Kumbi Bayibolu Lingakuwovyani Kukunthiyapu Asani Mutama Matenda Ngakulu?

Vo Bayibolu limuka

Hinya. Chiuta waphwere ateŵeti ŵaki wo atama. Pakukamba va mteŵeti wakugomezgeka waku Chiuta, Bayibolu likamba kuti: ‘Yehova wamuwovyengi we pabedi laki pa nyengu yo watama.’ (Salimo 41:3) Asani mutama matenda ngakulu, fundu zitatu izi zingakuwovyani kuti mukunthiyepu:

1. Mupemphengi Chiuta kuti wakupaskeni nthazi. Iyu wangakupaskani ‘chimangu chaki cho chiluska kuziŵa vinthu kosi,’ cho chingakuwovyani kuti muleki kufipa mtima kweniso kuti mukunthiyepu.—Afilipi 4:6, 7.

2. Mujengi akukondwa. Bayibolu likamba kuti “Mtima walikondwa ndi munkhwala wamampha. Kweni mzimu wakutekenyeka utumwa nthazi za munthu.” (Nthanthi 17:22) Muyesesengi kuseka pamwenga kuchitaku myati. Venivi vitovya kuti muleki kusuzgika ukongwa ndi matenda ngo mutama.

3. Mugomezgengi vo Chiuta walayizga. Asani mulindiza vinthu vamampha mukondwa chinanga kuti mutama matenda ngakulu. (Aroma 12:12) Bayibolu likamba kuti munthazi, “palivi wakuja mucharu cho yo wazamukamba kuti: ‘Ndatama.’” (Yesaya 33:24) Pa nyengu iyi, Chiuta wazamumalisa matenda ngosi chinanga ndi matenda ngo ŵanthu atondeka kungamalisa. Mwakuyeruzgiyapu, Bayibolu likamba vo Chiuta wazamuchita pakumaliska ukoti. Ilu likamba kuti: “Liŵavu laki lisiliriki ukongwa kuluska po wenga mnyamata; Iyu wawere ku mazuŵa nga unyamata waki po wenga ndi nthazi.”—Yobu 33:25.

Ziŵani ivi: Akaboni aku Yehova aziŵa kuti Chiuta watovya ŵanthu wo atama kweni nawu alonde so chovyu cha munkhwala asani atama. (Mariko 2:17) Tichiska ŵanthu cha kulonde chovyu chinyaki cha munkhwala chifukwa munthu weyosi we ndi wanangwa wakusankha yija munkhwala wo wakhumba kulonde.