Kumbi ndi Vinthu Wuli vo Vilongo Kuti Tija mu “Mazuŵa Ngakumaliya” Pamwenga “Nyengu za Umaliru”?

Vo Bayibolu limuka

Bayibolu likonkhoska vo vichitika pacharu, mo vinthu viliri kweniso mijalidu ya ŵanthu vo vilongo ‘umaliru wa mgonezi [wunu]’ pamwenga “kumala kwa charu.” (Mateyu 24:3; King James Version) Bayibolu lidana kuti nyengu yeniyi kuti ndi “mazuŵa ngakumaliya” pamwenga kuti “nyengu za umaliru.”—2 Timote 3:1; Daniyeli 8:19; Easy-to-Read Version.

Kumbi ndi mauchimi nganyaki nanga nga mu Bayibolu ngo ngakamba va “mazuŵa ngakumaliya”?

Bayibolu likukambiya limu kuti kwazamuchitika vinthu vinandi mu nyengu yimoza vo vazamuja “chisimikizu” cha mazuŵa ngakumaliya. (Luka 21:7) Wonani vakuyeruzgiyapu ivi:

Nkhondu pacharu chosi. Yesu wakukambiya limu kuti: “Mtundu wazamuyukiyana ndi mtundu unyaki, ufumu ndi ufumu unyaki.” (Mateyu 24:7) Mwakuyanana waka, lemba la Chivumbuzi 6:4 nalu likukambiya limu zaku yo wakwera pahachi yo wamiya nkhondu ndipu ‘wazamutuzgapu chimangu pacharu chapasi.’

Nja. Yesu wakukambiya limu kuti: “Kwazamuja nja.” (Mateyu 24:7) Buku la Chivumbuzi likukambiya so limu zaku yo wakwera pahachi, yo wamiya nja yo yazamuŵaku muvigaŵa vinandi pacharu chapasi.—Chivumbuzi 6:5,6.

Vidilirisi vikuluvikulu. Yesu wangukamba kuti kwazamuchitika “vidilirisi mumalu ngakupambanapambana.” (Mateyu 24:7; Luka 21:11) Vidilirisi vikuluvikulu vo vichitika pacharu, vipangisa kuti ŵanthu anandi asuzgikengi kweniso afwengi ukongwa kuphara kali.

Matenda. Vo Yesu wangukamba vingulongore limu kuti kwazamuja milili ya “matenda ngakofya ngakupambanapambana.”—Luka 21:11, Contemporary English Version.

Kuleka kuvwiya marangu. Chinanga kuti ŵanthu akwamba kali ukongwa kuswa marangu, kweni Yesu wangukambiya limu kuti mu mazuŵa ngakumaliya “ŵanthu anandi azamuleka kuvwiya marangu.”—Mateyu 24:12.

Kunanga charu. Lemba la Chivumbuzi 11:18 likukambiya limu kuti ŵanthu ‘azamunanga charu chapasi.’ Kusazgiyapu pakuchita vinthu viheni nge viwawa ndipuso vinthu va chinyengu, ŵanthu ananga so chilengedu munthowa zinandi.

Kuchita mijalidu yiheni mwakujumphisa. Pa 2 Timote 3:1-4, Bayibolu likukambiya limu kuti wanthu azamuja “ambula kuwonga, ambula kugomezgeka, . . . ambula kukoliyana ndi anyawu, akukamba vinthu viheni va ŵanthu anyaki, ambula kujiko, akofya, akutinkha vamampha, akupereka anyawu ambula kuvwa va anyawu, akujitukumuwa chifukwa cha kunyada.” Mphakwenere nadi kuti Bayibolu likamba nyengu yo ŵanthu achita mijalidu yiheni yeniyi kuti ndi ‘nyengu yakusuzga ukongwa.’

Kuleka kukoliyana mu mabanja. Pa 2 Timote 3:2, 3 Bayibolu likukambiya limu kuti ŵanthu azamukuŵa “ambula chanju chakuwa nachu” kweniso “ambula kuvwiya apapi.”

Ambula kwanja Chiuta. Yesu wakukambiya limu kuti: “chanju cha anandi chazamuzizira.” (Mateyu 24:12) Yesu wang’anamuwanga kuti ŵanthu anandi azamuleka kwanja Chiuta. Mwakuyanana waka, lemba la 2 Timote 3:4 likamba kuti mumazuŵa ngakumaliya, ŵanthu azamuja “akwanja vakukondwesa mumalu mwakwanja Chiuta.”

Akuwoneka nge asopa Chiuta. Pa 2 Timote 3:5, Bayibolu likukambiya limu kuti ŵanthu azamuwoneka nge asopa Chiuta kweni akhumba cha kulongozgeka ndi fundu zaki.

Kuvwisa mauchimi nga mu Bayibolu. Buku la Daniyeli likukambiya limu kuti mu “nyengu ya umaliru” ŵanthu azamuziŵa uneneska wa mu Bayibolu, kweniso azakungavwisisa mauchimi ngenanga.—Daniyeli 12:4, mazu ngamumphata.

Ntchitu yakupharazga pacharu chosi. Yesu wangukambiya limu kuti: “Uthenga wamampha uwu wa Ufumu, wazamupharazgika pacharu chosi chapasi kuti uje ukaboni ku ŵanthu amitundu yosi.”—Mateyu 24:14.

Ŵanthu akutinkha uneneska kweniso akunyoza ŵepeposi. Yesu wakukambiya limu kuti ŵanthu azakungatoliyaku kanthu cha maukaboni ngakuwoneke limu ngakusimikiziya kuti umaliru wa charu wepafupi. (Mateyu 24:37-39) Kweniso lemba la 2 Peturo 3:3, likukambiya limu kuti kwazamukuŵa ŵanthu akunyoza kweniso azakungakana maukaboni ngakulongo kuti te mu mazuŵa ngakumaliya.

Mauchimi ngosi ngafiskika mazuŵa nganu. Yesu wakukamba kuti mauchimi ngosi yanga ngazamufiskika nyengu yimoza, ngamanavi waka cha kweni ngosi pamoza.—Mateyu 24:33.

Kumbi te mu “mazuŵa ngakumaliya” nadi?

Hinya. Vakuchitika vapacharu chapasi kweniso asani mungaŵerengese nyengu mwakulondo vo Bayibolu likamba, muwonengi kuti mazuŵa ngakumaliya ngakwamba nadi mu 1914, chaka cho Nkhondu Yakwamba Yapacharu chosi yingwambiya. Kuti muziŵi mo vakuchitika va charu vilongore kuti tija nadi mu mazuŵa ngakumaliya, woneriyani vidiyo yakuti, “Kutuwa mu Chaka cha 1914 Charu Chasintha Ukongwa.”

Ufumu waku Chiuta ukwamba kulamuliya kuchanya mu 1914, ndipu chinyaki mwa vinthu vo Ufumu uwu unguchita wati wajalikisika kuchanya, nkhudikisa Satana Dyaboli ndi viŵanda vaki, ndipu wosi anguponyeka pacharu chapasi po angulutirizga kulandizga ŵanthu. (Chivumbuzi 12:7-12) Nthazi zaku Satana pa ŵanthu ziwoneke mu mijalidu kweniso vinthu viheni vo ŵanthu achita ndipu venivi vilongo nadi kuti te mu mazuŵa ngakumaliya ngo ndi “nyengu yakusuzga ukongwa.”—2 Timote 3:1.

Ŵanthu anandi asuzgika maŵanaŵanu mu nyengu yakusuzga yeniyi. Yiwu adandawula ukongwa ndi vo vichitika ndipu aziŵa so cha vo angachita kuti ayambi so kuchitiya vinthu limoza. Ndipu ŵanthu anyaki atopa kuti kunthazi ayambengi kubayana ŵijaŵija.

Chinanga kuti veviyo, anyaki mwa ŵanthu wo asuzgika ndi vinthu viheni vo vichitika mucharu ŵe ndi chilindizga cha vinthu vamampha vo vichitikengi kunthazi. Yiwu agomezga kuti pambula kuswera yapa, Ufumu waku Chiuta utuzgengepu masuzgu ngosi pacharu. (Daniyeli 2:44; Chivumbuzi 21:3,4) Yiwu alindizga mwakuzikira nyengu yo Ufumu waku Chiuta wazamufiskiya malayizgu ngaki. Ndipu achiskika so ukongwa ndi mazu ngo Yesu wakukamba ngakuti: “Kweni yo wazamukunthiyapu mpaka pakumaliya ndiyu wazamutaskika.”—Mateyu 24:13; Mika 7:7.