Kumbi Kuja Mkhristu Kung’anamuwanji?—Kumbi Bayibolu Likambanji?

Mazuŵa nganu, ŵanthu anandi pacharu chosi atijikamba kuti Mbakhristu, chinanga kuti achita vinthu vo vipweteka anyawu. Anyaki mbakujikuzga, mbachinyengu pamwenga mbambula lisungu. Anyaki, mbambula kugomezgeka ku munthu yo akutorana nayu. Venivi vichitiska kuti ŵanthu anyaki ajifumbengi kuti: ‘Kumbi Kuja Mkhristu Kung’anamuwanji?’

Kumbi kuja Mkhristu kung’anamuwanji ukongwa?

Ntchipusu munthu kujikamba kuti ndi Mkhristu. Kweni uneneska ngwakuti kuja Mkhristu kusazgiyapu vinandi. Mwakukoliyana ndi vo Bayibolu likamba, Mkhristu ndi munthu yo ngwakusambira waku Yesu Khristu. (Machitidu 11:26) Yesu mweneku wangukamba kuti: “Asani mulutirizga kusunga mazu ngangu, ndikuti ndimwi akusambira ŵangu nadi.” (Yohane 8:31) Mbuneneska kuti palivi munthu yo wangavwiya mazu ngaku Yesu mwakufikapu. Kweni Mkhristu watesesa kulondo vo Yesu wasambizanga ndipu walongo venivi kuziya mu vo wachita zuŵa lelosi. Wonani vakuyeruzgiyapu ivi.

Akhristu atanjana ukongwa

Vo Yesu wangukamba: “Nditikupaskani dangu lasonu, kuti muyanjanengi. Nge mo ini ndakuyanjiyani, yimwi namwi muyanjanengi. Pa chifukwa chenichi, ŵanthu wosi azamuziŵa kuti ndimwi akusambira ŵangu, asani mwaŵeni mutanjana.”—Yohane 13:34, 35.

Vo Yesu wanguchita: Yesu wayanjanga ŵanthu wosi mwambula kutoliyaku kanthu mo awonekiyanga, vinthu vo ŵenga navu pamwenga ko atuliyanga. Wanguchizga akutama, kuryisa ŵanthu kweniso wangupereka umoyu waki kufwiya ŵanthu anyaki.—Mateyu 14:14-21; 20:28.

Mo Akhristu achitiya: Akhristu alongo kuti atanja anyawu mwakuja akupaska, ambula sankhu kweniso agowoke anyawu. Yiwu atovya wo akhumbika chovyu ndipu akhumbisiska kuŵapaska vinthu vo ŵenavu.—1 Yohane 3:16.

Akhristu achita vinthu mwauneneska

Vo Yesu wangukamba: “Ini ndini . . . uneneska.”—Yohane 14:6.

Vo Yesu wanguchita: Yesu wachitanga kweniso kukamba vinthu mwauneneska. Iyu wanguchitapu cha vinthu mwauryarya pamwenga kulongoro mazu ngakupusisa anyaki. Waziŵikanga kuti wachitanga vinthu mwauneneska, chinanga kuti venivi vamuchitiskanga kuti wakumani ndi masuzgu.—Mateyu 22:16; 26:63-67.

Mo Akhristu achitiya: Akhristu akamba boza cha. Yiwu apereka misonkhu, atuba cha ndipuso achita chinyengu cha ndi ŵanthu wo aŵalemba ntchitu. (Aroma 13:5-7; Aefeso 4:28) Yiwu aryiya anyawu masuku pamutu cha, abiya mayesu cha pamwenga kukonkhoska vinthu vaboza asani alemba kalata yakufumba ntchitu.—Aheberi 13:18.

Akhristu achita vinthu mwalisungu

Vo Yesu wangukamba: “Zani kwaku ini mosi yimwi akulakatuka ndi ntchitu ndipuso akufyoka ndi katundu muzitu, ndipu ini ndazakukusisipuwani. Pingani goli langu ndipu sambirani kwaku ini chifukwa nde wakuzika kweniso wakujiyuyuwa, ndipu mwazamusisipulika. Chifukwa goli langu ndipusu kweniso katundu wangu ndimupepu.”—Mateyu 11:28-30.

Vo Yesu wanguchita: Iyu wachitanga vinthu mwalisungu ndi ŵanthu ndipuso wenga wakufikirika. Walondiyanga ŵana, kupembuzga wo asuzgika maŵanaŵanu kweniso wachitanga vinthu mwaulemu ndi ŵanthu.—Mariko 10:13-15; Luka 9:11.

Mo Akhristu achitiya: Akhristu achita vinthu mwalisungu ndi ŵanthu. Alongoro cha mazu ngaheni pamwenga ngakupweteka. (Aefeso 4:29, 31, 32) Yiwu aŵanaŵaniya anyawu ndipu atesesa kusaniya nthowa zo angaŵawovye.—Agalatiya 6:10.

Akhristu alutirizga kuja akugomezgeka kwaku yo akutorana nayu

Vo Yesu wangukamba: “Cho Chiuta wamanga pamoza, munthu wangapatuwanga cha.”—Mariko 10:9.

Vo Yesu wanguchita: Chinanga kuti Yesu wangutopu munthukazi cha, kweni wanguchiska ŵanthu akutorana kuti weyosi walutirizgi kuja wakugomezgeka ku munyaki. (Mateyu 19:9) Iyu wangutcheŵeska kuti ŵanthu akutorana akhumbika cha kuchita vinthu vo vingachitiska kuti nthengwa yawu yimali.—Mateyu 5:28.

Mo Akhristu achitiya: Akhristu atcheŵa kuchita vinthu vo vingatimbanyizga nthengwa yawu. (Aheberi 13:4) Ŵanthu akutorana atanjana kweniso atumbikana.—Aefeso 5:28, 33