KUKONKHOSKA MAVESI NGA MU BAYIBOLU
Yesaya 42:8—“Ndini AMBUYA”
“Ini ndini Yehova. Lenili ndilu zina langu; Unkhankhu wangu nditiwupereka ku munthu weyosi cha, Ndipu ndikhumba cha kuti ŵanthu athamikengi vikozgu vakujoba mumalu mwakuthamika ini.”—Yesaya 42:8, Bayibolu la Charu Chifya.
“Ndine Ambuya, lo ndilo zina langu; unkhankhu wangu kuti ndipaska ku munyake cha, pamwenga chisopo changu ku ŵangoza ŵakusongono.”—Yesaya 42:8, King James Version.
Vo Lemba la Yesaya 42:8 Ling’anamuwa
Chiuta watitikambiya zina laki ndipuso watitikambiya kuti titenere cha kuthamika vikozgu mumalu mwaku iyu.
Chiuta wakujipaska yija zina, lo muchitonga liziŵika kuti “Yehova.”a (Ekisodo 3:14, 15) Chinanga kuti zina laku Chiuta lisanilika maulendu pafufupi 7,000 mu Chipanganu Chakali (Malemba nga Chiheberi ndi Chiaramu), kweni mu Mabayibolu nganandi akutuzamu zina laku Chiuta ndipu akuŵikamu zina lakuti “AMBUYA” (mu vilembu vikuluvikulu). Mwakuyeruzgiyapu, pa Salimo 110:1, pe uchimi wo ukamba vaku Yehova ndi Yesu. Mu Bayibolu la King James Version, tiŵerenga kuti: “AMBUYA [Yehova] angumnene Mbuya wangu [Yesu].” (Machitidu 2:34-36) Bayibolu la Charu Chifya likonkhoska mo “Ambuya” ŵaŵi ŵenaŵa apambaniyana ndipu likuweziyamu zina chayilu laku Chiuta mu malu ngosi ngo zina ili lakhumbikanga kusanirika. Pa lemba ili, mu Bayibolu la Charu Chifya pe mazu ngakuti: “Yehova wangukambiya Ambuya kuti: ‘Ja kujanja langu lamaryi mpaka po ndaŵikiya arwani ŵaku kuja chakukandapu maphazi ngaku.’”
Akaswiri anandi agomezga kuti zina laku Chiuta ling’anamuwa kuti “Wachitiska kuja.” Ndi Chiuta yija wauneneska yo wangaja ndi zina nge lenili, chifukwa chakuti ndiyu yija yo wangafiska pamwenga kuchitiska ŵanthu kuja cho iyu wakhumba kuti wafiski khumbu laki.
Nge Mlengi widu ndipuso Chiuta wauneneska, Yehova wakhumba kuti tijiperekengi kwaku iyu pe. Tikhumbika cha kusopa munthu weyosi pamwenga chinthu chechosi kusazgapu vikozgu.—Ekisodo 20:2-6; 34:14; 1 Yohane 5:21.
Nkhani ya pa Yesaya 42:8
Mavesi ngakwambiriya nga pa Yesaya chaputala 42, Yehova wangukambiya limu ntchitu yo “Wakusankhika” waki wazamugwira. Chiuta wangukamba kuti mteŵeti waki wakusankhika mwenuyu “wazengi ndi urunji ku mitundu ya ŵanthu.” (Yesaya 42:1) Mwakukoliyana ndi layizgu lenili, Chiuta wangukamba kuti: “Sonu ndipharazga vinthu vifya. Vechendawoneki, nditikukambiyani vakukwaskana ndi vinthu vo.” (Yesaya 42:9) Pati pajumpha vyaka, uchimi wakukwaskana ndi “Wakusankhika” ungufiskika nadi, ndipu Mesiya pamwenga kuti Khristu wanguza pacharu chapasi kuzichita uteŵeti waki.—Mateyu 3:16, 17; 12:15-21.
a Mu Chiheberi zina laku Chiuta lilembeka mu vilembu vinayi vo kanandi mu Chingelezi vilembeka kuti YHWH. Mu Mabayibolu nganyaki nga Chingelezi zina laku Chiuta atililemba kuti “Yahweh.” Kuti muziŵi vinandi, wonani fundu zakukumaliya A4 mu Bayibolu la Charu Chifya pa mazu ngakuti “Zina Laku Chiuta mu Malemba nga Chiheberi.”