VO ACHINYAMATA AFUMBA
Kumbi Bayibolu Lingandiwovya Wuli?—Chigaŵa Chachiŵi: Vo Mungachita Kuti Mukondwengi Pakuŵerenga Bayibolu
Munyamata munyaki zina laki Will wangukamba kuti: “Kuŵerenga Bayibolu kungawoneka nge kuti nkhwambula kukondwesa asani uleka kuziŵa nthowa yamampha yakuliŵerenge.”
Kumbi mukhumba kuziŵa vinthu vo vingakuwovyani kuti mukondwengi pakuŵerenga Bayibolu? Asani ndi viyo, nkhani iyi yikuwovyeningi.
Muyeruzgiyengi kuti muwona vo muŵerenga mu Bayibolu
Muyeruzgiyengi kuti mwengapu pa nyengu yo vinthu vo muŵerenga vachitikiyanga. Mungagwiriskiya ntchitu nthowa izi:
Sankhani nkhani yo mukhumba kusambira mu Bayibolu. Mungasankha kuŵerenga chakuchitika chinyaki mu Bayibolu pamwenga nkhani yinyaki mumabuku nga Uthenga Wamampha. Mungasankha so kuŵerenga nkhani za mu Bayibolu zo ziŵerengeka mwaseŵeru zo zisanirika pa jw.org.
Ŵerengani nkhani yo mwasankha. Mungaŵerenga pakumwija pamwenga mungaŵerenge limoza ndi anyinu pamwenga ŵanthu a mubanja linu. Asani mwasankha kuŵerenge limoza ndi anyinu, munthu yumoza wangaŵerenga nge wakukonkhoska ndipu anyaki angaŵerenga vigaŵa va ŵanthu anyaki.
Gwiriskiyani ntchitu sachizgu limoza pamwenga kujumpha pa masachizgu yanga:
Jambulani vithuzi vo vikonkhoska nkhani yo pamwenga vo vilongo mo nkhani yo yachitikiyanga. Pa chithuzi chechosi, lembanipu mazu ngo ngakonkhoska vo vichitika.
Asani muŵerenga nkhani ya munthu munyaki wakugomezgeka, lembani mijalidu yaki yamampha kweniso vinthu vamampha vo wachitanga, vo vinguchitiska kuti Yehova wamutumbiki.
Yeruzgiyani kuti mukonkhoske munthu munyaki nkhani yo mwaŵerenga. Mungayikonkhoska munthowa zakupambanapambana. Muchitengi nge mutiŵafumba mafumbu ŵanthu wo akonkhoskeka mu nkhani yo kweniso ŵanthu anyaki wo awonanga vo vachitikanga.
Asani munthu munyaki mu nkhani yo wangusankha vinthu mwambula zeru, ŵanaŵaniyani vinthu vo wakhumbikanga kuchita kuti wasankhi umampha. Mwakuyeruzgiyapu, ŵanaŵaniyani vo vinguchitika Peturo wati wakana Yesu. (Mariko 14:66-72) Kumbi Peturo wakhumbikanga kuchitanji kuti wachiti vinthu mwazeru?
Asani mungafiska, mungalemba seŵeru lakukonkhoska nkhani ya mu Bayibolu yo mwaŵerenga kweniso vo musambirapu.—Aroma 15:4.
Namwi mungakondwa asani muŵerenga Bayibolu!
Mufufuzengi!
Asani mwayiziŵa umampha nkhani yo muŵerenga, mungasaniya fundu zinandi zo mwalekanga kuziziŵa. Nyengu zinyaki mungafufuza mazu ngamoza pe pamwenga ngaŵi mu nkhani yo muŵerenga.
Yeruzgiyani Mateyu 28:7 ndi Mariko 16:7.
Ntchifukwa wuli Mariko wangusazgiyaku fundu yakuti Yesu wenga pafupi kuwoneke kwa akusambira “ndi Peturo”?
Fundu yakovya: Mariko wanguwona ndi masu cha vinthu ivi vichichitika. Kweni viwoneka kuti wanguchita kuvwa kutuliya kwaku Peturo.
Fundu yakubisika: Ntchifukwa wuli Peturo wakhumbanga kusimikiza kuti Yesu wakhumba kukumana nayu so? (Mariko 14:66-72) Kumbi Yesu wangulongo wuli kuti wamuyanjanga ndi mtima wosi Peturo? Kumbi mungalongo wuli kuti mutanja anyinu ndi mtima wosi nge mo Yesu wachitiyanga?
Asani muyeruzgiya kuti muwona vo muŵerenga kweniso asani mufufuza, mukondwengi ukongwa asani muŵerenga Bayibolu!