyanga ŵija cha. (Yeremiya 10:23) Chinanga kuti vyaru vingakoliyana ndi kuchita vosi vo angafiska, kweni angamalisa cha masuzgu nga mucharu ichi.

• “Pakuti ŵanthu azamuja akujiyanja, akwanja ndalama, . . . ambula kukoliyana ndi anyawu.”—2 Timote 3:2, 3.

  Vo lemba ili ling’anamuwa: Bayibolu lingukambiya limu kuti ŵanthu anandi mu mazuŵa ngidu nganu aŵengi ambunu ndipuso ambula kukhumba kukoliyana ndi anyawu chifukwa akhumba kuti vaŵu pe ndiwu viyendengi.

Chifukwa cho tijaliya ndi chilindizga

Vo vichitikiyengi charu ichi kunthazi, vithemba vo maboma nga ŵanthu ngalayizga cha. Chiuta wakutipaska munthu yo wazakuchilamuliya umampha ukongwa charu ichi, yo ndi Yesu Khristu. Pakukamba vaku iyu, Bayibolu likamba kuti:

• “Boma lazamuja paphewa laki. Iyu wazamudanika kuti Wakulunguchizga Wakuziziswa, Chiuta Wanthazi, Ada Amuyaya, Mulongozgi Wachimangu.”—Yesaya 9:6, mazu ngamumphata.

Yesu ndi Fumu ya Ufumu waku Chiuta, pamwenga kuti boma lakuchanya. (Mateyu 6:10) Iyu we ndi nthazi, zeru, ndipuso khumbu lakunozga charu ichi kweniso kuphwere ŵanthu wo ajamu. (Salimo 72:12, 16) Asani waziyamba kulamuliya, boma lakuchanya lenili lazamutuzgapu wosi wo “ananga charu chapasi” ndipu wazamunozga so charu kuti chije chakutowa.—Chivumbuzi 11:18; Yesaya 35:1, 7.

Kuti muziŵi vinandi vakukwaskana ndi mo kusintha kwa nyengu kwazamumaliya, ŵerengani nkhani ya mutu wakuti “Kumbi Bayibolu Likambanji pa Nkhani Yakusintha kwa Nyengu Ndipuso vo Vazamuchitika Munthazi?”