Afilipi 4:6, 7—“Mungafipanga Mtima ndi Chinthu Chechosi Cha”

“Mungafipanga mtima ndi chinthu chechosi cha, kweni pa chinthu chechosi, mwa pempheru ndi kuŵeyere limoza ndi kuwonga, vo mupempha viziŵiki kwaku Chiuta; ndipu chimangu chaku Chiuta cho chiluska kuziŵa vinthu kosi, chivikiliyengi mitima yinu ndi maŵanaŵanu nginu kuporote mwaku Khristu Yesu.”—Afilipi 4:6, 7, Bayibolu la Charu Chifya.

Vo Lemba la Afilipi 4:6, 7 Ling’anamuwa

Asani ateŵeti aku Chiuta asuzgika ukongwa maŵanaŵanu pamwenga kufipa mtima ukongwa, yiwu angapemphera kwaku Chiuta kuti waŵapembuzgi. Iyu walayizga kuti waŵapasengi chimangu cha mumtima, cho chingaŵawovya kuti aleki kufipa mtima ukongwa ndipuso kuti aleki kuŵanaŵana vinthu viheni. Vesi 6 likonkhoska mtundu wa mapempheru ngo ngangaŵawovya kuja ndi chimangu chenichi.

Mapempheru ngakuŵeyere ndi mapempheru ngo munthu waŵeyere Chiuta ndi mtima wosi kuti wamuwovyi. Munthu wangaŵeyere Chiuta kuti wamuwovyi asani wasuzgika ukongwa maŵanaŵanu pamwenga asani umoyu waki we pangozi nge mo Yesu wanguchitiya. (Aheberi 5:7) Kanandi munthu wapereka mapempheru ngenanga mwakuwerezawereza.

Mapempheru ngakupempha ndi mapempheru ngo munthu wazumbuwa vinthu chayivu vo wakhumba kuti Chiuta wamuwovyi. Ŵanthu wo asopa Chiuta angamupempha “pa chinthu chechosi” pamwenga kuti “pa chakuchitika chechosi.” Kweni, mapempheru ngange yanga ngatenere kukoliyana ndi khumbu laku Chiuta nge mo Bayibolu likambiya.—1 Yohane 5:14.

Mapempheru ngakuwonga ndi mapempheru ngo tiwonga Chiuta pa vo watichitiya ndipuso vo wazakutichitiya kunthazi. Asani tiŵanaŵaniya vinthu vo Chiuta watichitiya, vititiwovya kuti tilutirizgi kuja akukondwa.—1 Atesalonika 5:16-18.

Chiuta wamuka mapempheru nga ateŵeti ŵaki ndipu watiŵapaska chimangu. “Chimangu chaku Chiuta” ntchimangu cho munthu watuŵa nachu chifukwa chakuja paubwezi wakukho ndi ndi iyu. (Aroma 15:13; Afilipi 4:9) Chimangu chenichi “chiluska kuziŵa vinthu kosi,” chifukwa chituliya kwaku Chiuta ndipuso chingatiwovya ukongwa kuluska mo tingaŵanaŵaniya.

Vesi la mu Bayibolu lenili likamba kuti chimangu chaku Chiuta chingavikiliya mitima yidu. Mazu ngachigiriki ngo akungafwatuliya kuti “kuvikiliya” ngakoliyana waka ndi vo asilikali achitanga kuti avikiliyi tawuni yakukho. Mwakuyanana waka, chimangu chaku Chiuta chivikiliya maŵanaŵanu nga munthu kuti waleki kuŵanaŵana viheni. Kweniso chitimuwovya kuti waleki kusuzgika ukongwa maŵanaŵanu ndi masuzgu ngo wakumana nangu.

Chimangu cho Chiuta watitipaska chititivikiliya “kuziya mwa Khristu Yesu” chifukwa nkhuziya mwaku Yesu pe ko kungatiwovya kuja paubwezi ndi Chiuta. Yesu wakupereka umoyu waki nge sembi chifukwa cha maubudi ngidu. Mwaviyo, asani tivwanengi mwaku iyu, tingakondwa ndi vitumbiku vakutuliya kwaku Chiuta. (Aheberi 11:6) Yesu ndi nthowa yakufikiya kwaku Chiuta. Yesu wangukamba kuti: “Palivi munthu yo watuza kwa Ada kwambula kuziya mwaku ini.”—Yohane 14:6; 16:23.

Nkhani ya pa Afilipi 4:6, 7

Buku la mu Bayibolu la Afilipi ndi kalata yo wakutumika Paulo walembiyanga Akhristu wo ajanga mutawuni ya ku Filipi.a Muchaputala 4 cha buku lenili, Paulo wanguchiska Akhristu mumpingu wenuwu kuti akondwengi ndipu wanguŵawonga chifukwa cha mtima wawu wakupasa, vo vingumuwovya kuti wakondwengi. (Afilipi 4:4, 10, 18) Paulo wangulongo mo pempheru lingatiwovye kuti tije ndi chimangu chaku Chiuta ndipuso wangukonkhoska vo tikhumbika kuŵanaŵaniya ndi kuchita kuti tilonde chovyu kutuliya kwaku “Chiuta wachimangu.”—Afilipi 4:8, 9.