Muliŵavu la munthu mulivi malu ngakuti Ufumu waku Chiuta ungajamu

Kumbi Ufumu Waku Chiuta we Mumtima Winu?

Vo Bayibolu limuka

Awa. Ufumu waku Chiuta we mu mitima ya Akhristu cha.a Bayibolu lizumbuwa malu chayingu ko Ufumu wenuwu wuli. Likamba kuti “Ufumu wakuchanya.” (Mateyu 4:17) Wonani mo Bayibolu lilongore kuti Ufumu wenuwu ndi boma chayilu lo lilamuliya kutuliya kuchanya.

Ufumu waku Chiuta we ndi yo walamuliya, ŵanthu wo utiŵalamuliya, marangu kweniso we ndi chilatu cha kufiska khumbu laku Chiuta pacharu chapasi kweniso kuchanya.—Mateyu 6:10; Chivumbuzi 5:10.
Boma laku Chiuta pamwenga kuti Ufumu, wazamulimuliya “ŵanthu, mitundu, kweniso ŵanthu a vineneru vosi” pacharu chosi chapasi. (Daniyeli 7:13, 14) Mazaza nga ulamuliru waki ngazamutuliya ku ŵanthu cha, kweni ngazamutuliya kwaku Chiuta.—Salimo 2:4-6; Yesaya 9:7.
Yesu wangukambiya akutumika ŵaki akugomezgeka kuti azamulamuliya nayu limoza mu Ufumu wakuchanya ndipu ‘azamuja pamipandu yaufumu.’—Luka 22:28, 30.
Ufumu wenuwu wazamubaya arwani ŵaki wosi.—Salimo 2:1, 2, 8, 9; 110:1, 2; 1 Akorinto 15:25, 26.

Bayibolu likambapu cha kuti Ufumu wakuchanya we mumtima winu pamwenga kuti ulamuliya mumtima wa munthu. Kweni lilongo kuti “mazu nga Ufumu” pamwenga “uthenga wamampha,” ungasintha mtima wa munthu.—Mateyu 13:19; 24:14.

Kumbi mazu ngakuti “Ufumu waku Chiuta we pakati pinu” ngang’anamuwanji?

Ŵanthu anyaki atimbanyizika pa nkhani ya ko Ufumu waku Chiuta wuli chifukwa cha mo ŵanthu anyaki akonkhoske mazu ngo Yesu wangukamba pa Luka 17:21. Mwakuyeruzgiyapu, ŵanthu anyaki akamba kuti Yesu wang’anamuwanga kuti Ufumu waku Chiuta we mumtima ya ŵanthu. Kweni kuti tivwisi mazu nga pa lemba ili, tikhumbika kuvwisa mo nkhani yosi yiliri.

Alongozgi achisopa wo asuskanga Yesu — Ufumu waku Chiuta wenga mumtima ya ŵanthu aheni cha wo asuskanga Yesu kweniso wo akhumbanga kumubaya

Yapa, Yesu wakamba ndi gulu la alongozgi achisopa la Afarisi wo amususkanga kweniso wo apangananga vakuti amubayi. (Mateyu 12:14; Luka 17:20) Kumbi pangaŵa pakuvwika kukamba kuti Ufumu waku Chiuta wenga mumitima ya ŵanthu aheni ŵenaŵa? Yesu wanguŵakambiya kuti: “Mukati mwinu mwazaza chinyengu ndi kuleka kuvwiya marangu.”—Mateyu 23:27, 28.

Mabayibolu nganyaki akufwatuliya umampha mazu ngaku Yesu nga pa Luka 17:21 kuti: “Ufumu waku Chiuta we pakati pinu.” (New World Translation) Yapa, Ufumu waku Chiuta wenga “pakati” pa Afarisi chifukwa chakuti Yesu yo Chiuta wakumusankha nge Fumu wenga pakati pawu.—Luka 1:32, 33.

a Matchalitchi nganandi Ngachikhristu ngasambiza kuti Ufumu waku Chiuta we mumitima ya ŵanthu. Mwakuyeruzgiyapu, ŵaraŵara a tchalitchi la Southern Baptist Convention ku United States, angukamba kuti Ufumu waku Chiuta ntchigaŵa cha “ulamuliru waku Chiuta wo we mumtima wa munthu ndipuso pa umoyu waki.” Mwakuyanana waka ndi venivi, Papa Benedict XVI wangulemba mubuku laki kuti: “Ufumu waku Chiuta utuza mumtima mwa munthu asani wavwisiya.”—Jesus of Nazareth.