Ntchifukwa Wuli Chiuta Waleka Kumuka Mapempheru Nganyaki?

Vo Bayibolu limuka

Pe mapempheru nganyaki ngo Chiuta waleka kumuka. Wonani vinthu viŵi vo vichitiska kuti Chiuta waleki kumuka mapempheru nga ŵanthu anyaki.

1. Mapempheru ngo ngaleka kukoliyana ndi khumbu laku Chiuta

Chiuta wamuka cha mapempheru ngo ngaleka kukoliyana ndi khumbu laki. Khumbu laki lenili lisanirika mu Bayibolu. (1 Yohane 5:14) Mwakuyeruzgiyapu, Bayibolu likaniza kuja ndi mtima wambunu. Kuchova juga kuchitiska kuti munthu waje ndi mbunu. (1 Akorinto 6:9, 10) Mwaviyo Chiuta wangamuka cha mapempheru ngidu asani mupemphere kuti tiwini maphara. Chiuta wangachita chechosi cha cho munthu wakhumba. Ndipu mukhumbika kumuwonga ukongwa chifukwa cha venivi. Asani Chiuta wamukanga waka chechosi, mphanyi mutopa kuti anyinu akupempheriyeningi vinthu viheni.—Yakobe 4:3.

2. Asani munthu wachita vinthu viheni

Chiuta wangamuka cha mapempheru nga ŵanthu wosi wo achitiya dala vinthu vo iyu watinkha. Mwakuyeruzgiyapu, Chiuta wangukambiya ŵanthu wo akambanga kuti atimuteŵete uku achita vinthu viheni kuti: “Chinanga mupereki mapempheru nganandi, ndivwisiya cha; chifukwa manja nginu ngazaza ndopa.” (Yesaya 1:15) Kweni asani angusintha nthowa zawu ziheni ndi ‘kunyoloska vinthu,’ Chiuta watingi wavwengi mapempheru ngawu.—Yesaya 1:18.