VO ACHINYAMATA AFUMBA
Kumbi Bayibolu Lingandiwovya Wuli?—Chigaŵa Chakwamba: Kuŵanaŵaniya Fundu za mu Bayibolu
“Kanandi nditufwa mphwayi asani ndikhumba kuŵerenga Bayibolu, chifukwa ndiwona kuti ntchibuku chikulu ukongwa!”—Briana yo we ndi vyaka 15.
Kumbi namwi muwona viyo? Nkhani iyi yingakuwovyani!
Ntchifukwa wuli ndikhumbika kuŵerenga Bayibolu?
Kumbi kuŵerenga Bayibolu kutikukondwesani cha? Mphakuvwika kuwona viyo. Panyaki mungaŵanaŵaniya kuti Bayibolu le ndi mapeji nganandi, le ndi timalembu timanatimana kweniso lilivi vithuzi ndipu liyanana cha ndi TV kweniso mavidiyo!
Yeruzgiyani kuti mwawona chibokosi chikulu cho ŵanthu aponyangamu ndalama mu nyengu yakali. Kumbi mungakhumba cha kuwona vo ve mukati?
Bayibolu liyanana ŵaka ndi chibokosi chenichi. Ilu le ndi fundu zo zingakuwovyani kuti
Musankhengi umampha vakuchita
Mukambiskanengi umampha ndi apapi ŵinu
Musaniyi mabwezi ngamampha
Mumalani ndi vinthu vo vitikufipiskani mtima
Ntchifukwa wuli fundu za mubuku lakali lenili zeche zakovya mazuŵa nganu? Ntchifukwa chakuti “Malemba ngosi ngakukambirika ndi Chiuta.” (2 Timote 3:16) Venivi vilongo kuti ulongozgi wa mu Bayibolu ukutuliya ku munthu wazeru ukongwa.
Bayibolu liyanana ndi bokosi lakusungiyamu ndalama ndipu le ndi ulongozgi wakovya ukongwa
Kumbi ndingachita wuli kuti ndikondwengi pakuŵerenga Bayibolu?
Nthowa yakwamba: Mungaŵerenga Bayibolu kutuwa kukwamba mpaka kukumaliya. Venivi vingakuwovyani kuti muziŵi fundu yikulu yo ye mu Bayibolu. Pe nthowa zinandi zo mungaŵerenge Bayibolu. Wonani nthowa ziŵi izi:
Mungaŵerenga mabuku ngosi 66 ngo nge mu Bayibolu kwambiya Chiyambo mpaka Chivumbuzi.
Mungaŵerenga Bayibolu mwakutole nyengu yo vinthu vinguchitikiya.
Fundu Yakovya: Pa Chigaŵa 4-A mu Kabuku Kakusambiriya Mazu Ngaku Chiuta, palongo vakuchitika vakuzirwa paumoyu waku Yesu po wenga pacharu chapasi mwakutole nyengu yo vinguchitikiya.
Nthowa yachiŵi: Mungasankha nkhani yo yikoliyanaku ndi masuzgu ngo mukumana nangu. Mwakuyeruzgiyapu:
Kumbi mukhumba kusaniya mabwezi ngakugomezgeka? Mungaŵerenga nkhani yaku Yonatani ndi Davidi. (1 Samuele, chaputala 18-20) Pavuli paki wonani mijalidu yamampha yo Davidi wenga nayu yo yinguchitiska kuti Yonatani waje nayu pa ubwezi.
Kumbi mukhumba kuti mulekengi kuthera asani muyeseka? Mungaŵerenga nkhani yaku Yosefi kuti muwoni vo wanguchita kuti waleki kuthera po wayesekanga. (Chiyambo, chaputala 39) Pavuli paki wonani cho chinguwovya Yosefi kuti wakunthiyepu mayeseru.
Kumbi mukhumba kuziŵa mo pempheru litovye? Mungaŵerenga nkhani yaku Nehemiya. (Nehemiya, chaputala 2) Pavuli paki wonani ukaboni wo ulongo kuti pempheru laku Nehemiya linguwovya nadi.
Fundu Yakovya: Asani muŵerenga Bayibolu, mukhumbika kuja pamalu ngambula viwawa kuti maŵanaŵanu nginu ngosi ngaŵengi pa vo muŵerenga.
Nthowa yachitatu: Mungasankha kuŵerenga nkhani pamwenga sumu yinyaki ya mu Bayibolu, ndipu pavuli paki wonani mo yitikukwaskiyani. Asani mwaŵerenga, mungajifumba kuti:
Ntchifukwa wuli Yehova wakusankha kuti nkhani iyi yilembeki mu Bayibolu?
Kumbi nkhani iyi yilongo wuli mijalidu yaku Yehova kweniso mo wachitiya vinthu?
Kumbi ndingayigwiriskiya wuli ntchitu pa umoyu wangu?
Fundu Yakovya: Jani ndi chilatu. Pavuli paki lembani madeti ngo mukhumba kuti muyambiyi kuŵerenga Bayibolu.