Kumbi Dyaboli Wangalamuliya Ŵanthu?

Vo Bayibolu limuka

Dyaboli kweniso viŵanda vitimbanyiza ukongwa ŵanthu, mwakuti Bayibolu likamba kuti: “Charu chosi che mu nthazi ya muheni yo.” (1 Yohane 5:19) Bayibolu livumbuwa nthowa zo Dyaboli wagwiriskiya ntchitu kuti wapuluski ŵanthu.

• Chinyengu. Bayibolu lichiska Akhristu kuti ‘alimbanengi ndi mauryarya ngaku Dyaboli.’ (Aefeso 6:11) Satana wagwiriskiya ntchitu chinyengu kuti wapusikengi ŵanthu kuti agomezgengi kuti ŵanthu wo iyu wagwiriskiya ntchitu mbateŵeti aku Chiuta.—2 Akorinto 11:13-15.

• Vamizimu. Dyaboli wagwiriskiya ntchitu ŵanthu wo alongoro ndi mizimu, ŵanthu wo aloska vinthu vo vichitikengi kunthazi kweniso wo achita vamasenga kuti walandizgi ŵanthu. (Dotoronome 18:10-12) Vinthu vinyaki vo vichitiska kuti munthu walandizgiki ndi vamasenga nkhugwiriskiya ntchitu munkhwala wo ukoliyana ndi vamasenga, mgoneku kweniso kuŵanaŵaniya vamasenga.—Luka 11:24-26.

• Chisopa chaboza. Visopa vo visambiza visambizu vaboza vilandizga ŵanthu kuti alekengi kuvwiya Chiuta. (1 Akorinto 10:20) Bayibolu likamba kuti vigomezgu venivi ndi “visambizu va viŵanda.”—1 Timote 4:1.

• Kulamulika ndi viŵanda. Mu Bayibolu mwe nkhani zinyaki zo zilongo kuti ŵanthu anyaki alamulikanga ndi mizimu yiheni. Nyengu zinyaki ŵanthu wo alamulikanga ndi viŵanda ajanga achibulumutiya pamwenga ambuwu kweniso ajipwetekanga.—Mateyu 12:22; Mariko 5:2-5.

Kumbi mungachita wuli kuti muleki kulandizgika ndi Dyaboli?

Mukhumbika cha kopa viŵanda chifukwa Bayibolu lilongo mo mungasuskiya Dyaboli:

• Ziŵani nthowa zo Dyaboli wagwiriskiya ntchitu kuti muziŵi ‘mauryarya ngaki.’​—2 Akorinto 2:11.

• Musambirengi Bayibolu, ndipu mugwiriskiyengi ntchitu vo musambira. Kugwiriskiya ntchitu fundu za mu Bayibolu kutiwovyengi kuti tileki kulandizgika ndi Dyaboli.—Aefeso 6:11-18.

• Mukhumbika cha kusunga vinthu vo vikoliyana ndi vamizimu. (Machitidu 19:19) Vinthu ivi ndi sumu, mabuku, magazini, maposita ndipuso mavidiyo ngo ngachiska ŵanthu kuti achitengi vamasenga.