Afilipi 4:13—“Ndingachita Vinthu Vosi Kuziya Mwaku Khristu”

“Mu vinthu vosi ndija ndi nthazi kuporote mwaku yo watindipaska nthazi.”—Afilipi 4:13, Bayibolu la Charu Chifya.

“Ndingachita vinthu vosi kuziya mwaku Khristu mweniyo watindikhomeska.”—Afilipi 4:13, New King James Version.

Vo Lemba la Afilipi 4:13 Ling’anamuwa

Mazu yanga ngo wakutumika Paulo wangulemba, ngasimikiziya ŵanthu wo asopa Chiuta kuti alondiyengi nthazi kuti afiski khumbu Laki.

Mu Mabayibolu nganyaki mukulembeka kuti Khristu ndiyu wangumupaska nthazi Paulo. Kweni, mazu ngakuti “Khristu” ngasanirikamu cha mu mipukutu yakali ya Chigiriki. Mwaviyo, mu Mabayibolu nganandi mazuŵa nganu mukulembeka mazu ngakuti “yo watindipaska nthazi” (Bayibolu la Charu Chifya), “iyu mweniyo watindipasa nthazi” (New International Version). Sonu kumbi Paulo wakambanga vakuyani?

Mazu ngo Paulo wangulemba kukwambiriya mukalata yaki ngatenere kuti ngakambanga Chiuta. (Afilipi 4:6, 7, 10) Kukwambiriya kwa kalata yaki, Paulo wangulembe Akhristu aku Filipi kuti: “Chiuta ndiyu watikupaskani nthazi, watikupaskani . . . nthazi zakuchitiya.” (Afilipi 2:13) Ndipu pa 2 Akorinto 4:7, Paulo wangulemba kuti Chiuta ndiyu wamupaskanga nthazi zakuchitiya uteŵeti waki. (Yeruzgiyani ndi 2 Timote 1:8.) Mwaviyo, mphakuvwika kukamba kuti Paulo wakambanga vaku Chiuta kuti ndiyu “watindipaska nthazi.”

Kumbi Paulo wang’anamuwanganji po wangulemba kuti wazamusaniya nthazi “mu vinthu vosi”? Vinthu vo Paulo wakambanga venga vakupambana ndi vo vingumuchitikiya pa nyengu yo wachitanga khumbu laku Chiuta. Kwali wenga ndi vinthu vinandi vakuliŵavu pamwenga cha, iyu wathembanga Chiuta kuti wamuphweriyengi. Mwaviyo, Paulo wangusambira kuja wakukhorwa ndi vo wenga navu mwambula kutole kanthu ndi mo vinthu venge pa umoyu waki.—2 Akorinto 11:23-27; Afilipi 4:11.

Ateŵeti aku Chiuta mazuŵa nganu, angachiskika ndi mazu ngo Paulo wangulemba. Chiuta waŵapaskengi nthazi zo akhumbikiya kuti akunthiyepu mayeseru ndipuso kuti achitengi khumbu laki. Chiuta wangaŵapaska nthazi kuziya mwa mzimu waki wakupaturika, mwa abali ndi azichi ndipuso kuziya mu Mazu ngaki Bayibolu.—Luka 11:13; Machitidu 14:21, 22; Aheberi 4:12.

Nkhani ya pa Afilipi 4:13

Mazu nga pa lemba ili, nganyaki mwa mazu ngakumaliya ngo Paulo wangulemba mu kalata yaki yakuluta kwa Akhristu aku Filipi. Iyu wangulemba kalata yeniyi wati wamangika kakwamba ku Roma, cha mu ma 60-61 C.E. Pangujumpha nyengu yitali, kuti Paulo wawovyeki mwakuliŵavu ndi Akhristu aku Filipi. Kweni pa nyengu iyi, amutumiziyanga mphasu Paulo kuti wasaniyi vakukhumbika.—Afilipi 4:10, 14.

Paulo wanguŵawonga Akhristu aku Filipi chifukwa cha mtima wawu wakupaska ndipu wanguŵasimikiziya kuti we ndi vinthu vo wakhumbikiyanga. (Afilipi 4:18) Iyu wangugwiriskiya ntchitu mpata wenuwu kuti waŵakambiyeku fundu yakukhumbika ukongwa yakukwaskana ndi umoyu wo Mkhristu weyosi wakhumbika kuŵa nawu. Fundu yaki njakuti, Mkhristu weyosi kwali ngwakukhupuka pamwenga mukavu, wangakhorwa ndi umoyu asani wathemba Chiuta kuti wamuwovyi.—Afilipi 4:12.