Kumbi Bayibolu Likambanji Vakukwaskana Ndi Masoka Ngachilengedu?

Vo Bayibolu likamba

Ndi Chiuta cha yo wachitiska masoka ngachilengedu ngo ngachitika mazuŵa nganu. Kweni vitimukwaska ukongwa kuwona ŵanthu achisuzgika ndi masoka ngenanga. Ufumu waku Chiuta wazamutuzgapu vinthu vosi vo vichitiska kuti ŵanthu asuzgikengi, kusazgapu masoka ngachilengedu. Pasonu panu, Chiuta wapembuzga ŵanthu wosi wo akwaskika ndi masoka ngenanga.​—2 Akorinto 1:3.

• Ntchifukwa wuli tingakamba kuti masoka ngachilengedu ntchilangu chakutuliya kwaku Chiuta cha?

• Kumbi masoka ngachilengedu ngalongo kuti te mu nyengu yakumaliya?

• Kumbi Chiuta watiŵawovya wuli ŵanthu wo akwaskika ndi masoka ngachilengedu?

• Kumbi mu Bayibolu mwe fundu zo zingatiwovya kuti tinozgeke masoka ngachilengedu?

• Mavesi nga mu Bayibolu ngo ngangapembuzga wo akwaskika ndi masoka ngachilengedu

Ntchifukwa wuli tingakamba kuti masoka ngachilengedu ntchilangu chakutuliya kwaku Chiuta cha?

Nge mo Bayibolu lilongore, mo masoka ngachilengedu ngachitikiya, vipambana ukongwa ndimo Chiuta wagwiriskiyanga ntchitu nthazi zaki pakupereka chilangu.

• Masoka ngachilengedu ngabaya kweniso ngapweteka ŵanthu amampha ndi aheni viyo. Venivi vipambana ukongwa ndi vo Chiuta wachitanga. Bayibolu likamba kuti asani wapenja kupereka chilangu wawonesesanga kuti wabaya ŵanthu aheni pe. Mwakuyeruzgiyapu, Chiuta wangutaska Loti ndi ŵana ŵaki ŵaŵi anthukazi pa nyengu yo wabwanganduwanga tawuni ya Sodomu ndi Gomora. (Chiyambo 19:​29, 30) Chiuta wanguwona ŵanthu a mitima yamampha wo ŵengaku pa nyengu yeniyi ndipu wangubaya wosi wo ŵenga aheni.​—Chiyambo 18:23​-32; 1 Samuele 16:7.

• Masoka ngachilengedu ngatuza kwambula kutcheŵeska. Kweni Chiuta waŵatcheŵeskanga dankha ŵanthu aheni wechendaŵabayi mwakugwiriskiya ntchitu chilengedu. Ŵanthu wo avwiyanga ajanga ndi mwaŵi wakutaskika kumasoka ngenanga.​—Chiyambo 7:​1-5; Mateyu 24:38, 39.

• Vakuchitika va ŵanthu navu vitambisa masoka ngachilengedu. Mu nthowa wuli? Yiwu ananga chilengedu ndipu anyaki azenga nyumba zawu kumalu ko kanandi kuchitika vidilirisi, ko kusapariya maji ndipuso ko nyengu zaki zamampha viŵi cha. (Chivumbuzi 11:18) Mwaviyo, mbumampha cha kumba Chiuta mulandu asani ŵanthu akumana ndi masuzgu chifukwa cha vakusankha vawu.​—Nthanthi 19:3.

Kumbi masoka ngachilengedu ngalongo kuti te mu nyengu yakumaliya?

Hinya, Bayibolu likukambiya limu kuti kwazamukuŵa masoka ngachilengedu ‘kukumaliya kwa mugonezi,’ pamwenga “kuti mu mazuŵa ngakumaliya.” (Mateyu 24:3; 2 Timote 3:1) Mwakuyeruzgiyapu, pakukamba za mazuŵa nganu Yesu wanguti: “Kwazamuja nja ndi vidilirisi mumalu ngakupambanapambana.” (Mateyu 24:7) Pambula kuswera yapa, Chiuta watuzgengepu vinthu vosi vo vitambisa masuzgu pacharu chapasi, kusazgapu masoka nga ngachilengedu.​—Chivumbuzi 21:3, 4.

Kumbi Chiuta watiŵawovya wuli ŵanthu wo akwaskika ndi masoka ngachilengedu?

• Chiuta wagwiriskiya ntchitu Mazu ngaki pa kupembuzga ŵanthu. Bayibolu lititisimikiziya kuti Chiuta watitiphwere ndipuso wakwaskika ndi masuzgu ngo tikumana nangu. (Yesaya 63:9; 1 Peturo 5:​6, 7) Lilayizga so kuti masoka ngachilengedu ngazamuŵaku so cha.​—Wonani kamutu kakuti “Mavesi nga mu Bayibolu ngo ngangapembuzga wo akwaskika ndi masoka ngachilengedu.”

• Chiuta wagwiriskiya ntchitu ateŵeti ŵaki pakuwovya ŵanthu wo akwaskika ndi masoka ngachilengedu. Chiuta wagwiriskiya ntchitu ateŵeti ŵaki kuti achitengi vinthu nge Yesu. Bayibolu lingukambiya limu kuti Yesu wazamupembuzga “akusweka mtima ” ndipuso “wosi wo aliya.” (Yesaya 61:​1, 2) Ateŵeti aku Chiuta nawu atesesa kuchita nge mo iyu wachitiyanga.​—Yohane 13:15.

  Chiuta wagwiriskiya so ntchitu ateŵeti ŵaki kupereka vinthu vakuliŵavu ku ŵanthu wo akwaskika ndi masoka ngachilengedu.​—Machitidu 11:28-30; Agalatiya 6:​10.

Kumbi mu Bayibolu mwe fundu zo zingatiwovya kuti tinozgeke masoka ngachilengedu?

Hinya. Chinanga kuti Bayibolu likonkhoska vakukwaskana ndi mo tinganozgeke masoka ngachilengedu cha, kweni le ndi fundu zo zingatiwovya. Mwakuyeruzgiyapu:

• Nozgekiyani limu masoka ngachilengedu ngechendachitiki. Bayibolu likamba kuti: “Munthu wakuchenje wawona soka ndipu wabisama.” (Nthanthi 22:3) Mwaviyo, kungaŵa kwazeru kuziŵiya limu vakuchita maji ngechendafiki mukhosi. Kunozgeke kwenuku kungasazgapu kuyikiya limu vinthu vakukhumbika ukongwa pamalu ngamoza vo mungagwiriskiya ntchitu asani pachitika va mabuchibuchi kweniso kuyesere ndi ŵanthu a mubanja linu malu ngo mungachikumana asani kwachitika masoka ngachilengedu.

• Muwonengi umoyu kuti ngwakukhumbika ukongwa kuphara katundu. Bayibolu likamba kuti: “Tikuza ndi kekosi cha mucharu ndipu tipingengi kekosi cha pakutuwamu.” (1 Timote 6:​7, 8) Tijengi akunozgeka kusiya nyumba zidu kweniso katundu kuti tizifiski kuthaŵa asani kwachitika masoka ngachilengedu. Tikumbukengi kuti umoyu widu ngwakukhumbika ukongwa kuphara katundu.​—Mateyu 6:25.