KUKONKHOSKA MAVESI NGA MU BAYIBOLU
Genezesi 1:26—“Tiyeni Tipangi Munthu mu Chikozgu Chidu”
“Pavuli paki, Chiuta wangukamba kuti: ‘Tiyeni tipangi munthu mu chikozgu chidu ndipu waje wa nge isi. Walamuliyengi somba zamunyanja, vamoyu vo viphululuka mude ndi nyama zakuŵeta, walamuliyengi so charu chosi chapasi ndi nyama yeyosi yakukwaŵa yo yitenda pacharu chapasi.’”—Genezesi 1:26, Bayibolu la Charu Chifya.
“Ndipo Chiuta wanguti, ‘Tiyeni tilenge munthu mu chikozgu chidu, wakukozgana nafwe; ndipo watufuliye somba zamu nyanja ndi viyuni vya mude, ndi ng’ombe ndi pa charu chose chapasi; ndi pa chakukwaŵa chose cho chikwaŵa pa charu chapasi.’”—Chiyambo 1:26, Mazu Ghaku Chiuta.
Vo Lemba la Genezesi 1:26 Ling’anamuwa
Ŵanthu akupangika mu chikozgu chaku Chiuta vo ving’anamuwa kuti ŵe ndi mijalidu pamwenga alongo mijalidu yo Chiuta we nayu nge chanju, lisungu ndipuso urunji. Venivi vilongo chifukwa cho ŵanthu angayezge mijalidu yaku Chiuta.
“Chiuta wangukamba kuti: ‘Tiyeni tipangi munthu mu chikozgu chidu.’” Yehova Chiutaa wechendapangi weyosi pamwenga chechosi, wangupanga mungelu wanthazi ukongwa yo pavuli paki wanguzidanika kuti Yesu. Kuporote mwaku Yesu “vinthu vinyaki vosi vikulengeka kuchanya ndi pacharu chapasi.” (Akolose 1:16) Yesu we ndi mijalidu nge yaku Yehova, ndichu chifukwa chaki “iyu ntchikozgu chaku Chiuta wambula kuwoneka.” (Akolose 1:15) Mphaki kuti Chiuta wangukambiya Yesu kuti: “Tiyeni tipangi munthu mu chikozgu chidu.”
“Walamuliyengi . . . nyama zakuŵeta, walamuliyengi so charu chosi chapasi.” Vinyama vikulengeka mu chikozgu chaku Chiuta cha. Ivu vikulengeka cha kuti vilongongi mijalidu yo ŵanthu ŵe nayu nge chanju pamwenga kuti vijengi ndi njuŵi. Kweni Chiuta wativiphwere mbwenu vinyama. Ndichu chifukwa chaki iyu wangukamba kuti ŵanthu akhumbika “kulamuliya” vinyama pamwenga“kuja ndi udindu pa vinyama.” Yehova wangupaska ŵanthu udindu wakuphwere vinyama. (Salimo 8:6-8; Nthanthi 12:10) Yehova wakhumba kuti ŵanthu aphweriyengi umampha charu ndi vinthu vosi vamoyu vo ve mucharu.
Nkhani ya pa Genezesi 1:26
Machaputala ngaŵi ngakwambiriya nga buku la Genezesi ngakonkhoska va kulengeka kwa chilengedu, charu chidu ndipuso vamoyu va pacharu chapasi. Chechosi cho Yehova wakulenga ntchakuziziswa. kweni pa vakulengeka vosi pacharu chapasi, ŵanthu mbakuzirwa ukongwa kwaku iyu. Chiuta wati wamaliza ntchitu yaki yakulenga, iyu “wanguwona vosi vo wangupanga, ndipu venga umampha ukongwa.”—Genezesi 1:31.
Kuti muziŵi vinandi, woneriyani vidiyo yakukwaskana ndi nkhani yakulenga yo ye mubuku la Genezesi.
Fundu Zaboza zo Ŵanthu Agomezga Zakukwaskana ndi Genezesi 1:26
Fundu Yaboza: Mbanthulumi pe wo angayezga pamwenga kulongo mijalidu yaku Chiuta, anthukazi cha.
Fundu Yauneneska: Mazu ngakuti “munthulumi” ngo ngasanirika mu Mabayibolu nganandi, ngachitiska wakuŵerenga kuŵanaŵana kuti akamba waka anthulumi pe. Kweni pa lemba ili, mazu ngakwambiriya mu Chiheberi ngang’anamuwa ŵanthu wosi, munthulumi ndi munthukazi. Munthulumi ndipuso munthukazi wosi angalongo mijalidu yaku Chiuta. Wosi ŵe ndi mwaŵi wakuyanana wakwanjika ndi Chiuta kweniso kuzilonde mphasu ya umoyu wamuyaya.—Yohane 3:16.
Fundu Yaboza: Chiuta we ndi liŵavu lakuyanana ndi isi.
Fundu Yauneneska: “Chiuta ndi Mzimu,” ndipu waja kumalu chayingu cha. (Yohane 4:24) Chinanga kuti nyengu zinyaki Bayibolu likamba va chisku chaki, manja, mtima ndipuso vinyaki, mazu ngenanga ngatitisambiza waka vakukwaskana ndi Chiuta munthowa yo taŵanthu tingavwisa umampha.—Ekisodo 15:6; 1 Peturo 3:12.
Fundu Yaboza: Pa Genezesi 1:26 palongo kuti Yesu ndi Chiuta.
Fundu Yauneneska: Chiuta mbawisi aku Yesu ndipu Yesu ndi mwana waku Chiuta kweni mbanthu akuyanana cha. Yesu wangusambiza kuti Chiuta ndi mura ukongwa kuluska iyu. (Yohane 14:28) Kuti muziŵi vinandi, woneriyani vidiyo yakuti Kumbi Yesu Khristu Ndi Chiuta? pamwenga ŵerengani nkhani yakuti “Ntchifukwa Wuli Yesu Wadanika Kuti Mwana Waku Chiuta?”
Woneriyani vidiyo yifupi yo yikonkhoska vo ve mu buku la Genezesi
a Yehova ndilu zina laku Chiuta. (Salimo 83:18) Werengani nkhani yakuti “Kumbi Yehova Ndiyani?”