Kumbi Musankhengi Mulongozgi Nuyu?—Kumbi Bayibolu Likambanji?

Mu masabata ngamanavi ngo ngatuza, mu vyaru vakupambanapambana pa charu chosi chapasi muchitikengi visankhu. Ŵanthu aŵanaŵaniya kuti kumbi ndiyani yo angazimuvote kuti waje mulongozgi wawu.

Kumbi Bayibolu likambanji?

Alongozgi a ŵanthu ŵe ndi mphaka

Bayibolu likamba chinthu chinyaki cho alongozgi a ŵanthu angatondeka kuchita.

• “Mungathembanga alongozgi cha pamwenga mwana wa munthu chifukwa wangakutaskani cha. Mvuchi waki utuwamu ndipu wawere kudongu; pa zuŵa lenilo, maŵanaŵanu ngaki ngamaliya penipo.”—Salimo 146:3, 4, mazu ngamumphata.

Chinanga mbalongozgi amampha ukongwa nawu atufwa. Kweniso, yiwu angaziŵiya limu cha kuti ŵanthu wo azamusere mumalu mwawu azamulutirizga ntchitu zawu zamampha pamwenga cha.—Wakutawula 2:18, 19.

Fundu njakuti, Bayibolu lilongo kuti ŵanthu akupangika kuti angajilamuliyanga ŵija cha.

• “Munthu yo watenda walivi nthazi zakunyoloske maphazi ngaki.”—Yeremiya 10:23.

Kumbi walipu yo wangaja mulongozgi wamampha mazuŵa nganu?

Mulongozgi yo Chiuta wakusankha

Bayibolu likonkhoska kuti Chiuta wakusankha mulongozgi wamampha ukongwa kweniso wakuthembeka: Yesu Khristu. (Salimo 2:6) Yesu ndi Fumu ya Ufumu waku Chiuta, wo ndi boma lo lilamuliya kutuliya kuchanya.—Mateyu 6:10.

Kumbi musankhengi ulamuliru waku Yesu? Bayibolu lilongo chifukwa cho tikhumbikiya kujifumba fumbu lenili:

• “Tumbikani mwana [Yesu Khristu], asani po cha Chiuta wakwiyengi ndipu muparanyikengi ndi kutuzgikapu panthowa, pakuti ukali Waki ukole mwaliŵi. Mbakukondwa wosi wo abisama mwaku Iyu.”—Salimo 2:12.

Sonu ndiyu nyengu yamampha yakusankhiya vakuchita. Uchimi wa mu Bayibolu ulongo kuti Yesu wakwamba kulamuliya mu chaka cha 1914, ndipu pambula kuswera yapa Ufumu waku Chiuta wazamusere mumalu mwa maboma ngosi nga ŵanthu.—Daniyeli 2:44.

Kuti muziŵi vinandi vakukwaskana ndi vo mungachita kuti musankhi ulamuliru waku Yesu, ŵerengani nkhani ya mutu wakuti “Sankhani Ufumu Waku Chiuta Kweche Sonu!”