Nchifukwa Wuli Akaboni aku Yehova Apharazgiya Ŵanthu wo ŵe M’matchalitchi Kali?

Tiwona kuti ŵanthu anandi wo ŵe m’matchalitchi kali atanja kukambiskana fundu za m’Bayibolo. Tiziŵa kuti munthu weyosi we ndi wanangwa wakugomezga vo wakhumba ndipuso titimuchichizga cha kuti wavwisiyi uthenga widu.

Asani tikambiskana ndi ŵanthu nkhani za chisopa, tigwiriskiya nchitu Bayibolo. Kweni tikambiskana nawu mwakuzika ndipuso mwaulemu. (1 Petro 3:15) Tiziŵa kuti anyaki angakana uthenga widu. (Mateyu 10:14) Kweni tiziŵiya limu cha kuti mbayani wo akanengi pamwenga kuzomera, lekani titesesa kukambiskana ndi weyosi. Tiziŵa so kuti nyengu zinyaki munthu wasintha.

Mwakuyeruzgiyapu, nyengu zinyaki tingatondeka kukambiskana ndi munthu chifukwa chakuti watangwanika ukongwa kweni wangayanja kuti tizikambiskani nayu ulendu unyaki. Nyengu zinyaki masuzgu ngo munthu wangakumana nangu ngangamuchitiska kuti wakhumbi kuvwa uthenga wa m’Bayibolo. Mwaviyo, asani munthu wakana uthenga widu titimujowole limu cha.